ʼNdí ndsʼe:

Ngatsʼiaa xi je Jeobá bʼetsʼoalee tsjoachañá Énle, xi tsonile je Biblia. ʼYañá nga ñaki kʼoatjín jmeni xi tsoya, nga basenkaoná kjoafaʼaitsjen xi tsjoá kʼoa nga kui bakó jokji tsjoake Jeobá je chjota (Salmo 119:105; Lucas 1:3; 1 Juan 4:19). Kui xi mená nga kʼuínyalee je chjota jmeni xi tsoya je Biblia. Kuinga nʼio tsjoa maninajin nga bʼailaijin je libro: Xi bakóyana je Biblia. Kataʼyala josʼin tjínnda libro jebi.

Libro jebi je kisʼendale je xtiʼndí. Tonga kʼoati koasenkao je xi jchínga xi mesale skoe̱ jme xi tso je Biblia. Je Biblia basenkaoná ngatsʼiaa, nʼiojin nda koasenkaoná nga tosi tonda chótʼayajiaan jme xi tsoya, tsa kʼoasʼiaan tsjoa sʼe̱ tokoán.

Jmeni xi tso libro jebi yaa kitjoénile jme xi bʼéyanajmí Biblia, kui tsoya tʼatsʼe chjota, fitsʼiakjoanni josʼin koannda. Kʼoasʼin kisʼenda josʼin nga sasa koa̱njinniná kʼoa kisatio chʼin chʼin josʼin kʼoakoan nga jngó jngó koya xi bʼéyanajmí.

Tonga li tsa tokuijin tsoya jme xi faʼaitʼa je Biblia. Jmeni xi tso libro jebi kao sén xi faʼaitʼa kʼoasʼin kisʼenda josʼin nga ñaki katafiya jkoaa jokoanle je chjota xi síkʼaxki̱ kʼoa katamajinná jme xi kisʼin.

Je xo̱n jebi basenkaoná nga ʼyaa nga tʼatsʼe chjota nchja̱ni je Biblia: Je xi tsakʼaʼénle Niná kʼoa kao xi mai. Kʼoati bakóyaná josʼin basenkaoná jme xi kisʼin chjota jebi (Romanos 15:4; 1 Corintios 10:6). Je libro jebi teñoya tjínle. Nga jngó jngó koya kui bʼéyanajmí choa kjoaʼmiya xi nroatʼa, kʼoa josʼin basenkaoná xi bakóya.

Tsa tjíono ʼndíxti, koaan ñatjen tʼexkiao je kjoaʼmiya, kʼoa tixónyao je sén xi faʼaitʼa. Xijekoa̱n tʼexkiao je testo xi yʼangini kjoaʼmiya.  Tinyakao je ʼndíxtino nga katamajinle josʼin mangóson jme xi tso Biblia kʼoa jme xi tsoya nga jngó jngó kjoaʼmiya xi faʼaitʼa je libro. Kʼoati koa̱n kʼoasʼiaon nga kʼuínyalao jngo chjota xi jchínga, ánni nga katamajinnile jme xi tsoya ngakjijngo je Biblia.

Kui xi menajin nga je xo̱n jebi katabinyakao ngatsʼi chjota xi ndʼé tjío ni̱ma̱le, xi jchínga kao xi sʼa xti, nga katamajinle je Énle Niná kʼoa nga katasíchjén jme xi koa̱njinle. Tsa kʼoasʼin kʼoati koa̱n kʼoetsʼoale Jeobá kʼoa yaa koatiojin familiale.