Tsʼato 60% je jtín xi síkʼatoya je xo̱n xi Énle Niná nroatʼa xi tsín tiya Betel tjíoni, nga ya tjíonikasén ya ndʼia jña faʼatoya xo̱n xi Énle Niná nroatʼa. Jósʼin tíbichómani. Jméni xi machjénle je ndsʼee jebi. Jósʼin binyakao ndsʼee jebi nga ngisa nda síkʼatoya je xo̱n xi Énle Niná nroatʼa.

 Kʼianga tjío ndʼia jña faʼatoya xo̱n xi Énle Niná nroatʼa, je ndsʼee xi síkʼatoya yaa fikatio ya ʼnde jñani kui énle nokjoa. Je Karin, xi én bajo alemán síkʼatoya itso: “Josaʼnda nga i̱ jeʼe̱kiyuijin i̱ Cuauhtémoc, Chihuahua (México), ñaki tokui én bajo alemán nokjoaijin. Ali tsa tokʼiajin nga kui én chobaijin kao je xi ñatjen nixáijin kʼoa tsa kʼiaje̱ nga ʼmiyasuinjin, kʼoati kui én chobaijin kʼianga mangínkindaijin. Ñaki tokui énnajin nokjoaijin ngantsjai. Kʼoati noʼyaijin je én xi jenʼio kjoatse kinoʼyanijin. Ndʼaibi ʼyaníjin josʼin nchja̱ je chjota nga nyaon nyaon”.

 Je James, yaa Ghana tsʼe kʼoa yaa tíbasenkao je ndsʼee xi én Frafra síkʼatoya. Kʼoatso nga sakʼoa síkjáo je ndsʼee xi tjío ya Betel. Tonga kʼoati i̱ tso: “Nʼio tsjoake̱ nga i̱ titsjoanganʼioa i̱ ndʼia jña faʼatoya xo̱n xi Énle Niná nroatʼa. Kʼianga kui nchja nga xinyasoan je én xi nchja̱ chjota kʼoa nga ʼbe nga sasénle Énle Niná, kʼoasʼin sikjaʼaitsjen nga nʼio chjíle je xá xi tisʼian”.

 Jósʼin tjoéjin je ʼnde jñani ma sʼenda ndʼia jña faʼatoya xo̱n xi Énle Niná nroatʼa. Je ndsʼee Joseph, xi ya tsjoánganʼio ya Departamento Mundial de Diseño y Construcción ya Warwick (Nueva York), itso: “Je xi ñʼai ma sakʼoa kʼianga sʼesjai je ʼnde, kuinga tsín nandá, lʼí kao Internet kʼoa ñʼai ma nga faʼatoya xo̱n xi Énle Niná yʼangini. Kʼianga tosʼa sʼendajin, nkjín ʼnde sʼesjai jñani kui én nokjoa tsa koa̱n nga ya sʼejna je ndʼia jña faʼatoya xo̱n xi Énle Niná nroatʼa”.

 Kʼianga ngisa ngotjo sʼe̱ndani kʼoa nga ngisa choa sʼe̱ngi ndʼia jebi, ma tiya sʼendatʼani ya Ndʼia jña satío kjoajtíntse, Ndʼia jña chotʼayá kʼoa tsa ya jñani batio je misionero, ánni nga koa̱n koai kʼoa kjuinroani je xi síkʼatoya xo̱n xi Énle Niná nroatʼa. Kʼiatsa tsín koa̱n kʼoasʼin sʼe̱nda ndʼia jebi, je ndsʼee koaan sijékjoa nga koatse je ndʼia kʼoa jñani oficina tjín nga koa̱n ya koationi kʼoa ya sixá je ndsʼee xi síkʼatoya xo̱n xi Énle Niná nroatʼa. Kʼiatsa tsín tiya sixáni je ndsʼee, saténa ndʼia jebi kʼoa yaa machjén je tao̱n jñani ngisa machjén nganʼio.

