SAʼNDA nga kitsʼia je jtín xi tsʼe chjotale Cristo nʼio tísíchjén Jeobá, nga tíbitjoson jme xi tjínndajinle. Tonga nʼio kisʼele chjota kontra xi kitjenngike kʼoa saʼnda tiyani jinjtín nga xkón tsakatio. Jmé xi tsakasenkao nga kixi kitʼale Niná. Kui je kjoanʼiojin kʼoa kao kjoafaʼaitsjen xi kitsjoale je xo̱nkarta xi kanjngo mani xi faʼaitʼa ya Escrituras Griegas Cristianas (je “Nuevo Testamento”).

Teño mani xi je Pablo kiski, fitsʼiakjoanni xi kiskile chjota Romanos kʼoa fetʼani xi kiskile chjota Hebreos. Nga teño xo̱n jebi tiya kʼoatsoni ʼyani xi kichjile. Kataʼyala kʼaa jme xi tínchjani.

Xi ndatjín kʼoa kao xi chʼaotjín. Je xi kjoachajngi sʼín, je xi síchajngitʼale xʼinle kʼoa tsa chjoónle kʼoa kao xi kjaʼaí jée bajngi, tsa tsín kʼoakoa̱nnile jéele kʼoa tsín sikʼantjaiya yaole “likui sʼe̱kjoatjaole kjoatéxomale Niná” (Gálatas 5:19-21; 1 Corintios 6:9-11). Je choʼndale Jeobá tjínnele jtín koatio ninga xinxin naxinandále (Romanos 2:11; Efesios 4:1-6). Kʼoati tjínnele nga kao kjoatsjoa tsjoá tsojmile kʼoa kuinyakao je xi ngóson sʼin makjainle (2 Corintios 9:7). Je Pablo kʼoati kitsole je chjotale Cristo nga kʼoakatatsole Jeobá jotjío jinni̱ma̱le, kʼoa i̱ kitsole: “Tʼetsʼoao ali nichajinjion ngantsjai” (1 Tesalonicenses 5:17; 2 Tesalonicenses 3:1; Filipenses 4:6, 7). Tonga kʼoakitsole nga kao kjoamakjain katabʼétsʼoa ánni nga kjuinrʼoésínile Niná (Hebreos 11:6).

Jmé kjoafaʼaitsjen xi kitsjoale Pablo nga jngó jngó xi tjío yaniʼya. Je xi xʼin tjínnele nga kʼoasʼin koa̱ntsjoake chjoónle josʼin tsjoake yaole. Je xi chjoón tjínnele nga nʼio skoe̱xkón xʼinle. Kʼoa je Niná kui xi mele nga je xti katasítjosonle xijchále, kʼoa nga je xi xijchá ma ngasin nganda katasíjchá xtile kao je kjoafaʼaitsjen xi nroatʼa Biblia (Efesios 5:22–6:4; Colosenses 3:18-21).

Xi tjínndajinle Niná. Je Kjoatéxomale Moisés kisikuinda kʼoa tsakándiaale je chjota israelita saʼnda nga jaʼai je Cristo, je Mesías xi kitso Niná nga kjoaʼaí. Tonga je chjotale Cristo likui titjínnenile nga kui sitjoson Kjoatéxomale Moisés (Gálatas 3:24). Kʼianga kiski Pablo je xo̱n xi Hebreos ʼmi, jé kiskile chjotale Cristo xi chjota judío kitjenni kʼoa kui kinchjani jme xá kisʼejnani je Kjoatéxomale Moisés kʼoa je xá xi yʼa Cristo nga kuitjoson jme xi tjínndajinle Niná. Kʼoakitso nga nkjín koya jmeni xi kisʼetʼa je  Kjoatéxomale Moisés xi tjín xi kitsoyanile. Tobʼelañá, nga cho̱ kinikʼienle Niná ngasʼa kui kitsoyanile nga kitsjoa kjoabijnachonle Jesús kʼoa nga tondiaa tsakʼéchjíntjai je jéená (Hebreos 10:1-4). Je kjoabiyale Cristo jaʼaisíkjetʼa je kjoa xi kisʼendajin kao Kjoatéxomale Moisés (Colosenses 2:13-17; Hebreos 8:13).

Josʼin tjínndajin nga jngó jngó jtín xi tsʼe Cristo. Je chjotaxʼin xi xá bʼaile ya jinjtín jé xi ndasʼin tjíofikao yaole kʼoa xi kʼoatjíosʼín jotso Biblia (1 Timoteo 3:1-10, 12, 13; Tito 1:5-9). Kʼoa kʼoati nʼio machjén nga je choʼndale Jeobá ntsjaintsjai koatiojtín ánni nga sinʼiojinngañásíni xínkjín kʼoa kʼuínyasínile tʼatsʼe Niná (1 Corintios 14:26, 31; Hebreos 10:24, 25).

Je xo̱n xi tojetʼani kiski Pablo kui xi majaoni xo̱n xi kisikasénle Timoteo. Kʼianga kiski xo̱n jebi ya tíjna ijngokʼa ya Roma, tonga ndoyá tíjnaʼya nga kʼia, kui tíkoyale nga sʼe̱ndajin kjoale. Tojngo jao koanni chjotale Cristo xi kiskoé kjoanʼiojin nga kichokotsenle. Je Pablo bele kon nga jeme ni̱kʼien, kʼoa i̱ kitso: “[Je] kisijngoa xána. Nda kisitjoso[an] én xi makjainná” (2 Timoteo 4:7). Tsakui nichxin kʼia kinikʼien nga je koanni. Tonga je xo̱n xi kiski tosi tonda tsakasenkao je xi ñaki chjotale Cristo ma nga nda kisixále Niná, kʼoa kʼoati tjíobasenkao tsanda ndʼaibi.

(Yaa yʼangini Romanos, 1 Corintios, 2 Corintios, Gálatas, Efesios, Filipenses, Colosenses, 1 Tesalonicenses, 2 Tesalonicenses, 1 Timoteo, 2 Timoteo, Tito, Filemón kao Hebreos.)