Tikjaʼaitsjenlai jebi: Je David ndiaa tjenya kʼoa jenʼio njio. Kʼoa nga kʼoasikji njio, likui be jñani koai kʼoa likui be jochon ya yandiaa. Tochan bele kon nga jekachaxkon je ndiaa. Kʼoa jeto xin tífi tsakai.

Jósʼiain tsa jilani je David.

Nkjín koya tjínni jokoa̱n sʼiain:

1. Koaan chjónangilai tsa ʼyani nga kʼoakatsoli josʼin kʼuín.

2. Jngo lámpara tichjain.

3. A tosi tonda kʼuín josaʼnda nga koa̱nsjaili ndiaa jñani tiʼmi.

Likuijin nda kuichotsjoá kʼiatsa kʼoasʼiain josí tso xi majanni.

Je xi majaoni tongisa nda kuichotsjoá tikʼoajinni je xi títjon. Jngo lámpara siʼisenli josʼin kʼuín kʼoa koandiaali.

Je Biblia kʼoatisʼin mangóson, koaanle koandiaali.

Je Biblia kui libro xi ngisa nʼio batse chjota kʼoa koaanle:

• Koandiaali kʼianga kjoa sʼe̱li.

• Koasenkaoli nga ngisa nda jchai jokjoain kʼoa nga ngisa nda chjota koai̱n.

• Koakoyali josʼin nga nda si̱jchái yaoli.

Kʼianga jemaná nokjoaa, tojmeni xi chjonangiaa:

• Ánni nga kʼoasʼin tsensíni ngʼajmi.

• Jméni xi koanndani je niño.

Kʼoati chjonangiaa nga maskanni tʼatsʼe jmeni xi chon i̱ Sonʼnde:

• Ánni nga kui kjoa xi chʼaotjín bitjatojinsíñá.

• Ánni nga biyasíñá.

A ʼyaní nga ya Biblia bakóya xi tʼatsʼe jebi.

Nʼio nkjín chjota xi kʼoatso nga to én kʼoa nga toxokʼoatjín jmeni xi tso je Biblia, kʼoa tsa maije̱ kʼoatso nga tsín timachjénni kʼoa nga nʼio ñʼai tjín nga koa̱njinná. Tonga, a kʼoatjín jmeni xi tso je chjota xi tʼatsʼe Biblia. A tsín ñaki nda tjíojinle tsokʼoa.

Tobʼelañá, je chjota kʼoasʼin makjainle nga je Niná kjinentsja Sonʼnde. Tonga, a kjoaixi. Je sonʼnde jebi nʼio chʼao chon. Ngakjijnda tokjoaʼaon tjín kao kjoañʼai, chʼin kao kjoabiya, ma̱a tinijchá yaoná kʼoa tífeson Sonʼnde. A koa̱n kon kʼoasʼin jngo Niná xi tsjoakená.

A meli jchai ʼyani xi tíbatéxoma i̱ sonʼnde. Tokʼoajin koa̱nli jmeni xi tso je Biblia xi tʼatsʼe jebi.

A kaʼyaní nga ya Biblia yʼangini je kjoafaʼaitsjen xi faʼaitʼa foyeto jebi. Jin xi testigole Jeobá maijin ñaki tjíojngo tokuinjin nga je Biblia male bándiaaná kʼoa koaan si̱nʼiotʼaa nga̱ tʼatsʼe “Niná jinroani, kʼoa kjaínga nda machjén nga bakóyaná, nga nchja̱tikaoná, nga sichoyandaná” (2 Timoteo 3:16, 17). Ningalani jenʼio kjoatse kijna je Biblia tojo machjén je kjoafaʼaitsjen xi faʼaitʼa, jisoa kataʼyai jmeni xi tso.