KJOAʼMIYA 11
Chjota xi kiski xi tʼatsʼe Jesús
Chótsenlalai je chjota xi faʼaitʼa ibi. Jéní Mateo, Marcos, Lucas, Juan, Pedro, Santiago, Judas kao Pablo. Ngatsʼi kʼoati kʼia tsakatio nichxin nga tsakʼejna je Jesús kʼoa kui kiski xi tʼatsʼe Jesús. Jmeni xi kiski kʼoa kao karta xi kiski yaa faʼaitʼa ya Biblia. A mesali jchai jmeni xi kisʼin chjota jebi...
ʼYáni chjota xokjoan
Jan koanni xi nʼio miyo koanle je Jesús kʼoa saʼnda ñatjeen kitsoyason. Jéní pastro Mateo, Juan kao Pedro. A koaan koakonái jñáni tjío... Je Mateo jngo libro kiski jñani tsakʼétʼa xi tʼatsʼe Jesús kʼoa je Juan kʼoati kiski xi tʼatsʼe Jesús. Tonga je Juan kʼoati je kiski Apocalipsis (Revelación) kʼoa jan karta kiski xi i̱ ʼmi: “Xi títjon, xi majaoni kʼoa xi majanni xo̱n xi pastro Juan kiskile ngatsʼi”. Je pastro Pedro kʼoati jao karta kiski kʼoa i ʼmi: “Xi títjon kʼoa xi majaoni xo̱n xi pastro Pedro kiskile ngatsʼi”. Tonga je xi majaoni xo̱n xi kiski je Pedro nʼio chjíle. Je Pedro kinrʼoéle Jeobá saʼnda tje̱n ngʼajmi kʼianga kitso xi tʼatsʼe Jesús: “Jébi ʼNdína. Nʼio tsjoake̱ kʼoa nʼio nda sʼe tokoan xi tʼatsʼe”.
Je chjota xi kʼoati faʼaitʼa ibi kʼoati kiski xi tʼatsʼe Jesús. Tobʼelañá je Marcos, tsakui nichxin tsabe jokoantʼain kʼianga kindoa je Jesús. Kʼoati kiski tsanda je Lucas xi tʼatsʼe Jesús. Chjinexki koan Lucas, kʼoa tsakui nichxin kʼia chjotale Cristo koan kʼianga jekʼien je Jesús.
Kʼoati jao mani je ndsʼe̱ Jesús xi maʼndí, xi kʼoati kiski xi tʼatsʼe Jesús. A ʼyaní ʼyani... I tjíotʼa ibi, Santiago kʼoa Judas tsakʼin. Nga títjon alikui koankjainle jmeni xi tsakakóya je Jesús. Kʼoakitso nga koanskále je Jesús. Tonga koankjainnile nga koanskanni kʼoa chjotale koan.
Kataʼyala xi tʼatsʼe Pablo. A tiʼyaní jñani tíjna. Kʼianga kjesa chjotale Cristo majin, Saulo tsakʼin. Nʼio jtike koan je chjotale Cristo kʼoa totaon tsabe. A meli jchai jókoanni nga chjotale Jesús koan... Ñandia kʼianga tje̱nya yandiaa toʼikoan jngo jta̱ kinrʼoéle xi ya tje̱n ngʼajmi tsakjákaoni. ʼYáni xi tsakjákao. Jéní Jesús kʼoa i kitsole: “Ánni nga totaon tiʼyasíni je chjota xi an tífitjenngina”. Je Pablo tsabe nga tjínnele sikʼantjaiya yaole kʼoa kuinga chjotale Cristo koansíni. Xijekoan, teño karta kiski xi faʼaitʼa Biblia, tje̱n Romanos saʼnda Hebreos.
A tsí nʼio tsjoa sʼe tokoán kʼianga nyaon nyaon bʼexkiaa je Biblia... Nʼio tse jmeni xi bakóyaná xi tʼatsʼe Jesús. A tsí mesali jchai xi tʼatsʼe...
