KJOAʼMIYA 9
Je Jeremías tosi tonda kinchja̱ni xi tʼatsʼe Jeobá
Ánni nga koanjtisínile chjota xi kao Jeremías
Jé Jeobá xokisʼin nga kichʼasje ya xjáonandá je Jeremías
Kʼianga nokjoakaoñá chjota xi tʼatsʼe Jeobá, tjínkʼa xi majtile kʼoa xi tobijnokená. Kʼianga kʼoasíkaoná chʼao sʼená, a tsí jaon. Tsakui nichxin i̱ bixoán: “Alikui tikuinchjaña xi tʼatsʼe Jeobá”. A jesa kʼoakisi ji... Ya Biblia bʼeyanajmí tʼatsʼe jngo chjota xi tsjoake koan je Jeobá, tonga tome tsín tikinchja̱ni tsakai xi tʼatsʼe Jeobá. Jeremías tsakʼin chjota jebi. Kataʼyala jme xi koanle.
Kʼianga sʼa xti je Jeremías, je Jeobá kʼoakitsole nga jngo én xi nʼio chjíle katafikaole chjota. Kui kʼoakuitsole nga tsín tichʼao katasʼínni. Tonga je Jeremías kitsokjon, nga̱ nʼio ñʼai koa̱nle nga koaikao én jebi. Kuinga i̱ kitsosínile je Jeobá: “Sʼaa nʼio xtia kʼoa alikui ʼbe joxínle naxinandá”. Tonga Jeobá kitsole: “Ali tsa nokjonjin, an koasenkaole”.
Xijekoan, je Jeremías i kitsole je naxinandá: “Kʼiatsa tsín si̱kʼantjaiyao je yaono, kjoañʼai kʼoaino”. A kinrʼoé je chjota... Mai, totsakijnoke je Jeremías kʼoa kʼoati tjío xi nʼio koanjtile. Saʼnda tjíokʼa xi koanmele kisikʼien. Jókisʼe kon je Jeremías, jósi ngái ji... Nʼio kitsokjon kʼoa i kitso: “A likui timenina kuinchja xi tʼatsʼe Jeobá”. A ñaki kjoaixi xi kitso. A ñaki tsín tikinchja̱ kjoaixini xi tʼatsʼe Jeobá... Je Jeremías nʼio tsjoake koan je Jeobá, tosi tonda kinchja̱ni xi tʼatsʼe. Alikui kisikinroajen kon, kʼoa kuinga kisikuindasíni Jeobá xi tʼatsʼe chjota kontrale.
Tobʼelañá, ñandia kʼianga ya kinikʼatjenya Jeremías jngo xjáonandá xi nʼio nanga kji xi tokjitia. Je Jeremías sa nanga sa nangaa ki kʼoa tsín jme nandá tjín xi skʼuí kʼoa tsín tsojmi xi ski̱ne. Je chjotatsʼen xokisikao kui xi koanmele nga katabiya je Jeremías. Tonga a kitjontjai je Jeremías. Jaon. Nga̱ je Jeobá xokisʼin nga kichʼasje ya xjáonandá jebi.
Tojosʼin kaʼyaa ibi, je Jeremías tosi tonda kinchja̱ni xi tʼatsʼe Jeobá ninga sakʼoa kitsokjon. Jméni xi bakóyali je choa̱le Jeremías... Tsakui nichxin kʼoati tjío chjota xi tokuijnokeli kʼoa xi koa̱njtile kʼianga kuinókjoakaoni xi tʼatsʼe Niná. Tsakui nichxin saʼnda koa̱nsoali kʼoa tsa kuinókjuin. Tonga tosi tonda tinókjoani xi tʼatsʼe Jeobá. Jé koasenkaoli ngantsjai tojosʼin tsakasenkao je Jeremías.
