JE CHJOTA israelita nkjín nó tsakatio ya Egipto, nda tsakatio kʼoa koannkjínya. Tonga xijekoan, jngo faraón xi nʼio tsʼen tsakatéxoma xi tsín tsabexkon je José. Kʼianga tsabe nga koannkjínya je chjota israelita, choʼnda kisikao kʼoa kʼoakitso nga ya xongá Nilo katanikʼatsaongindá je ʼndílee xi xʼin. Tonga jngo chjoón israelita xi tsín kitsokjon kʼoa jngo ni̱si̱nyá kisikájnaya je ʼndíleele kʼoa ya kisikʼéjnaʼmajin ya jñá xi tjín ya xongá Nilo. Jé tsotile faraón koansjaile ʼndílee jebi kʼoa Moisés kitsole kʼoa ya koanjchínga ya ndʼiale faraón.

Kʼianga je ñachan nóle Moisés jngo kjoa tsakajngi nga kisitoánntjai jngo chjota israelita xi totaon tíbe jngo chjota egipcio. Kʼoa kuinga kjin tsakangasíni. Kʼoa nga je ñokan nóle kʼoakitsole Niná nga katafi ijngokʼani ya Egipto kʼoa nga kʼoakatatsole je faraón nga katasíkatíondaí je chjota israelita.

Kʼianga koankaile je faraón, je Niná te kjoañʼai kisikasénne Egipto. Je Moisés tongini kikájinkon je faraón tʼatsʼe kjoañʼai xi kuichone tsa tsín kʼaonsje je chjota israelita. Kʼoa kʼoakisʼin nga jngó jngó kjoañʼai kichone Egipto. Tonga je faraón nʼio ngʼakon koan kʼoa tsakʼejnachjoale je Moisés kao Jeobá. Je kjoañʼai xi jetʼani, jngo ánkje kisikasén Niná xi kisikʼien ngatsʼi ʼndítjonle chjota egipcio. Tonga je chjota xi kʼoasʼin kisitjosonle Jeobá xi kisikajon njínle barré ya ndai xo̱ntjoa niʼyale alikui kinikʼien je ʼndítjonle. Kʼia tsakʼétsʼiakaoni je chjota israelita nga xki̱nó tsakʼéjna je sʼuí Paxko nga kisikjaʼaitsjenya jmeni xi koan nga kʼia.

Kʼianga je kʼien ʼndítjonle faraón, kʼoakitsole je Moisés kao chjota israelita nga katabitjo ya Egipto. Nga je kʼoatsakʼinle kjitʼanangi kitjo. Tonga xijekoan, je faraón kisikʼantjaiya kjoafaʼaitsjenle. Kikao je sondadole kao karreta kjoajchánle nga kitjenngile chjota israelita. Kʼianga je kicho ya ndai ndáchikon xi Ní ʼmi, je chjota israelita likui tijña koan kini. Tonga je Jeobá kisijaoya je ndáchikon kʼoa to nangi kixí chon jña jaʼa. Je chjota egipcio kʼoati jaʼasʼenjin nandá, tonga je Niná ijngokʼa kisijngoni je ndáchikon kʼoa je faraón kao chjota kjoajchánle ya kʼienjin.

Xijekoan, je chjota israelita ya kichokatio jña tíjna je nindo xi Sinaí ʼmi kʼoa je Jeobá jngo kjoasʼendajin tsakʼéndakao. Jé Moisés kisichjén Jeobá nga kitsjoale je kjoatéxoma xi koandiaale kʼoa xi koasenkao nga nda koatio. Kʼiatsa je xi sitjoson kʼoa kixi koa̱n, Niná kʼoéjnakao kʼoa jé koa̱nchjén nga koa̱nchikontʼain xi kjaʼaí naxinandá.

Tonga me ngatsʼi je chjota israelita nga tsín kisinʼiotʼa je Niná. Kuinga ñachan nó kisikʼétsomasíni Niná ya ʼndekixí. Xi koanskanni, je Moisés jngo chjota israelita kiskoejin xi Josué tsakʼin xi tsakʼejnayangajaole. Chan kicho nichxin kʼianga jaʼasʼen je naxinandá Israel ya ʼnde xi kitso Niná nga tsjoále je ntje̱le Abraham.

(Yaa yʼangini Éxodo, Levítico, Números, Deuteronomio, Salmo 136:10-15 kao Hechos 7:17-36.)