KʼIANGA sa koannkjín sa koannkjín chjota i̱ Sonʼnde, kʼoati sa koantse sa koantse je kjoatsʼen kʼoa kao je jée. Je Enoc tʼatsʼe Jeobá kinchjaya kʼoa tsakui nichxin toje xi choʼndale Niná koan nga kʼia. Je Enoc tongini kʼoakitso nga ni̱kjeson je chjotatsʼen. Tonga tojtaya kisʼin je chjota kʼoa ngisa tsʼen koan. Kʼoa li tsa tokuijin xi koan, tjío kʼa ánkje xi yátsʼi̱n tsakinyále Jeobá, kisikatío xále ya ngʼajmi, chjota kisikʼóya yaole kʼoa chixankao tojo tjín yánchjín koanmele. Kʼianga kʼoasʼin yánchjín tsakatiokao tosíxkón koankjoan yʼai je xtile kʼoa toxkia tse nganʼio kisʼele, nefilim tsakʼin. Chjota xokjoan to kjoatsʼen tsakájnakitse Sonʼnde. ¡Nʼiojin aon koanle Niná kʼianga kʼoakisʼin je ánkjele kʼoa kao chjota xi kisinda!

Kʼianga je kʼien Enoc, ijngo chjota tsakʼejna xi kʼoati nda chjota koan. Jé Noé. Chjota jebi kʼoa kao yaniʼyale tsakʼénele yaole nga kui kʼoakisʼin xi ndatjín ngixko̱n Niná. Kicho nichxin kʼianga kʼoatsakʼé kon Jeobá nga kao jtsínʼio sikjesonni je chjotatsʼen. Tonga likui koanmele nga kʼoati ya kjoeson je cho̱ kʼoa kao Noé. Kuinga kʼoakitsosínile nga jngo kaxa̱ xi nʼio je kji katasínda jñani koa̱n koatioʼya jé kʼoa kao yaniʼyale kʼoa nga sikʼasʼen jotjín koya cho̱ tjín. Je Noé kisitjosonle Niná kʼoa ñachanla kʼoa tsa ñachante nó koanjngonile kaxa̱ jebi. Kʼianga tíbʼénda kaxa̱ “kinchjaya [kaoni je] kjoakixi” xi tsʼe Niná (2 Pedro 2:5). Tsakájinkon chjota nga jngo Jtsínʼio kjoaʼaí, tonga liʼya xi tsakʼaʼénle. Chan kicho nichxin nga jaʼasʼen Noé kao yaniʼyale kʼoa kao cho̱ ya kaxa̱. Xijekoan, tsakʼéchjoa Niná je xo̱ntjoale kaxa̱, kʼoa tsakʼa jtsí.

Je jtsíxkón xi ñachan nichxin ñachan nitje̱n tsakʼa kisitsendá ngakjijnda Sonʼnde. Ni ijngojin chjotatsʼen titsʼangini. Nga je ki sá, jaʼajen je nandá kʼoa je kaxa̱ jngo nindo kichosʼejnason. Je Noé kao yaniʼyale jngo nó tsakatioʼya ya kaxa̱. Kʼianga je kitjo kitsjoale kjoanda Jeobá, cho̱ tsakakále. Je Niná kʼoakitsole nga nikʼiajinla tijtsínʼio sikasénni nga sikjeson ngatsʼi xi tjíokon i̱ Sonʼnde kʼoa jngo ʼya̱ kisikasénjna kʼianga kitsjoa énle. Kʼoa nga skoe̱ chjota je ʼya̱, kjoaʼaítsjenle jme xi kitso Niná.

Nga je jaʼato Jtsínʼio, kjaʼaí kjoatéxoma kitsjoasa Niná. Kʼoakitso nga koa̱n chi̱ne yaole cho̱, tonga mai je njínle. Kʼoati kitso nga katamangaba chjota jngo tjíjtsa Sonʼnde. Tonga tjínkʼa chjota xi tsakatiochjoa jokitso Niná, jngo naxinandá kisʼin yaole kʼoa jngo xjáongʼa tsakʼénda. Kʼoa je tsakasentítjonle xi Nemrod tsakʼin. Tonga likui kitsjoaʼndele Niná. Jmé xi kisʼin Niná. Toxijña kisikʼantjaiya én xi male chjota. Kʼoa naxinandá jebi Babel tsakʼin, kʼoa nga koanskanni Babilonia tsakʼin. Kʼoa nga tsín tikoanjinnile jokitsole xínkjín likui titsakʼéndani xjáongʼa jebi kʼoa tosa totsangaba.

(Yaa yʼangini Génesis kapítulo 6 saʼnda 11 kao Judas 14, 15.)