Kʼianga tíjnaʼya ndoyá Juan ya Patmos, je Jesús 16 sén tsakakóle tʼatsʼe nichxin xi nroa. Yaa tsabe josʼin kuitjotsje je jaʼaínle Jeobá, josʼin kjoaʼaí je Chjotaxále kʼoa josʼin kuitjoson jme xi mele Jeobá i̱ Sonʼnde kao ya ngʼajmi.

Jngo sén tsabe Juan jñani tíjnane yáxilele je Jeobá ya ngʼajmi. Jngotjondaile 24 chjotajchínga tjío. Najñochxoa yʼakjá kʼoa korona xi tsʼe tao̱nsine tjíoya jko̱. Ya jña tíjna yáxilele jo lʼíle chʼao̱n kjoan xi matsen kʼoa joxi chʼao̱n kjifane sʼin noʼyale. Je xi 24 chjotajchínga binyaxkónyʼintʼale je Jeobá kʼoa bʼétsʼoale. Ijngo sén tsabe je Juan jñani nʼio nkjín chjota tjío, xi jaʼaini ngakjijnda ʼnde kao ngayeje én xi tjín, xi je Jeobá bʼétsʼoale. Je barré, xi je Jesús tsoyanile, jé síkuinda kʼoa bándiaale jñani tjín nandá xi tsʼe kjoabijnachon. Xijekoan, ijngo sén tsabe jñani jetíbatéxoma Jesús ya ngʼajmi kao je xi 24 chjotajchínga. Je sén xi tsabesa Juan kuinga tjíokján je Jesús kao je ye̱ jchínga, xi tsonile, je Na̱i kao ánkje tsʼenle. Jesús i tʼanangi síkʼatjenjenngi je Na̱i.

 Xijekoan, ijngo sén tsabe jñani je barré kʼoa kao xi 144,000 mani ya tjíoson nindo xi Sión ʼmi. Kʼoati tsabe jngo ánkje xi tífitjen jngo tjíjtsa Sonʼnde xi i̱ títso: “Jchaxkón je Niná kʼoa chʼa̱sjejeyao”.

Je sén xi ijngo kisakole kui je kjoajchán xi Armagedón ʼmi jñani je Jesús kʼoa kao chjota kjoajchánle síkinjele je sonʼnde tsʼenle Na̱i. Je sén xi tofetʼani tsabe Juan kuiní nga ñaki nda tjíokao xínkjín je xi tjío ngʼajmi kao sonʼnde. Kʼoati tsabe josʼin tjóxin je Na̱i kao ntje̱le, xi tsonile, ngatsʼi xi ya fitjenngile. Kʼoa ngatsʼi xi tjío ya ngʼajmi kao i̱ Sonʼnde ñaki tsje sʼin bekon je jaʼaínle Jeobá kʼoa tojé bexkón.