Tikjaʼaitsjenlai jebi: Je Karen jete minuto tíjna ya jña sʼuí tíbitjo kʼoa toʼima jngo tsoti xi bexkon bichójton yátsʼi̱n kʼoa i tsole:

Kʼoa nga síkʼófaya be nga jeni tsoti miyole xi Jessica ʼmi kʼoa jao cerveza yʼatonntsja. Jngo tsjoále kʼoa i tsole: “Ali tisʼajin ʼndíni, chjoai kʼoa kʼoétsaojin ngotjoá”.

Je Karen alikui mele nga cerveza skʼuí nga̱ sʼa choa nóle, tonga kʼoati tsín mele nga kʼoasʼin katasíkjaʼaitsjen je tsoti miyole nga tsín tsjoakjoa. Kʼoa je Jessica alikui kʼoasʼín josʼín xtiyánchjín xi kjaʼaí, kʼiatsa ʼbi je alikui jme xi chʼaotjín. Je Karen isʼin síkjaʼaitsjen: “Lijmela xi koa̱nle nga to jngo cerveza. Nga̱ tsín tsa drogajin”.

Jósʼiain tsa jilani je Karen.

Kʼianga nda chjoéjin josʼiain kʼiatsa kui kjoa tibitjatojin joni xi jekanikʼaxkiaa, machjén nga kataʼyai ʼyá chjotani ji, xi tsonile, nga kataʼyai jokjoain kʼoa kao jmeni xi makjainli. Kʼianga jchai jebi koasenkaoli kʼoa tsjoánganʼioli nga jisoa chjoéjin jmeni xi sʼiain ʼndele nga kjaʼaí xi kʼoakuitsoli (1 Corintios 9:26, 27).

Xi koasenkaoli nga jchai jebi, ñola kjoachjonangi kataʼyaa.

Kʼiatsa ʼyai jme xi mali nʼiai kʼoa jokjoain, alikui jao sʼe̱ tokuin.

CHOA̱ XI FAʼAITʼA BIBLIA: Je pastro Pablo itso én xi kiski: “Nda tsa tsín tojo nda nchja, tonga lijme kjoachjine xi chana” (2 Corintios 11:6). Nʼio nda tsabe jmeni xi tso je Énle Niná kʼoa kui xi tsakasenkao nga kixi koan ninga chʼao tsakʼinle. Alikui kitsjoaʼnde nga kui kisikinroajen kon jmeni xi kitsole chjota (2 Corintios 10:10; 11:5).

TIKJAʼAITSJENJIN JEBI: Jméni xi mali nʼiai.

Kʼoa ndʼaibi kui tikjaʼaitsjain jokjoain (tobʼelañá, a nda chjotai, a ndʼéní kʼoa a beli chjota nga nitjosuin tsa jmeni).

Joni tsa jngo cadena ngotjo tjojtsoni kʼianga tsín taja jñani tjíokjaoni, kʼiatsa tokui kʼuínni jmeni xi ñʼai mali, ngotjo jchajinnili jokjoain.

CHOA̱ XI FAʼAITʼA BIBLIA: Je Pablo tsabee jmeni xi ñʼai koanle. Kʼoa i kitso: “Tjínna kjoatsjoa xi tʼatsʼe kjoatéxomale Niná, josʼin tjín ni̱ma̱na. Tonga ʼbe ngijngo kjoatéxoma i̱jin ngayije jko̱yale yaona xi kjánkao je kjoatéxoma xi tsʼe kjoafaʼaitsjenna. Jébi xi síkʼéjnatʼanʼiona je kjoatéxoma xi tsʼe jée xi tíjnajin ngayije jko̱yale yaona” (Romanos 7:22, 23).

TIKJAʼAITSJENJIN JEBI: Jméni xi meli nga katamandayai jokjoain.

Tikjaʼaitsjenlai, a koaan tokuin kʼoakʼuínlai jngo chjota xi taxi síxákao nga ya katabʼétinndaikaoli ya niʼyali saʼnda nga kjoe̱ gasolinale karro. Maijin. Kʼoa nʼiojin chjí sʼe̱ngili tsa kʼoasʼiain.

Jmé xi bakóyaná choa̱ jebi. Kʼiatsa ʼyai jñani tiʼmi, alikuijin tokjoatjao kuijnayalai je taxi. Kʼoatisʼinni, kʼiatsa ʼyai jmeni xi meli kuichotjenngi jchaní josʼiain.

CHOA̱ XI FAʼAITʼA BIBLIA: Je Pablo i kitso: “Tsín tokjoatjaojin josʼin nga titoka” (1 Corintios 9:26, TNM). ʼNdele nga totsakʼéjngo kon je Pablo josʼin tíjna, tosa tsakʼéndajin jme xi mele kuichotjenngi kʼoa tsakʼénele yaole josaʼnda nga kichotjenngi (Filipenses 3:12-14).

TIKJAʼAITSJENJIN JEBI: Jan koya jmeni xi meli kuichotjenngi nó jebi.

Kʼiatsa tsín ʼyai jmeni xi makjainli, jaojin sʼe̱ tokuin. Ngotjo ngosájin si̱kʼantjaiyani jokjoain, tojo sʼín je cho̱ xi camaleón ʼmi nga ngotjo ngosá síkʼantjaiyani colorle kʼoa nga kʼoasʼin sítsen yaole josʼin tsen jñani bichó. Je xi kʼoasʼín alikui be jokjoan kʼoa alikui be jmeni xi makjainle.

Tonga tsa tjínjngo tokuin kʼoa ʼyai jokjoain, likuijin kui kʼuínni josʼín je xi ngikʼa.

CHOA̱ XI FAʼAITʼA BIBLIA: Tsakui nichxin sʼa nʼio xti je Daniel kʼianga kinikaséntʼaxinle je xijchále. Ninga kʼoalani “ñaki kʼoatsakʼé ni̱ma̱le” nga sitjoson je kjoatéxomale Niná (Daniel 1:8). Je Daniel alikui kisichajin jokjoan kʼoa kui kʼoakisʼin jmeni xi makjainle.

TIKJAʼAITSJENJIN JEBI: Jmé xi makjainli. Tobʼelañá, a makjainli tʼatsʼe Niná. Ánni nga kʼoasʼin makjainnili. Jméni xi bʼéjngo tokuin nga tíjna Niná.

A ʼyaní tsa basenkaoli je kjoatéxomale Niná. Kʼoa ánni.

Jméni xi meli koa̱nngósuin, a jngoo xka̱ xi fitjenkao ntjao̱ axo jngoo yá xi tsín jme xi male ninga ntjao̱nʼio faʼane. Kʼiatsa meli nga kʼoasʼin koa̱nngósuin joni jngo yá, kʼoasʼin tʼinkoai yaoli jokjoain kʼoa kao jmeni xi makjainli. Kʼiatsa kʼoasʼiain koasenkaoli kʼianga kui chjonangilai yaoli jebi: Jósʼin skoeña jokjoan.