KJOAʼMIYA 6
Je David nʼiojin koan
Jónʼiai kʼianga nokjuin... Tsakui nichxin je kʼoaʼmilai pali kʼoa tsa je mali. Tonga tíjna jngo xi kʼoati koa̱n koasenkaoli. Kʼoa ngisa nʼio tse nganʼio tjínle tikʼoajinni toʼyani. A ʼyaní ʼyani... Jaon, jé Jeobá. Koaan kʼoakʼuínlai ngantsjai nga katabasenkaoli. Kʼoakisʼin je David. Nga je Jeobá kisinʼiotʼa yaole, nʼiojin koan. Yaa Biblia tsoyaná xi tʼatsʼe David.
Saʼnda nga sʼa ʼndíkji je David, je xijchále kʼoasʼin tsakakóyale nga tsjoake katama Jeobá. Kʼoa kuinga tsín kitsokjonni. Je chjota xi kjaʼaí tso̱kjonjin tsakui kjoa kjoaʼatojin xi jaʼatojin je David, tonga je alikui kitsokjon. Be nga je Jeobá miyole mani kʼoa be nga je koasenkao. Ñandia nga tíkoʼnda barréle, jngo xa kicho kʼoa jngo barréle kikao. A ʼyaní jokisʼin je David. Kitokatjenngile je xa kʼoa jesoa kisikʼien. Kʼoa kʼianga jngo oso kichonrʼoe je barréle, kʼoati kisikʼien. ʼYáni xi tsakasenkao je David nga kʼoasikji nʼiojin koanni... Jaon, jé Jeobá.
Kataʼyalasaa kʼiani nga kʼoati nʼiojin koan je David. Kʼianí nga kiskan je chjota israelita kao chjota filisteo. Jngo sondado filisteo, xi Goliat tsakʼin, nʼio ngʼa kisʼe. Je Goliat totsabesin je sondado israelita kʼoa kao Jeobá. I kitsole: “ʼYáni xi mele nga kao an kuixkainjin”. Tonga ngatsʼi je sondado kitsokjonle kʼoa nijngojin xi kitso kon nga skaan kao je. Kʼianga kinrʼoé je David jmeni xi títso je Goliat, i kitsole: “Kao an kuixkan, jé Jeobá koasenkaona nga sikinjele”. A tsí nʼio tse kjoanʼiojin kisʼele je David... Jaon, nʼio tse kjoanʼiojin kisʼele. A ʼyaní jmeni xi koan nga jekoanskanni.
Je David aon la̱jao̱ xi xjaʼai kjoan kiskoé kʼoa kao xjoa̱xín xi basénni la̱jao̱, kʼoa kinrʼoe nga skan kao chjota ngʼa xosíkji. Kʼianga tsabe Goliat je David nga tosʼa tiʼndí, totsakijnoke. Kʼoa je David i kitso: “Jngo ki̱cha̱ espada kichʼai ji nga tinroanrʼoenái, tonga an kao jaʼaínle Jeobá tifinrʼoenile”. Xijekoan, kitokanrʼoe Goliat, kʼoa jngo la̱jao̱ tsakʼéjnaya xjoa̱xínle, kʼoa tsakasénle. Je la̱jao̱ yakjoán tsʼakaole totjen, kʼoa je Goliat kiskatsʼotjeen kʼoa kʼieen. Kʼianga tsabe je chjota filisteo jmeni xi koan, nʼio kitsokjon kʼoa kitoka ngatsʼi. Ánni nga kisikinjenile David je Goliat ninga tosʼa tiʼndí nga kʼia... Kuinga je Jeobá tsakasenkao. Je Jeobá jesa xi ngisa nʼio tse nganʼio tjínle tikʼoajinni toʼya chjotani, ninga nʼio síxkón kjoan ngʼa.
Nʼio tse kjoanʼiojin kisʼele je David nga̱ be nga je Jeobá koasenkao
Jméni xi bakóyaná je choa̱le David... Nga je Jeobá xi ngisa nʼio tse nganʼio tjínle tikʼoajinni toʼya chjotani. Kʼiatsa sakʼoa nokjuin tikjaʼaitsjain jebi: Je Jeobá miyoli mani kʼoa jé koasenkaoli nga nʼiojin koai̱n.
