NKJÍN siento nó tongini, nga kjesa faʼasʼenjin je naxinandá Israel ya Canaán, je Jeobá kʼoakitsole Abraham kʼianga je ntje̱le tsjoále ʼnde jebi. Kʼoa kʼianga tojekjoan kjoaʼasʼen je chjota israelita ya ʼNde jña tsakʼinle nga kʼoaile jé Josué séntítjonle.

Je Niná koanmele nga katanikjeson je chjota cananeo nga nʼio tsʼen koan kʼoa ñaki to xáchajngi kisʼin. Kʼoa kʼoakitsole je chjota israelita nga katasíkjeson ngatsʼi naxinandá xi kisʼe ya ʼnde Canaán.

Kʼianga kjesa faʼasʼenjin ya Canaán títjonkjoanla jao chjota kisikasén je Josué xi kikotsenché ya ʼnde jebi. Nga jao chjota jebi ya kicho Jericó kʼoa ya tsakatio ya niʼyale je chjoón xi Rahab tsakʼin. Ningalani be nga chjota israelita xi kichonrʼoe, je Rahab kitsjoaʼnde nga ya tsakatioʼma ya niʼyale. Ánni kitsjoaʼndesínile. Kuinga tokʼoa je kinrʼoéño je kjoaxkón xi tsakatío Jeobá kʼianga tsakʼasjentjai naxinandále kʼoa koankjainle xi tʼatsʼe. Je Rahab kʼoakitsole nga jao chjota xi ya kichokotsenché nga katabʼasjentjai, je kʼoa kao yaniʼyale, kʼianga kuichonikjeson naxinandále.

Xijekoan, je chjota israelita ya títjon kinrʼoe Jericó nga jaʼasʼen ya Canaán. Je Jeobá kisikixojen je xjáo xi kjindai Jericó kʼoa je chjota kjoajchánle Josué jngokʼa kisikjeson naxinandá jebi, tonga je Rahab kao yaniʼyale kitjontjai. Jaon nó nga kʼoasʼin kiskan Josué kao chjota kjoajchánle kʼoa tse nangi kitjoele ya ʼNde jña tsakʼinle nga kʼoaile. Xijekoan, kʼiaa koanxkoa̱yale je ntje̱le Israel je nangi xi kitjoele.

Kʼianga tojeme kuiyá je Josué, kisikatíoxkó je chjota israelita kʼoa tsakʼéyanajmíle jokji tse kjoanda tsakakóle Niná je chjotajchíngale, kʼoa kʼoakitsole nga kixi katafitʼale Niná. Tonga nga je kʼien Josué kao xi kʼia tsakatio, je chjota israelita likui ti Jeobá tsabexkónni kʼoa kui niná xi tokʼoakjoan tsakʼétsʼoale. Saʼnda kʼia, janla siento nó nga kʼoakji kisitjoson kjoatéxomale Niná kʼoa kʼoakji mai. Kʼoa kʼianga tsín kisitjoson, je Jeobá kitsjoaʼnde nga totaon tsabe je chjota filisteo kʼoa kao naxinandá xi kontra tsakatiole. Tonga nga tsakjayojéetʼale Jeobá, je Jeobá kiskoejin ʼyani xi tsakʼasjentjai je chjota israelita. Kʼoa je xi kʼoasʼin tsakʼasjentjai tejao koansonni kʼoa je xi jues koan.

Je libro xi bʼéyanajmí jmeni xi koan nga kʼia kui títjon bʼéyanajmí jokisʼin je jues Otniel kʼoa kui síkjetʼani tʼatsʼe jues Sansón, je chjota xi ngisasa taja koan tikʼoajinni toʼyani. Ngayeje xi bʼéyanajmí je libro xi tsʼe Jueces kui bakóyaná nga nda kuiyoaa tsa si̱tjosonlee Jeobá tonga tsa tsín si̱tjosonlee kjoa tsaojiaan.

(Yaa yʼangini Josué, Jueces kao Levítico 18:24, 25.)