JE LIBRO xi ngisasa tse én nya xi nroatʼa Biblia kui faʼaitʼa je kjoajnda xi kichʼasjengʼani Niná ngasʼa, kʼoa jngo jmila nó koanjngotʼanile xínkjín ngayeje. Josʼin kichji je libro xi tsʼe Salmos kui bakó jokji kjoamakjain kisʼele je chjota xi kiski. Libro jebi nkjín koya síkʼaxki̱ tʼatsʼe jomaná xi chjotaa, jolani nga tsjoa maná, nga aon maná, nga bʼe kjoanda, nga kʼoamaniná jéená, nga chʼasjengʼaa Niná kʼoa nga ba maná. Ngatsʼi chjota xi kiski je Salmos tsjoake koan Niná kʼoa kisichriantʼale. Kataʼyala kʼaa jmeni xi tínchjani libro xi tsʼe Salmos.

Tojéní Jeobá xi tiʼndele koatexoma ngʼajmi kao Sonʼnde kʼoa bakinle nga jchaxkoán kʼoa nga chʼasjengʼaa. Salmo 83:18 i̱ tso: “Ji, xi Jeobá ʼmili, tojisai xi nʼio ngʼa tijnalai jngo tjíjtsa sonʼnde”. Nkjín kapítulo faʼaijin libro xi tsʼe Salmos xi bʼasjengʼa Jeobá nga kʼoasʼin kisinda je ngʼajmi, je niño, ngatsʼi xi tjíokon i̱ Sonʼnde kʼoa nga kʼoanaskánasʼin tsakʼénda yaoná (Salmos 8, 19, 139 kao 148). Kʼoati faʼaijin kʼa xi bʼasjejeya nga kʼoasʼin síkuinda je choʼndale xi kixi fitʼale kʼoa nga bʼasjentjai (Salmos 18, 97 kao 138). Kʼoa faʼaijin kapítulo xi bʼasjengʼa Jeobá nga kʼoasʼin nʼio kixi jme xi sʼín, nga basenkao je xi totaon ʼya kʼoa nga tsjoále kjoañʼai je xi tsʼen (Salmos 11, 68 kao 146).

Je Jeobá basenkao kʼoa sínʼio kon je chjota xi tsjoake. Tsakui nichxin kui kapítulo 23 xi tsʼe Salmos xi ngisasa be chjota, jñani je David kui síngósonkao je Nʼainá xi tíjna ngʼajmi josʼín jngo chjota xi barré koʼnda nga bándiaale, síkuinda kʼoa mandosinle barréle. Kʼoa ya Salmo 65:2 kʼoatso nga nrʼoéle kjoabʼetsʼoaná je Jeobá. Je kapítulo 39 kao 51 xi tsʼe Salmos tsjoánganʼiole je chjota xi tse jée tsakajngi. Ya kapítulo jebi kui tsakʼétʼaxo̱n David jokji aon koannile je jée xi tsakajngi kʼoa nga be nga sichatʼanile Niná. Kʼoa ya Salmo 55:22 kʼoatso nga si̱nʼiotʼaa je Jeobá kʼoa nga kʼoaiʼndee nga je katabʼakaoná jme xi ai maná.

Jé Mesías sichjén Jeobá nga kjoaʼaíkao sonʼnde chjotse. Ya libro xi tsʼe Salmos nʼio nkjín kʼa bʼaxki̱ je Mesías, je Rey xi kitso Niná nga kjoaʼaí. Tobʼelañá, ya kapítulo 2 kʼoatso nga Rey jebi sikjeson ngatsʼi naxinandá xi kontra koatiole. Ya kapítulo 72 kʼoatso nga kjoaʼaxin je kjinrá, je kjoa xi tsín kixi kjima kʼoa kao je xi totaon be je xi toxkia ʼndí chjota. Tojotso Salmo 46:9 jé Mesías sichjén Niná nga kjoaʼaxin je kjoajchán kʼoa nga sixkoa̱ ngayeje ki̱cha̱ kjoajchán. Xi ijngosani, ya kapítulo 37 kʼoatso nga ya sonʼnde chjotse likui tisʼe̱ni je chjotatsʼen kʼoa je chjota xi kixi nyʼán koatiokao xínkjín kʼoa jtín koatio tokʼia saʼndani.

(Yaa yʼangini libro xi tsʼe Salmos.)