KʼIANGA je te nichxin jaʼato nga kimingʼa Jesús ya ngʼajmi, jngo siento kao kanla mani je chjotale xi ya tsakatiojtín jngo ndʼia ya Jerusalén kʼianga tísʼejna sʼuí Pentecostés nga nó 33. Tonga toxijña jo ntjao̱nʼio koan xi jane, kʼoa je chjotale Jesús kjaʼaí én kinchja. Ánni nga kʼoakoansíni. Kuinga je Niná kisikasénnele nganʼiotsjele.

Ya naxinandá Jerusalén nʼio nkjín chjota xi xin naxinandále kicho sʼuí jebi. Kʼoa chjota jebi ñaki tokoanxkónle kʼianga je chjotale Jesús kui kinchjakao je én xi male. Kʼianga koanjinle chjota anni nga kʼoakjimani, je Pedro kʼoakitsole nga je Joel, xi kinchjaya tʼatsʼe Niná, tongini kʼoakitso nga Niná sikasénne nganʼiotsjele je choʼndale kʼoa nga koa̱nle koatio kjoaxkón (Joel 2:28, 29). Nga kʼoakisʼin kui tsakakó nga kitjoxinle kjoanichikontʼainle Niná je naxinandá Israel kʼoa nga je chjotale Cristo tsakʼaile. Saʼnda nga kʼia, toʼyani xi mele nga Niná sixále tjínnele nga chjotale Cristo koa̱n.

Tonga je chjota xi kontra tsakatiole Cristo kitjenngike chjotale. Ñandia kʼianga ndoyá kiskanisʼen kʼa pastro, tonga jngo ánkje kichokʼasjentjai nga nitje̱n kʼoa kʼoakitsole nga tosi tonda katatsoyason. Kʼianga je kisʼesén, je pastro ya ki ya yo̱ngo̱ kʼoa kinchjani xi tʼatsʼe Jesús. Je xi nyatítjonle relijión nʼio koanjtile kʼoa kʼoasʼin tsakʼénele nga tsín tikatatsoyasonni. Tonga je pastro kiskoé kjoanʼiojin kʼoa kitsole: “Ngisa machjén nga nikjitjosonlee Niná kaoni tsa chjotasonʼnde” (Hechos 5:28, 29).

Tonga je chjota kontrale alikui jñá tsakatio, ngisa tinʼio kitjenngikengáni. Tobʼelañá, tjínkʼa chjota judío xi kʼoakitso nga Niná kinchjaʼaonle Esteban, xi chjotale Jesús koan, kʼoa la̱jao̱ kisikʼienkaoni. Je xi kʼoati ya séjnabasen nga kinikʼien Esteban, jé Saulo xi ya tsʼe Tarso, jngo ti xi nʼio jtike koan je chjotale Cristo. Xijekoan, je Saulo kjoan ki Damasco nga tsoa̱ tojokjini xi chjotale Cristo ma. Tonga nga tjenya yandiaa toxijña jngo lʼí xi ya kinroani ngʼajmi kisixka̱. Kʼoa jngo jta̱ kinrʼoéle xi kitsole: “Saulo, Saulo, ánni nga an ʼmitjenngi kontrasíninái.” Nga je tsín timatsennile, kitso: “ʼYáni ji”. Kʼoa je jta̱ kitsole: “Annía Jesús” (Hechos 9:3-5).

Xi je koanjanni nichxin, je Jesús jngo chjotale kisikasén, je xi Ananías ʼmi, nga koaisíndaya xko̱n Saulo nga katamatsennile. Kʼiaa kiskanisʼenngindá yaole je Saulo kʼoa ñaki kao kjoatsjoa kitsoyason je énle Niná ngakjijnda naxinandá. Kʼoa pastro Pablo sʼin tsaʼyale nga koanskanni.

Je chjotale Cristo tojé tsoyasonle tsakai je chjota judío kao chjota samaritano jotjínni tʼatsʼe Rey xi kiskoejin Niná. Tonga ñandia nga jngo ánkje tsʼatsenle je Cornelio, jngo xi ngʼajko̱ tíjnale sondado xi tsʼe Roma kʼoa xi tsokjónke Niná. Je ánkje kʼoakitsole nga katanchjale je pastro Pedro. Je Pedro tjenkao xi kjaʼaí chjotale Jesús nga kichokakóyale je Cornelio kʼoa kao xi tjío yaniʼyale. Kʼianga tínchja je Pedro, je Cornelio kʼoa kao xi tjío yaniʼyale tsakʼaile nganʼiotsjele Niná kʼoa je Pedro kʼoakitso nga kao jaʼaínle Jesús katachanisʼenngindáni. Saʼnda nga kui nichxin, toʼya chjotani ninga xi xin naxinandále koaan sokole kjoabijnachon xi tsínkʼia fetʼa. Kʼoa je chjotale Jesús kʼiaa tsakʼétsʼiakao nga kitsoyason je énnda chjotse tojña naxinandáni.

(Yaa yʼangini Hechos 1:1–11:21.)