KʼIANGA je kʼien je Sansón, jngo chjota tsakʼejna ya Israel xi Samuel tsakʼin, xi kinchjaya tʼatsʼe Niná kʼoa xi jues koan. Je chjota israelita kʼoatisʼin koanmele koatio josʼin tjío naxinandá xi ngikʼa kʼoa kuinga kʼoakitsosínile Samuel nga jngo rey katabasénnda xi koatexomale. Ninga tsín kisasenle Jeobá xi tʼatsʼe jebi kʼoakitsole Samuel nga rey katasíkʼéjna je Saúl. Je Saúl nangitokon koan tonga xijekoan koanngʼakon kʼoa likui kisitjoson kjoatéxomale Niná. Kʼoa nga kʼoakisʼin, je Jeobá likui kisasenle kʼoa kʼoakitsole Samuel nga je rey katasíkʼéjna je ti xi David ʼmi ánni nga je kʼoéjnasíni ʼndele Saúl. Tonga nkjín nó kichomani nga kitjoele xá David.

Ñandia kʼianga kjoajchán tjínle Saúl kao chjota filisteo, je David kinrʼoe je xtindsʼe̱. Je xtindsʼe̱ David chjota kjoajchánle Saúl koan. Kʼianga kicho David ñaki tjíotsokjón je chjota kjoajchánle Saúl. Ánni nga tjíotsokjónsíni. Kuinga jngo chjota kjoajchán filisteo xi me jan metro ngʼa tínchjaʼaonle chjota kjoajchán israelita kao Niná. Je David nʼio koanjtile jme xi títso chjota xokji kʼoa ningalani sʼa xti kʼoakitso nga skaan kao Goliat. Kʼianga kinrʼoe je Goliat tojngo jao la̱jao̱ yʼa kao xjoa̱xín xi basénni la̱jao̱. Je Goliat tsabesin je David, tonga je David kʼoakitsole nga je kuinjele, nga kao jaʼaínle Jeobá koainrʼoeni. To jngo la̱jao̱ kisikʼienni je Goliat. Xijekoan, tsakjáʼale espadale kʼoa tsakatesin. Kʼianga je tsabe chjota kjoajchán filisteo xi ngikʼa nga je kʼien Goliat kjoan kitokachʼinxkón.

Je Saúl ñaki tokʼoakoanle nga kʼoasikji kjoanʼiojin kisʼele David kʼoa kuinga jngo xángʼa kitsjoasínile ya jinle chjota kjoajchánle. Tonga nga nkjín kjoajchán kinjele David, je Saúl nʼio koanchinike kʼoa saʼnda koanmele kisikʼien, tonga je David kitokachjinga. Ningalani nkjín nó nga tokʼoasʼin tsakʼamjechjinga, alikʼia yátsʼi̱n tsakasénle Saúl. Ánni. Kuinga je Jeobá kitsjoale xá je Saúl. Xijekoanni, je Saúl kjoajchán kʼienjin. Kʼoa kʼia rey koan David tojokjoan kitso Jeobá.

Je David koanmele nga jngo yo̱ngo̱ kʼoendale Jeobá, tonga je Jeobá kʼoakitsole kʼianga je kʼoenda je tile xi Salomón ʼmi. Ninga tsínlani je tsakʼénda je yo̱ngo̱, je Jeobá ngisa tse kjoanda kitsjoasale David: Jngo kjoasʼendajin tsakʼéndakao, kʼianga ya ntje̱le tjoéjinni je xi rey koatio ya Israel. Kʼoa nga saʼnda ya kuinroani je Mesías xi kʼoasjentjai chjota, je Ntje̱ xi kinokjoani ya Edén, je xi skoéjin Jeobá nga Rey koa̱n kʼoa xi koatexoma ngantsjai nichxin.

Je David nʼio kitsjoale kjoanda je Niná xi tʼatsʼe kjoasʼendajin jebi kʼoa nkjín tsojmi tsakinyáxkó xi kisʼendani yo̱ngo̱ kao taonsine kʼoa kao taonchxoa. Kʼoati nkjín kjoajnda kiski xi tsakʼasjengʼani Jeobá. Kʼianga tojeme kuiyá David, jé Niná tsakʼasjengʼa ngayeje jmeni xi kisʼin kʼoa i̱ kitso: “Jé nganʼiole Jeobá kinchjangajaona, kʼoa je énle yaa ndsoʼba tsakʼéjnaʼa” (2 Samuel 23:2).

(Yaa yʼangini 1 Samuel, 2 Samuel, 1 Crónicas, Isaías 9:7, Mateo 21:9, Lucas 1:32 kao Juan 7:42.)