KʼIANGA tsakatio je rey xi tsakatéxomale je xi te ntje̱ kʼoa kao xi jao ntje̱le naxinandá Israel nʼio kisʼe je chjota xi tʼatsʼe Niná kinchjaya. Ngatsʼi chjota jebi tse kjoanʼiojin kʼoa tse kjoamakjain koanchjénle nga kikájinkon chjota je énle Niná. Je én xi kinchja kui tʼatsʼe jebi:

1. Nga kuichonikje Jerusalén. Je chjota xi kinchjaya tʼatsʼe Niná joni tsa Isaías kao Jeremías nʼio nkjín nó tongini kʼoakitso nga ni̱kjeson Jerusalén kʼoa nga tsín tiʼya chjota sʼe̱ni. Kʼoati tsakʼéyanajmí ánni nga koanjtinile Niná xi kao naxinandá Jerusalén. Ninga kʼoakitso nga naxinandále Jeobá ma tijé xále tsakakóni nga mai. Kui kʼoakisʼin josʼín je relijión ndiso kʼoa jme xi tsín kixi tíjna kʼoa nʼio tsʼen koan (2 Reyes 21:10-15; Isaías 3:1-8, 16-26; Jeremías 2:1–3:13).

2. Nga kʼoasʼin jchaxkón ijngokʼani Niná josʼin mele. Je chjota xi kinchjaya tʼatsʼe Niná kʼoakitso nga je naxinandále Niná koai ijngokʼani ya ʼndele kʼianga je kuicho jankan kao te nó nga tjíonʼio ya Babilonia, nga kʼoendayani yo̱ngo̱ Jerusalén kʼoa nga ijngokʼa toje Jeobá skoe̱xkónni (Jeremías 46:27; Amós 9:13-15). Kʼoa je Isaías jao siento nó tongini kʼoakitso kʼianga Ciro ʼmi je xi skoé Babilonia kʼoa xi sikatíondaí je naxinandále Niná. Saʼnda kʼoakitso josʼin je Ciro kʼianga tjoéle Babilonia (Isaías 44:24–45:3).

3. Xi tʼatsʼe je Mesías. Je xi kinchjaya tʼatsʼe Niná kʼoakitso nga ya naxinandá Belén jtsín je Mesías (Miqueas 5:2). Kʼoati kitso nga nangitokon koa̱n kʼoa nga jngo búrró tíjnasonle nga kjoaʼasʼen ya Jerusalén (Zacarías 9:9). Kʼoakitso nga ninga tjao skoe̱ je chjota nʼio nkjín xi kʼoasʼin kʼoasjengi (Isaías 42:1-3; 53:1, 3). Kʼoa nga tse kjoañʼai kjoaʼa nga ni̱kʼien. Tonga a kui xi tsonile jebi nga toya jchajin je Mesías. Mai. Je xi kinchjaya tʼatsʼe Niná kʼoati kitso nga kjoaʼáyanile, kʼoa nga kao kui kjoabʼechjíntjaile jchatʼanile jéele chjota (Isaías 53:4, 5, 9-12).

4. Nga koatexomason je Mesías i̱ Sonʼnde. Je chjotasonʼnde alikui male nda batéxoma nga chjotajéení, tonga je Mesías koaanle. Kʼoa je Biblia Chjotatítjonle Kjoanyʼán tsole (Isaías 9:6, 7; Jeremías 10:23). Kʼianga koatexomason i̱ Sonʼnde, sʼee kjoanyʼán ngakjijnda kʼoa saʼnda nyʼán koatiokao xínkjín je cho̱ kao chjota (Isaías 11:3-7). Tjóxin tojme chʼin xi tjín (Isaías 33:24). Aliʼya xi tikuiyáni (Isaías 25:8). Kʼoa nkjín miyón chjota kjoaʼáyanile (Daniel 12:13).

(Yaa yʼangini Isaías, Jeremías, Daniel, Amós, Miqueas kao Zacarías.)