A tiʼyaní je tiʼndí xi faʼaitʼasí ibi. Tojé tíjna kʼoa títsokjón. A sakʼoa nokjuin ji... Ngatsʼiñá nga sakʼoa nokjoaan. Ya Biblia bʼéyanajmí tʼatsʼe choʼndale Niná xi kʼoati kitsokjon kʼoa xi tojé tjío koanle, jolani je Elías. Kataʼyala jmeni xi koanle.

Je Elías jenʼio kjoatse tsakʼejna. Kʼiaa tsakʼejna nga kjesa tsinjin je Jesús kʼoa yaa naxinandá Israel tsakʼejna. Nga kui nichxin, je rey xi tíbatéxoma ya Israel kʼoa kao je chjoónle alikui je Jeobá tsabexkón. Acab tsakʼin kʼoa je chjoónle Jezabel tsakʼin, kʼoa jé niná ndiso xi Baal ʼmi tsakʼétsʼoale. Kuinga me ngatsʼi je chjota israelita nga kʼoati je Baal tsakʼétsʼoanile. Je reina Jezabel nʼio tsʼen koan kʼoa koanmele kisikʼien ngatsʼi je chjota xi je Jeobá tsakʼétsʼoale. Kʼoa nga je Jeobá tsakʼétsʼoale Elías, kʼoati koanmele nga kisikʼien tsanda je. Jókisʼin je Elías. Jókinʼiai tsa jilani...

 Je Elías nʼio kjin kikʼejna. Yaa kikʼejna ya ʼndekixí kʼoa jngo ngijao kikʼejnaʼmangi. Ánni nga tsakʼejnaʼmasíni, jósi ngái ji... Kuinga kitsokjon. Tonga alikuini tjínnele kitsokjon tsakai. Ánni. Kuinga be nga je Jeobá koa̱nle koasenkao. Nga̱ jesa tsakasenkao. Tobʼelañá, kʼianga tsakʼétsʼoale, je Jeobá kinrʼoéle kʼoa jngo lʼí kisikasénni ya tje̱n ngʼajmi. A tsí nʼio tse nganʼio tjínle je Jeobá nga kʼoakisʼin. Jaon. Je Elías koan kisinʼiotʼa ijngokʼa je Jeobá.

Kʼianga ya tíjnangi ngijao je Elías, je Jeobá i kitsole: “Ánni nga i̱ tijnasíni”. Kʼoa je Elías i kitso: “Tjíoná tsakai je chjota xi ji bʼétsʼoali, tonga ndʼai toʼansa tijna. Kʼoa tsokjonña tsa kʼoati si̱kʼienna tsanda an”. Kʼoasʼin kisikjaʼaitsjen nga jekinikʼien ngatsʼi chjota xi je Jeobá bexkón. Tonga je Jeobá i kitsole: “Ali tsa tojijin tijnai. Ngi ñato jmi mani je chjota xi tjío xi tojo an bʼétsʼoana. Ali bijkonjin, nga̱ jngo xá tsjoale”. Jókisʼe kon je Elías kʼianga kʼoakitsole Jeobá, jósi ngái ji... Nʼiojin tsjoa koanle.

Jméni xi bakóyali jmeni xi koanle je Elías... Sakʼoajin toji tijnai koa̱nli kʼoa tsa kuinókjuinje̱. Tonga tikjaʼaitsjain nga tjínli miyo xi tsjoake Jeobá kʼoa xi kʼoati tsjoakeli tsanda ji. Kʼoa ali nichajinjin nga nʼio tse nganʼio tjínle je Jeobá kʼoa nga koasenkaoli ngantsjai. A tsí nʼio tsjoa mali nga ʼyai kʼianga koasenkaoli ngantsjai je Jeobá...