Je Adán kao Eva kisʼele xti kʼoa koannkjínya chjota i̱ Sonʼnde. Xi jeki nichxin, tjíokʼa ánkje xi ya kisijngokao yaole je Na̱i nga yátsʼi̱n tsakinyále Niná.

Ánkje xokjoan i jaʼaijen Sonʼnde kʼoa chjota kisikʼóya yaole nga koan chixankao je yánchjín. Je xti xi kisʼele yánchjín jebi ali tsa toxkia chjotajin koan, nʼio tsʼen koan kʼoa nʼio taja koan.

Ñaki to chjotatsʼen kisʼe i̱ Sonʼnde. Je Biblia kʼoatso “nga to kjoatsʼenle chjota kisʼejnakitse i̱ sonʼnde, kʼoa nga ñaki tokui xi chʼaotjín kisatiojin ni̱ma̱le ngantsjai”.

Je Noé nda chjota koan. Je Jeobá kʼoakitsole nga jngo jtsínʼio sikjesonni ngatsʼi je chjotatsʼen.

Kʼoati kitsole nga jngo chitso xi nʼioje kji katasínda, xi arca ʼmi, jñani koatioʼya je chjoónle, je xtile, yánchjínʼndale kʼoa kao jotjín koya cho̱ tjín.

Je Noé tsakájinkon chjota nga jngo jtsínʼio kjoaʼaí. Tonga je chjota likui kinrʼoéle, totsakijnoke kʼoa koanjtike.

Kʼianga jekoanjngole Noé je arca kʼiaa kisikʼasʼen je cho̱.