Je Jeobá kui xá kisindani Adán kao Eva nga koa̱n koatio tokʼia saʼndani ya ʼNdenaxó. Je Na̱i chʼaosʼin kisikʼéjna jaʼaínle Jeobá kʼoa kui tsakʼétʼale josʼin batéxoma. Adán kao Eva ya kisijngokao yaole je Na̱i. Nga kʼoakisʼin, jée kisikakinle ngatsʼi chjota kʼoa kuinga biyasíñá

Je Niná kʼoakitso joni̱kao je xi yátsʼi̱n tsakinyále. Kʼoakitso nga jngo Ntje̱ kjoaʼaí xi kjoaʼaxin je Na̱i kʼoa kao kjoa xi tjín xi totʼatsʼe je jée xi kisoko nga tsín kisitjoson Adán kao Eva

Je Niná kʼoakitsole Abraham kʼoa kao David nga ya ntje̱le kjoaʼaíni je Ntje̱ xi kinokjoani ya Edén, je Mesías xi koatexoma tokʼia saʼndani

Je chjota xi kinchjaya tʼatsʼe Jeobá kʼoakitso nga je Mesías kjoaʼaxin je jée kao kjoabiya kʼoa nga Rey sʼin kʼoéjna ya ngʼajmi. Kʼoati kitso nga tjío je chjota xi koatexomakao Rey jebi, kʼoa nga je kuinyakao nga kjoaʼaxin kjoajchán, chʼin kʼoa kao kjoabiya

Je Jeobá tsakʼéjnatsen nga je Jesús je Mesías. Kui xá kisikasénni i̱ Sonʼnde nga kuitsoyason tʼatsʼe Rey xi kiskoejin Niná kʼoa nga kuiyántjai chjotasonʼnde. Kʼianga kisikjaʼáyanile, ijngokʼa kui kisikʼani yao xi tsín matsen

Je Niná Rey kisikao Cristo ya ngʼajmi kʼoa kʼia kitsʼia nichxin fetʼa. Jé Jesús tíbándiaale chjotale nga tjíotsoyason tʼatsʼe Rey xi kiskoejin Niná jngo tjíjtsa Sonʼnde

Je Jeobá kʼoakuitsole je ʼNdíle nga katabatéxomason Sonʼnde. Kʼoa jé kjoaʼaxin chjotaxá xi tjín, ʼndenaxó sikaoni sonʼnde kʼoa je chjota xi kixi ñaki chjota tsje koanni. Likui tiʼya xi kʼoetʼanile Jeobá josʼin batéxoma, ñaki jchaxkón jaʼaínle tokʼia saʼndani