JE Jesús tokʼoa je kʼoakitsole je chjotale nga kuichokjetʼa xi chon sonʼnde kʼoa nga koanskanni kʼoati kitsole nga kuichonikje yo̱ngo̱ xi tíjna Jerusalén (Mateo 13:40, 49). Xijekoan, kʼianga tíjna Jesús ya nindo xi Olivos ʼmi, jña matsentʼani Jerusalén kʼoa kao yo̱ngo̱le, ño pastrole kichokonle kʼoa kiskonangile tʼatsʼe én xi kinchja, kitsole: “Kʼiáni kʼoakoa̱n kjoa jebi, kʼoa jmé choa̱ xi koako nga je tijnai kʼoa nga je kuichokjetʼa xi chon sonʼnde.” (Mateo 24:3, NM.)

Je Jesús kʼoakitsole je pastrole jmeni xi koa̱n nga kjesa fichónikjejin Jerusalén kʼoa kao yo̱ngo̱le. Tonga je én xi kinchja tsesa xi tínchjani, tínchjani jmeni xi kjima ndʼaibi jngo tjíjtsa Sonʼnde. Je Jesús nkjín koya kjoa kisikʼaxki̱ xi ñatje̱n kʼoakoa̱n i̱ Sonʼnde. Ngayeje kjoa jebi kui choa̱ xi bakóná nga je Rey sʼin kisikʼéjna Jeobá je Jesús ya ngʼajmi. Rey jebi jeme kjoaʼaxin kjoatsʼen xi tjín kʼoa kjoanyʼán kjoaʼaíkao i̱ tʼanangi. Je kjoa xi kisikʼaxki̱ Jesús kui bakó nga je tífikjetʼa jme xi chon sonʼnde, jolani je kjoa polítika, je relijión kʼoa kao josʼin tjíofikao yaole chjota, kʼoa nga je koaitsʼia je sonʼnde chjotsele Niná.

Je Jesús kʼoakitso nga sʼe̱ kjoajchán, kjinrá, cháonnʼio kʼoa kao chʼinʼbi jngo tjíjtsa Sonʼnde kʼianga je koatexoma ya ngʼajmi. Kʼoa nga likui tiskoe̱xkónni kjoatéxoma je chjota. Xi ijngosani, kʼoati kitso nga je xi ñaki chjotale ma, kuitsoyason ngakjijnda naxinandá je énnda chjotse xi tʼatsʼe Rey xi kiskoejin Niná. Kʼoa xi tokjoetʼani choa̱ jebi, jngo kjoañʼai xi nʼio tse sʼe̱ xi nisañandiajin kʼoama (Mateo 24:21).

Jósʼin skoe̱ni je chjotale Cristo nga je machrianle je kjoañʼai xi nʼio tse. Je Jesús i̱ kitsole chjotale: “Chótsenlao yá higobe” (Lucas 21:29). Kʼianga je nroale xka̱ jngo yá higo, je chjota bení nga je machrianle cha̱njtsí. Tikʼoasʼinni, kʼianga je kʼoakjima ngayeje jmeni xi kitso Jesús kʼoasʼin jchanile nga je machrianle nga kjoetʼa xi chon sonʼnde. Tonga je Jesús kʼoakitso nga tojé Nʼaile xi be jmé nichxinni kʼoa jmé orani koaitsʼia je kjoañʼai xi nʼio tse. Kuinga kitsosíni: “Tiyochonʼndao [...], nga likui ʼyao kʼianibe nga kʼoakoa̱n” (Marcos 13:33).

(Yaa yʼangini Mateo kapítulo 24 kao 25, Marcos kapítulo 13 kao Lucas kapítulo 21.)