Je chjota xi tsabetaon je Annette saʼnda tsín tsabe nga kisikʼatjenjinʼnde, kʼoa itso: “Kisitajakaoña jokji tjen kʼoakoanna. Kiskiʼndíaxáña tsakai tonga likui tikinroajtaña. Kitsjontsjáña, kitsjonle, kisijtsinle kʼoa tsakʼexʼíle. . . kʼoa jngo ki̱cha̱ tsakʼéna. Kʼianga jekʼoakisikaona, kichangana kʼoa alikui tikoan kisitoánntjaiña yaona”.

Jósʼiain tsa jilani xi kʼoakjimatʼain.

Ninga si̱kuindai yaoli, tobʼelañá, tsa njio bitomjai ali ñá tjínjinná tsa jme xi koa̱ntʼain. Je Biblia kʼoatso kʼianga je xi nʼio toka sakʼoa likui je njele kʼoa je xi nʼio chjine alikui toje beyeje josʼín “nga̱ je nichxin kʼoa xi tsín choyalee faʼaine ngatsʼi chjota” (Eclesiastés 9:11).

Je chjota xi tsabetaon je Annette alikui bexkon. Sakʼoaa je chjota xi kʼoasʼín tijeni xi ya chrian tjío jñani tsaan kʼoa tsa xi saʼnda familianá mani. Je Noelia tosʼa te nóle kʼianga jngo ti xi tiyani jñani tsʼe tsabetaon. Je Noelia itso: “Nʼio kitsokjoan kʼoa koansoana, nga títjon aliʼya xi jokixinle nga kʼoakoantʼen”.

Je Annette tojo je báne jée yaole jmeni xi koantʼain. Itso: “Ngotjo ngosá faʼaitsjennina jmeni xi koantʼen nga kʼia, kʼoa sakʼoaa kʼoasʼin sikjaʼaitsjen nga koanni ngisa nda kisitoánntje yaona tsakai. Ñaki kichanga kjoaixina kʼianga jekisatena ki̱cha̱, tonga tojo kʼoasʼin sikjaʼaitsjen nga koanni jokisʼian tsakai nga kisitoánntje yaona”.

Je Noelia kʼoati je báne jée yaole jmeni xi koantʼain. Itso: “Alikuijinni toʼan tsakʼa yaona tsakai. Je xijchána tokʼiaa tsjoáʼndenajin nga ya nitsin niskáijin kʼianga ya ñatjen tiyuijin kao tichja, tonga alikui kisitjosonle, kuijin nga to kisʼinni xále je chjotandaindʼiana. Nʼio jaʼákon je familiana kʼoa an kisʼena jée nga kʼoasʼin jaʼákon. Kui xi ngisa nʼio aon bʼé tokoan”.

Kʼiatsa kʼoati tjín tokuin jotjío kon je Annette kao Noelia. Kʼianga jngo xi nikaojée ali tsa jejin xi kʼoasʼin kamamele. Tonga tjínkʼa chjota xi kʼoatso nga je kasʼele jée je xokamatʼain. Tonga nijngojinla xi mele nga kui kjoa kjoaʼatojin. Kʼiatsa ji xi jekʼoakoantʼain, ñaki tʼejngui tokuin kʼianga tsín tsa ji kisʼeli jée.

Ngotjoni nga tonokjoaa tonga nga jekui kjoa kabitjatojiaan nʼio ñʼai tíjna. Tjínkʼa xíngiaa xi jekui kjoa jaʼatojin xi toje bʼéjinkon jmeni xi koantʼain kʼoa toje bané jée yaole kʼoa síkinroajen kon. ʼYáni xi koasenkao tsa tojyó kuijnai. A jiní axo je chjota xokisikaoli. A tsín ngisa ndani tsa si̱jái nganʼio.

Je Biblia kʼoatso tʼatsʼe jngo chjota xi tse kjoañʼai tsakjaʼá xi Job tsakʼin. Itso: “Ñaki kao kjoaʼaon kuinchja” (Job 10:1). Tsakui nichxin ngisa nda nga kʼoati sʼiain. Nga kʼoéyanajmílai je chjota xi nʼiotʼai jmeni xi koantʼain kui xi koasenkaoli nga tsín ji kjoánai jée yaoli kʼoa ngisaa nda sʼe̱ tokuin.

