JMÉ xá jaʼaini Jesús i̱ Sonʼnde. Jesoa i̱ kitso: “Machjén nga kuinchjaya je énnda xi tʼatsʼe kjoatéxomale Niná nga kui xá jinroania” (Lucas 4:43). Ñola koya kataʼyaa jmeni xi kitsoya Jesús tʼatsʼe kjoatéxoma jebi, xi tsonile, je Rey xi kiskoejin Niná, nga kui xi nʼio kinchjani nga tsakakóyason.

1. Jé Jesús xi Rey koa̱n. Je Jesús kʼoakitso nga jéní je Mesías (Juan 4:25, 26). Kʼoa kao je Rey xi tsabe Daniel ya sén xi kisakole. Kʼoakitsole pastrole nga ya koatexomakao kʼianga kʼoéjnason “yáxilele kjoajeyale” (Mateo 19:28). Kʼoakitso nga “tochoa mani” xi ya koatexomakao. Kʼoa kʼoati kitsoya nga tjínle “xi kjaʼaí barré”, barré jebi jé chjotale xi tsín ya koatexomakao (Lucas 12:32; Juan 10:16).

2. Je Rey xi kiskoejin Niná ñaki kixi sʼin koatexoma. Je Jesús kʼoakitso nga je Rey xi kiskoejin Niná kʼoendajin je kjoa xi tsakajngi je Na̱i ya Edén kʼianga chʼaosʼin kisikʼéjna je jaʼaínle Niná. Jósʼinnile. Kuinga kʼoasjetsje jaʼaínle Niná, xi tsonile, nga kataʼyaxkón ijngokʼani nga kʼoasʼin chʼao tínikʼéjna saʼnda nga kisoko kjoa ya Edén (Mateo 6:9, 10). Je Cristo kitsoyale toʼyani, liʼya xi tsakʼasjengi. Nga kʼoakisʼin kui tsakakó nga tsín ʼya xi tixínkjín kʼoasjengini kʼianga koatexoma. Ninga kui xá jaʼaini nga je chjota israelita kuitsoyale, kʼoati tsakasenkao je chjota xi ya Samaria tsʼe kʼoa kao chjota xi xin naxinandále. Alikui kʼoakisʼin jokisʼin je chjota xi nyatítjonle relijión. Chjota xokjoan chʼaosʼin kisikʼaxki̱ xi kjaʼaí ninga kje bejin kʼoa totsakjaʼájin xínkjín.

3. Je Rey xi kiskoejin Niná alikui i̱ tsʼe sonʼndebi xi je Na̱i kjinentsja. Kʼianga tsakʼejna Jesús i̱ Sonʼnde kjoasi tjín ya naxinandále chjota judío, nga kjaʼaí naxinandá tíbatéxomale. Ninga kʼoalani kjima, je Jesús alikʼia kitsjoaʼnde nga kjoa polítika kitsjonjin chjota (Juan 6:14, 15). Kʼianga tsakjákao jngo chjota xi xá tjínle, kitsole: “Je kjoatéxomana likui tsʼe i̱ sonʼndebi” (Juan 18:36). Kʼoa je chjotale i̱ kitsole: “Jon likui i̱ [sonʼnde] tsaon” (Juan 15:19). Likui kitsjoaʼnde nga ki̱cha̱ kjoajchán kisichjén chjotale, ninga je kinitoánntjai (Mateo 26:51, 52).

4. Je Cristo kao kjoatsjoacha koatexoma. Jesús kʼoakitsole chjota tjenngile nga sitja̱le je chʼá xi yʼa (Mateo 11:28-30). Kʼoa kʼoakisʼin. Kitsjoale kjoafaʼaitsjen nga tsín jme xi sikjaojin, josʼin skoe̱kon tsojmi xi tjín sonʼnde, josʼin koaikao xínkjín kʼoa josʼin nga tsjoa sʼe̱ kon (Mateo kapítulo 5-7). Je Jesús tjao koanle chjota kʼoa tsabexkónní kʼoa kuinga saʼnda kichokonsínile je chjota xi nʼiosa ma̱ sʼin tsakatio. A tsí matsjoali tsa jngo chjota xi kʼoasʼín koatexomali.

Je Jesús kʼoati nʼio nkjín kjoa xi tomaxkónná kʼoakisʼin kʼoa kui tsakakó choa jmeni xi sʼin kʼianga koatexoma. Ánni nga kʼoakisʼinsíni. Kataʼyala.

(Yaa yʼangini Mateo, Marcos, Lucas kao Juan.)