 Kʼianga nó 2020, tejanla millón dólar koanchjén ya ndʼia jña faʼatoya xo̱n xi Énle Niná nroatʼa. Je ndsʼee xi ya síxá nkjín koya jmeni xi síchjén, jolani computadora, je programa xi síxákao, xi machjénle kʼianga sʼín grabar, Internet kʼoa kao xi kjaʼaísanile. Tobʼelañá, 750 dólar machjén nga binda jngo computadora kʼoa nga katasʼele ngayeje programa xi machjénle. Je ndsʼee kʼoati machjénle jngo programa xi Watchtower Translation System ʼmi, je xi ya faʼaitʼa jmeni xi síkʼatoya.

 Je ndsʼee xi síkʼatoya je xo̱n xi Énle Niná nroatʼa, kʼoati bʼaile jme xi machjénle kʼianga sʼín grabar xi tiyani jñani síxá. Kʼianga tosʼa kitsʼia chʼin COVID-19, nga tsen tsen tjínle je ndsʼee jmeni xi síchjén nga sʼín grabar nʼio tsakinyakao, nga̱ koaan ya tjen ndʼiale kisʼinni grabar je xo̱n kao video.

 Kʼoati tjío je ndsʼee xi tsjoánganʼio kʼianga kotʼa jmeni xi faʼatoya kʼoa xi ya tsjoánganʼio nga masinle je ndʼia. Jngo ndsʼee xi Cirstin ʼmi, xi ya síxá ya ndʼia jña faʼatoya xo̱n xi Énle Niná nroatʼa nga én afrikáans ya Ciudad del Cabo (Sudáfrica), itso: “Nkjín ndsʼee xi jetsoyason kʼoa xi precursor sʼin tjíosíxá xi tsjoánganʼio”.

 Nga kʼoasʼin tsjoánganʼio je ndsʼee nʼio tsjoa satío kon. Tobʼelañá, jngo tichjaa xi ya tsjoánganʼio jñani faʼatoya xo̱n xi Énle Niná nroatʼa, kʼoatso nga nʼio nda sʼe kon. Tjínkʼa je ndsʼee xi tsjoánganʼio kʼianga ma grabar. Je Juana, xi én totonaco síkʼatoya, xi ya Veracruz (México) tsʼe, itso: “Kʼianga jeʼi̱ tiyochriainjin jñani kui énnajin nokjoa, ngisaa choa ñʼai male je ndsʼee nga faʼaisʼín grabar je xo̱n kao video”.

 Nkjín ndsʼee xi kʼoatso nga ngisa nda majinle jmeni xi tífaʼatoya kʼianga ya bichókatio je ndsʼee xi kui xá sʼín ya jñani kui énle nokjoa. Je ndsʼee xi Cédric ʼmi, xi ya títsjoánganʼio nga tífaʼatoya én Congo ya República Democrática del Congo itso: “Tjínkʼa ndsʼee xi kʼoatsonajin nga kui én congo xi tsʼe Watch Tower nichjainjin nga nikʼatoyaijin, nga̱ tsín kʼoasʼin nchja̱ josʼin nikʼatoyaijin. Tonga ndʼaibi kʼoatsonajin nga kui én congo xi nokjoa ndʼaibi nikʼatoyaijin nga̱ nda majinle”.

 Je Andile, kʼoati tso, je xi én xhosa síkʼatoya ya Sudáfrica. Itso: “Nʼio nkjín xi kʼoatso nga jengisa nda majinle jmeni xi tífaʼatoya nga én xhosa. Kʼoa tjínkʼa xtiʼndí xi kui revista La Atalaya síchjén nga én inglés kʼianga bʼéxkia tsakai. Tonga ndʼaibi, én xhosa síchjén nga bʼéxkia. Kʼoa nʼio tsjoake nga bʼéxkia je Biblia Traducción del Nuevo Mundo nga̱ ngisaa nda majinle josʼin jaʼatoya”.

 Je tao̱n xi machjén nga sʼenda kʼoa nga masinle je ndʼia jña faʼatoya xo̱n xi Énle Niná nroatʼa, kʼoa je nganʼio xi bʼaile xi ya síxá, yaa tjoénile je tao̱n xi tsjoá chjota jotjín nroajin ni̱ma̱le. Kʼoa maa ya tjen nikasénñá tao̱n ya donate.pr418.com.