KJOAʼMIYA 3
Je Rahab jé Jeobá kisinʼiotʼa yaole
A meli jchai jokoan ñandia ngasʼa. Tikjaʼaitsjenlai tsa ya tiyoaa ya naxinandá Jericó, jngo ʼnde xi nchja̱ni ya Canaán. Je chjota xi ya tsʼe alikui makjainle xi tʼatsʼe Jeobá. Tonga ya ʼnde jebi jngo chjoón tsakʼejna xi likui koanngóson kao chjota xi ya tsʼe. Chjoón jebi Rahab tsakʼin.
Saʼnda nga sʼa ʼndíkji je Rahab nkjín koya jmeni xi kisʼejinle xi tʼatsʼe Jeobá. Kisʼejinle josʼin tsakasenkao je naxinandá Israel nga kisikinjele je chjota kontrale. Jolani, nga je Moisés kisichjén je Jeobá nga tsakʼaonsje ya Egipto je chjota israelita. Nga kisijaoya je ndáchikon Ní nga koan jaʼatojin je naxinandá Israel. Kʼoa tokʼoakoanle nga kisʼejinle nga jeya tjíochrian je chjota israelita ya Jericó, ya ʼndele Rahab.
Jé Jeobá kisinʼiotʼa yaole Rahab kuinga tsakasenkaoni je chjota xi kichokotsenché
Kʼianga jekoannjio, jao chjota israelita jaʼasʼen ya Jericó xi kichokotsenché. Yaa kicho ya niʼyale Rahab kʼoa je Rahab kʼoakitsole nga ya katabationi. Nga tikuini nitje̱n, je rey xi tíbatéxoma ya Jericó kisʼejinle nga jao chjota kichokotsenché ya naxinandále kʼoa nga ya tjíoni ya niʼyale Rahab. Kʼoa kuinga kisikasénsíni je chjotale nga katafikásjai. Jméni xi kisʼin je Rahab. Yaa kisikatíoʼma ya sonndʼiale kʼoa i kitsole chjotale je rey: “Jekafi, tonga tsa tókatjenngilao, kuichotjenngijinlao”. Ánni nga kisikatíoʼmani je Rahab je chjota xi kichokotsenché... Kuinga ñaki koankjainle nga je Jeobá je xi ñaki Niná kʼoa be nga je koasenkao chjota israelita nga tjoéle naxinandá Canaán.
Nga kjesa bitjojin ya niʼyale Rahab je chjota xi kichokotsenché i kitsole: “Kʼianga si̱kje je naxinandá, ji kʼoa kao xíngi lijme xi koanno”. Jmé xi tjínnele kisʼin je Rahab nga kuitjontjai... Je chjota xi kichokotsenché i kitsole: “Tʼetjenbʼatʼai ya ventanali je nʼóní xokji kʼoa tikatíoxkui ngatsʼi xíngi ya niʼyali”. Je Rahab kʼoakjoán kisʼin jotsakʼinle. A meli kʼoaxínle jmeni xi koan nga koanskanni...
Je Jeobá tsakʼasjentjai je Rahab kao xínkjín
Jngo jao nichxin nga koanskanni, je chjota israelita nkjín kʼa tsakʼétinndaile Jericó. Jaon nichxin nga jngó jngó kʼa tsakʼétinndaile naxinandá, kʼoa alikui kiskiʼndáxá. Tonga xi mani ñato nichxin ñato kʼa tsakʼétinndaile kʼoa ñaki nʼio kiskiʼndáxá ngatsʼi. Kʼoa toxijña i̱ koan. Je Jeobá kisikixojen je xjáo xi kjindai ya Jericó. Tonga, jókoan je niʼyale Rahab. Nga kʼoasʼin ya tje̱nbʼatʼa je nʼóní ya ventanale, alikui kixojen. A tiʼyaní je nʼóní xi faʼaitʼasí ibi... Kʼoasʼin kitjontjaini je Rahab kao xínkjín.
A kaʼyaní nga kuinga kitjontjaini je Rahab nga kisitjosonle je Jeobá... Je Rahab bení nga je Niná sikuinda kʼoa kuinga je kisinʼiotʼani. Kʼianga kisʼeyanajmíle jmeni xi kisʼin je Jeobá, je Rahab kisinʼiotʼa je Jeobá. Kʼoati nʼio nkjín koya kjimajinli xi tʼatsʼe Jeobá. A kʼoatisʼin si̱nʼiotʼai je Jeobá jokisʼin je Rahab... Kʼoajin sʼiain, a tsí jaon.
