Tikjaʼaitsjenlai jebi: Je Heather kao Mike jejao sá nga tjíotsomakao xínkjín, tonga je Heather joxi jekjoatse tjíokao xínkjín male. Bʼajnda nichxin síkasénle mensaje xínkjín kʼoa nchjaale teléfono xínkjín. Kʼoa saʼnda jebe jmeni xi kuitso xi ijngo nga kjesa síkjetʼajin énle. Tonga ndʼaibi, je Mike ali tsa tokuijin xi mele nga tokuinchja̱najmí.

Jokji tse tjíotsomakao xínkjín je Mike kao Heather, sʼaa to ntsja tsoa xínkjín kʼoa sakʼoaa bʼéndsoʼa xínkjín. Je Heather alikui mele nga tjín xi sʼin, tonga kʼoati tsín mele nga sikʼéjna je ti xi tsoʼbakao. Aliʼya xi kʼoanaskátsole kʼoa xi nʼio chjí bekon joni tsa ti jebi. Je Heather isʼin síkjaʼaitsjen: “Jmé xi koa̱nle nga̱ tsjoachaníjin xíngijin”.

Kʼiatsa jekiskason nóli nga ʼya xi kuitómjekoai kʼoa tsakui kjoa tijnajin joni tsa Heather, jméni xi sʼiain.

Jméni xi koa̱n kʼiatsa to kuitjákaosénndiai je karroli kʼianga jení kasʼe je lʼíle semáforo. Kʼianga jngo kjoatéxoma kabitjatonai, nʼio tse kjoa kuichomani. Kʼoati koa̱n tsa kuitjátonai kjoatéxomale Niná, tsa kjoachajngi sʼiain kʼoa tjín xi sójnakoai nga kjesa bixanjin (1 Tesalonicenses 4:3).

Jósʼin kuichomani tsa kuitjátonai kjoatéxoma jebi. Je Biblia itso: “Je xi síchajngi, bajngi jée xi titʼatsʼeni yaole” (1 Corintios 6:18). Jósʼin tínchja̱ni én jebi.

 Je chjotachjine kʼoatso nga nʼio nkjín je xti xi tjín xi tsakjayokao nga kjesa bixanjin nga kui kjoa jebi tjíofaʼatojin:

• CHʼAO SʼE KJOAFAʼAITSJENLE. Nʼio nkjín je xti xi tokʼoa jetjín xi tsakjayokao nga kjesa bixanjin kʼoa kʼoatso nga sʼani kʼoamale jmeni xi kisʼin.

• LIKUI TISʼENILE KJOANʼIOTʼA. Kʼianga jefayokao xínkjín, tjínkʼa xi kʼoatso nga tsín ʼyaa ʼyásani xi sa jetsakajnakao chjota jebi.

• KJOABA BATIOJIN. Nkjín je xtiyánchjín xi kʼoatjío kon nga mele nga koa̱nkuinda ʼndele nga tokʼoa sikao je chjota josʼin mele. Kʼoati nkjín xtixʼin xi tsín sasénle je xtiyánchjín xi totsjoáʼndekjite jomatʼain.

• Xi tofetʼani: Kʼiatsa tjín xi sójnakoai nga kjesa bixanjin, to yaoli tiniskákoai nga tsín tiʼyachjí (Romanos 1:24). Je yaoli nʼio chjíle ali toniskákaojin.

Nʼiojin katamai aliʼyajin xi sojnakoai nga kjesa bixanjin (1 Tesalonicenses 4:3). Kʼianga jekuixain jekoa̱n sójnakoai je chjoónli kʼoa je xʼinli. Kʼoa nga siñakon xíngio alikui chʼao satío tokon, alikui jme xi ni̱kjáojion, alikui kʼoasʼe̱ tokon josatío kon je chjota xi tongini fayokao xínkjín nga kjesa bixanjin (Proverbios 7:22, 23; 1 Corintios 7:3).

• Kʼiatsa tjín xi tsjoakeli, a tsíkui xi mele nga tsín yaoli si̱kitsuín kʼoa nga nda katasʼe kjoafaʼaitsjenli.

• Kʼoa tsa tjín xi mandosinle xi tʼatsi, a kui kʼoakuitsoli nga kui kʼoasʼiain jmeni xi tsín nda sikʼéjnali ngixko̱n Niná (Hebreos 13:4).