JE LIBRO xi tofetʼani xi faʼaitʼa Biblia, xi Apocalipsis (Revelación) ʼmi, jngo kjoachoya tsjoále ngatsʼi chjota. Jé pastro Juan kiski. Kʼoa nʼio nkjín sén síkʼaxki̱ xi kui tínchjani saʼnda nga kuitjoson jme xi tjínndajinle Jeobá.

Je pastro Juan kui títjon tsabe nga je Jesús ñato jtín xi tsʼe títsjoánganʼiole kʼoa tísíkixiya. Xijekoan, tsabe jochon jña tíjna Niná ya ngʼajmi kʼoa nga tjío kʼa xi tjíobʼasjejeya.

Kʼianga je machrianle nga kuitjoson jme xi tjínndajinle Niná, je Barré (Jesucristo) jngo xo̱n xi kjixkóya bʼaile xi ñato seyo tjínʼioni. Kʼianga bʼasjetʼa xi títjon ño seyo, ño chjota xi naxín tjíosonle bitjokʼatsen. Je xi títjon jéní Jesús xi je Rey kinikao kʼoa naxínchxoa tíjnasonle. Je xi ngi jan kjaʼaí kjaʼaí sʼin matsen naxín tjíosonle, kʼoa kui tsoyanile je kjoajchán, kjinrá kʼoa kao chʼin xi tísʼe nichxin fetʼa xi tiyoaa ndʼaibi. Kʼianga tjoxʼá xi mani ñato seyo, ñato kʼa fane xjao, xi kui tsoyanile nga kʼuínyason je kjoa xi tíbʼéndajin Niná. Kʼoa xijema, je pastro Juan ngi ñato kjoañʼai tsabe xi kui bakó kjoajtile Niná.

Xijekoan, je Juan tsabe nga jngo ʼndí kitsin, jebi kui tsoyanile kʼianga tsakʼaile xá ya ngʼajmi je Rey xi kiskoejin Niná. Kʼoati tsabe nga jngo kjoajchán kisʼejna ya ngʼajmi nga tsakichonsje je Na̱i kʼoa kao ánkje tsʼenle kʼoa nga i̱ kinikʼatsaojenngi i̱ Sonʼnde. Kʼoa jngo jta̱ kinoʼyale xi kitso: “Ma̱xóni xi tjío sonʼnde”. Ánni kʼoakitsosíni. Kuinga nʼio jtile je Na̱i nga be nga tochoasa nichxin tíjnale (Apocalipsis 12:12).

Je Jesús jo barré kji kʼianga tsabe ijngokʼa je Juan ya ngʼajmi kʼoa jngo siento kao ñachanño jmi mani chjota xi tjíokao xi i̱ Sonʼnde kitjoejinni nga ya “koatexomakao”. Yaa libro xi tsʼe Apocalipsis jñani ʼyaa nga jngo siento kao ñachanño jmi mani je chjota xi ya maxki̱kao je ntje̱ xi kinokjoani ya Edén (Apocalipsis 14:1; 20:6).

Xijekoan, je pastro Juan kʼoati tsabe nga ni̱katíoxkó je chjotaxá xi tjín Sonʼnde kʼianga sʼe̱jna Armagedón, xi tsonile, je “kjoajchán [...] xi tsʼe Niná xi batéxoma ngayije” nga skaan kao Jesús kʼoa kao chjota kjoajchánle xi tjío ngʼajmi. Jósʼin kuichokjetʼa kjoajchán jebi. Ni̱kjeson je chjotaxá sonʼnde kʼoa ni̱kʼéjnaʼyanʼio je Na̱i. Kʼoa je Jesús kao xi jngo siento kao ñachanño jmi mani jngo jmi nó koatexomason Sonʼnde, kʼoa xi je kjoaʼato nó xotjín, je Na̱i kʼoati ni̱kʼien (Apocalipsis 16:14; 20:4).

Jméni xi sʼin je Cristo xi tʼatsʼe chjota xi sítjosonle Niná kʼianga koatexoma xi jngo jmi nó. Je Juan i̱ tso: “Niná [Jeobá] kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon je jaʼato” (Apocalipsis 21:4). ¡Ijngokʼa ʼndenaxó koa̱nni Sonʼnde!

Kʼoasʼin síkjetʼani je libro xi tsʼe Apocalipsis jme xi tínchjani je Biblia: nga jé sichjén Jeobá je Rey xi kiskoejin nga kʼoasjetsje jaʼaínle kʼoa nga koakole ngatsʼi nga tojekjoan xi tiʼndele koatexoma.

(Yaa yʼangini libro xi tsʼe Apocalipsis.)