Je Annette kʼoakisʼin kʼoa tsakasenkao. Itso: “Jngo tsoti miyona tsakjakaonajmía kʼoa kʼoakitsona nga tosa xínyale je xi chjotajchínga sʼin tjío ya jinjtín. Nʼio tsjoa mana nga kʼoakisʼian. Nkjín kʼa tsakjákaonajmína kʼoa kui kʼoakitsona jmeni xi tsakasenkaona. Nga tsín an kisʼena jée nga kʼoakoantʼen”.

Je Noelia tsakʼéyanajmíle je xijchále jmeni xi koantʼain kʼoa itso: “Nʼio tsakinyakaona. Kʼoakitsona nga koa̱n kuinchjaña jmeni xi koantʼen kʼoa kui xi tsakasenkaona nga tsín nʼio kisijtile yaona kʼoa nga tsín nʼio ba koanna”.

Kʼoati nʼio kitsjoanganʼiole nga tsakʼétsʼoa. Je Noelia itso: “Kʼianga tsakjakoa je Niná tsakasenkaona, kʼoa ngisaa kʼianga kʼoakisʼe tokoan nga tsín ʼya xi koa̱n kʼoeyanajmíle. Kʼianga bʼetsʼoa, ma kʼoaxinle Niná jotjín tokoan, kʼoa ñaki nyʼán sʼe tokoan”.

Kʼoati bichó nichxin nga channi chajinná (Eclesiastés 3:3). Tikuindai yaoli nga tsín chʼin katakatʼali kʼoa nga nda katasʼe tokuin kʼoa nda tikjáyai. Tonga je xi ngisa nʼio chjíle kuinga je Jeobá tinʼiotʼai, je Niná xi sínʼio tokoán (2 Corintios 1:3, 4).

Kʼiatsa je xi titomjekoai kʼoakuitsoli nga sójnakoai. Nʼiojin katamai kʼoa i̱ tʼinlai: “Ali kʼoajin nikaonái. Chja̱ʼaxin ndsai”. Ali tokuijin ʼmini tsa sikʼéjnali. Kʼiatsa kʼoasʼin, alikuini ñaki tsjoakeli. Je xi machjénli jéní xi skoe̱xkónli kʼoa xi skoe̱xkón kjoafaʼaitsjenli.

“Kʼianga sʼa 13 kʼoa tsa 14 nóna, je xtixʼin xi ñatjen kia skuela jto̱n yándsʼiaan tsakʼéʼndó je brasiena kʼoa énchi̱nga̱ tsakjákaona kitso: Jchalaxóni nga koa̱ntsjoachani kʼianga jekʼoasi̱koaa xíngiaa” (Coretta).

A síní nga xti jebi. . .

1. . . . nga totjíosíská.

2. . . . nga tosi tjíosíkao.

3. . . . nga mele kjoáyokao.

“Ya yakarro, jngo ti xi énchi̱nga̱ tsakjákaona kʼoa xi kiskajonna. Kisijtsinle kʼoa kʼoakixinle nga katabitjoxin. Kiskotsenʼana kʼoa to tsotiská sʼin tsabekonna” (Candice).

A síní nga ti jebi. . .

1. . . . nga totísíská.

2. . . . nga tosi tísíkao.

3. . . . nga mele koájnakao.

“Jngo ti xi jngo nó si kisikaona nga tsjoakena kʼoa nga jemele kʼoamjekoa kitsona. Kʼoakixinle nga mai. Sakʼoaa kajon je xjana. Kʼoaxinle nga tsín kʼoakatasíkaona kʼoa tosi tonda kʼoasʼín. Ñandia kʼianga jténa tibʼenʼiosoan kichosíjtsintʼa tondsʼian” (Bethany).

A síní nga ti jebi. . .

1. . . . nga totísíská.

2. . . . nga tosi tísíkao.

3. . . . nga mele koájnakao.

Nga jan koya kjoa jebi kuiní nga mele koájnakao.

Jméni xi tsín mangóson nga jan koya jebi. ʼYani xi mele nga tjín xi koájnakao, xi to si tísíkao tsa ʼyani kʼoa kao xi to tísíská.

ʼYani xi énchi̱nga̱ nokjoakao kʼoa xi chajon chʼao satío kon. Kʼoa ninga sítoánntjai yaole xokjimatʼain alikui jyó bʼejna je xotísʼín.

Ali tsa tokjoaniskájin tjenkao kjoa jebi. Chaan nikaotaon je xomatʼain.