KʼIANGA je kʼoasʼin yátsʼi̱n tsakasénle Jeobá je Salomón, je naxinandá Israel koanjaoya tojokjoan kitso Jeobá kʼoa tsen kisʼele rey xi tsakatéxomale nga jngó jngó. Kʼia kʼoakoan nga tsakatéxoma Roboam (Rehoboam) je tile Salomón. Kuinga kʼoakoanni nga totaon tsabe je naxinandá. Te ntje̱le naxinandá Israel tsakinyaxin nga kʼoakoantʼain kʼoa to ngijaosa ntje̱ xi je Roboam kitʼale.

Tonga alikui tinyʼán kʼoa alikui tinda tsakationi je ntje̱ xi te kao ntje̱ xi jao, nga je rey xi tsakatéxomale alikui koankjainle xi tʼatsʼe Jeobá kʼoa likui kisitjoson kjoatéxomale. Tonga je xi ngisasa chʼao kisʼin jé ntje̱ xi te. Saʼnda nga tsakinyaxin, je rey xi tsakatéxomale kʼoasʼin tsakʼéne nga kjaʼaí niná katasʼetsʼoale. Kʼoa ninga kisikasén Niná je chjota xi énle kinchjaya jolani tsa Elías kʼoa kao Eliseo alikui tsakʼaʼénle ninga saʼnda kisikjaʼáyale kʼien nga jao chjota jebi. Kuinga chan kitsjoaʼndesíni Niná nga je chjota asirio kichosíkje je ntje̱ xi te.

Kʼianga je tsʼato jngo siento nó nga koanskanni, je Niná kitsjoaʼnde nga kʼoati kichonikje je ntje̱ xi jao. Je xi tʼatsʼe Niná kinchjaya kikájinkon je xi rey tsakatio jmeni xi koa̱n kʼiatsa tsín sikʼantjaiya yaole tonga tojngo jao xi kinrʼoé kʼoa tsakatekjáyale je naxinandá. Tobʼelañá, je rey xi Josías tsakʼin tsakjaʼáxin je relijión ndiso ya jñani tsakatéxoma kʼoa tsakʼéndaya je yo̱ngo̱le Jeobá. Kʼianga tísʼendaya yo̱ngo̱ jngo xo̱n koansjai: Kui Kjoatéxomale Jeobá xi jesoa Moisés kiski. Nʼio tsjoa koanle Josías, kʼoa ngisa titsakjénnʼiongánile nga tsakjaʼáxin je relijión ndiso.

Tonga je rey xi tsakationgajaole alikui tikʼoakisʼinni jokisʼin Josías. Kuinga kitsjoaʼndesíni Jeobá nga kichosíkje chjota babilonio je ntje̱ xi jao, je Jerusalén kʼoa kao yo̱ngo̱le. Je chjota xi tsʼangi yaa kinikatíonʼio ya Babilonia, tonga je Niná tongini kʼoakitso nga jankan kao te nó ya koatio kʼoa nga kʼia koai ijngokʼani ya ʼndele. Je nó xotjín tokisʼejnakjitia ʼnde Judá.

Alikui tije ntje̱le David tsakatéxomani saʼnda nga Rey kinikao je Mesías. Me ngatsʼi je rey xi ya kinroani ntje̱le David nga tsín nda kisʼin kʼoa jebi kui xi bakó nga nijngojinla chjotasonʼnde xi koa̱nle nga nda koatexoma. Tojekjoan Mesías xi koa̱nle. Kuinga i̱ kitsosíni Jeobá xi tʼatsʼe Mesías: “Je koatexomantsjaile chjota ndʼiale Jacob. Kʼoa je kjoatéxomale likui kjoetʼa” (Lucas 1:33).

(Yaa yʼangini 1 Reyes, 2 Reyes, 2 Crónicas kapítulo 10 saʼnda 36 kao Jeremías 25:8-11.)