Tikjaʼaitsjenlai jebi: Jemixkue kʼoa jekoanxon. Je Geoffrey xi 17 nóle, jekamajngole tareale kʼoa mele sikjáya ngotjo. Bʼétʼaʼíle telebisiónle kʼoa yaa fikʼejnason sillónle.

Kʼoa xijema kʼiaa faʼai je nʼaile kʼoa jtile.

Kʼiatsa jilani Geoffrey, jókinʼiai nga tsínkui kjoa kisʼeli.

Kʼiatsa karrola tinixákoai kʼoa tíchjoa je ndiaa kjaʼaí ndiaajin chjóai. Kʼoakjoánti tjínni, koaan kjaʼaísʼin kjoásjailai nga koa̱n chja̱kaonajmí je xijcháli.

 TOBʼELAÑÁ:

Je Leah itso: “Nʼio ñʼai mana nga fakaonajmía je nʼaina. Kʼianga jengotjo tifakaonajmía, itsona: An, jmélanáni xi tiʼminái”.

JAN KOYA XI TSAKUI NICHXIN SʼIN JE LEAH

1. Kʼoesonxákao pale.

   Je Leah bʼésonxákao kʼoa itsole: “Tinóʼyalanái nga̱ nʼio tjínle kjoandosin xi tixinle”.

2. Tosa tsín tijo kuitsonile.

   Je Leah alikui tibʼeyanajmínile je nʼaile jmeni xi kuitsole tsakai.

3. Tosa skan kʼoakuitsole.

   Je Leah tosa maskanni fákao je nʼaile kʼoa tsa maije̱ jngo karta kjile nga kʼoatsole je kjoa xi tíjnajin.

Jméni xi meli ji nga katasʼín je Leah.

TIKJAʼAITSJENLAI JEBI: Je nʼaile je Leah kjaʼaí kjoala tísíkjaʼaitsjen kʼoa alikui jme xi kjimachoyale. Kʼiatsa kui kʼoakuitso je Leah je xi títjon kʼoa skíʼndáxákao, tochale tsín koa̱njinle je nʼaile anni nga kʼoatísʼínsíni. Tochale tsín kjuinrʼoéle je nʼaile je Leah. Kʼoa tsa kʼoasʼin kʼoajin titsín tíbexkón je nʼaile (Efesios 6:2). Alikuijin koasenkao nga jao kʼiatsa kui skoéjin je xi títjon.

Ninga ngisa choa ñʼai tíjna je xi majaoni, tonga kʼoati tsín ndatjín. Ánni. Kʼiatsa mele kʼoendajin je kjoale Leah, tjínnele nga kjoakaonajmí je nʼaile. Kʼoa je nʼaile tjínnele nga skoe̱ jmeni xi kjimale je Leah ánni nga koa̱n koasenkaosíni. Tsa tsín jokuitsole, jósʼin koasenkaoni.

Tonga tsa kʼoasʼin je Leah jotso je xi majanni, alikui totjín totjen xi kʼoechjoale nga kjaonajmí. Tosaa kjaʼaí nichxin fákaonajmí je nʼaile. Tsa jngo karta skíle je nʼaile, tsakui nichxin ngisa nda sʼe̱ kon je Leah.

Kʼiatsa jngo karta skíle je nʼaile kui xi koasenkao nga nda kʼoeyanajmíle jmeni xi mele kuitsole. Kʼianga jekʼoexkia je nʼaile, ngisa nda koa̱nchoyale jmeni xi kjimale je Leah. Tsakui skoéjin xi majanni, koasenkao je Leah kʼoa kao nʼaile. Ninga kjoakao nga̱ʼa nga̱ʼa xínkjín kʼoa ninga to karta skíle kʼoa kui tjíofitjenngi kjoafaʼaitsjen xi tsjoá Biblia kʼianga i̱ tso: “Kʼoasʼin kjuintjenngilee kjoa xi síkinjenyʼánjinná” (Romanos 14:19).

Jmésani xi koa̱n sʼin je Leah.

Tikjaʼaitsjain jmesa xi fiya jkui xi koa̱n sʼin je Leah, chjítʼai ibi. Kʼoati tikjaʼaitsjain josʼin kuichotsjoá.

Tikjaʼaitsjain: jmeni xi si, sakʼoaa kjaʼaísʼin majinle je xijcháli.

TOBʼELAÑÁ:

Tsakui skónangili je xijcháli ánni nga totsʼe tjínnili. Kʼoa i̱ kʼuínlai: “Likui mena nga kʼoaxinno”.

Tonga tochale i̱sʼin koa̱njinle: “Jmé xi je bʼakaole títsolaná. Tosala toje xti miyole kʼoakuitsole je kjoa xi tjínle”.

Cha̱niyalai jkui kʼiatsa nʼio ñʼai tjín kjoa tibitjatojin kʼoa mele koasenkaoli tsa pali kʼoa tsa mali, tonga ji i̱si: “Alikuijin nikjáojion, an xi ʼbeña josʼian”.

• Jósʼin koa̱njinle je xijcháli.

• Jósí nga tsín chʼaosʼin koa̱njinle.