JÓSʼIN skoe̱ni je chjota ʼyani je Mesías. Jesoa Niná kisikʼéjnatsen kʼianga jchale. Xi je jaʼato ño siento nó nga koanjngo je Énle Niná xi én hebreo kichjini (je “Antiguo Testamento”) jngo ánkje xi Gabriel ʼmi kichonrʼoe je María, jngo tsoti xi ya Nazaret tsʼe, ʼnde jña nchjani Galilea. Je Gabriel kʼoakitsole María nga jngo ʼndílee sʼe̱le ninga sʼa chjoónxongó. Kʼoakitsole nga kao nganʼiotsjele Niná sʼe̱nile ʼndí jebi kʼoa nga ʼndí jebi jéní je Rey xi tíchoyale xi koatexoma ngantsjai nichxin. Je ánkje kʼoakitsole María nga je Niná xosʼin nga yaa sikʼéjnaya tsʼoa̱ je kjoabijnachonle ʼNdítjonle. Tonga nga kui nichxin yaa sʼa tíjnakao ngʼajmi.

Je María ñaki kao kjoatsjoa kisijyo nga tsakʼaile kjoanda jebi. Je José, jngo xi chjineyá koan, toje tjínndajinle kjoa kao María kʼoa kʼia chixankao nga je kʼoakitsole ánkje nga ʼNdíle Niná xi sʼe̱le. Tonga tojonásʼin je tsaʼyaa kʼoanákitso én nga ya Belén jtsín je Mesías (Miqueas 5:2). Tonga jósʼin kuitjosonni én jebi nga yaa Nazaret tíjna je María kʼoa naxinandá Belén jngo siento kao ñachanla kilómetro kjin tíjna.

Je xi koan kuinga je xi tíbatéxoma Roma kʼoakitso nga ya katasʼetʼaxo̱n je chjota jñani kitsin. Je José kao María yajin naxinandá Belén kinroani kʼoa kuijin nga ya kini. Kʼoa nga kui nichxin tojeme tsin ʼndíle María (Lucas 2:3). Je Jesús yaa kitsin jña xinyáʼya cho̱ kʼoa yaa kinikájnaya jña kjenya cho̱. Kʼoa ya chrian jña kitsin Jesús yaa tjíokoʼnda cho̱le chjota kʼoa toʼikoan nʼio nkjín ánkje tsʼatsen xi kʼoakitsole nga je kitsin Mesías, xi kʼoati Cristo ʼmi.

Je chjota xi kinchjaya tʼatsʼe Niná kʼoati kitso nga sʼe̱ chjota xi kʼoakuitso ʼyani je Mesías. Je Isaías tongini kʼoakitso kʼianga kʼoéjna jngo chjota xi koandiaa títjon jmeni xi sʼin je Cristo (Isaías 40:3). Kʼoa je xi kʼoakisʼin jé Juan Bautista. Ñandia kʼianga tsabe Jesús i̱ kitso: “Koeni ʼndí barréle Niná, xi faʼáxin jéele chjotasonʼnde”. Nga je kʼoakitso, nkjín chjotale xi je Jesús kitjenngile. Kʼoa jngo xi i̱ kitso: “Je koansjainajin je Mesías” (Juan 1:29, 36, 41).

Tonga kʼianga ngisa tinda tsaʼyangánile nga je Jesús je Mesías kʼiaa nga kiskanisʼenngindá je Juan Bautista. Je Jeobá kao nganʼiotsjele kiskoejinni Jesús nga Mesías kisikao kʼoa i̱ kitso: “Jebi ʼndína xi tsjoake, jonda sʼe koan xi tʼatsʼe” (Mateo 3:16, 17). ¡Kʼia tsaʼyale ʼyani je Mesías!

Tonga jmé nóni nga kʼoakoan. Kʼianga nó 29, nga je kicho je xi ño siento kao ñokan kaoni jan nó xi kitso je Daniel. Tojngo jaola choa̱ kaʼyaa xi bakó kʼianga je Jesús je Mesías. Tonga jmé énni xi kitsoyason kʼianga tsakʼejna i̱ Sonʼnde.

(Yaa yʼangini Mateo kapítulo 1 saʼnda 3, Marcos kapítulo 1, Lucas kapítulo 2 kao Juan kapítulo 1.)