Nkjín naxinandá jñani kʼoakitso je chjotaxá nga tsín koa̱n ya kuiyotʼachrianlee xíngiaa kʼoa nga tsín kuiyojtián. Ñá xi testigole Jeobá maa, nitjosonñá jmeni xi tso je chjotaxá. Tonga machjén nga kuiyojtián. Kuinga kui tinichjénñá je aplicación xi zoom ʼmi nga kjima tibiyojtián.

 Je Cuerpo Gobernante kʼoasʼin tsakʼéndajin nga je tao̱n xi maña, ya katatjoé choa̱ni nga katabinda je kuenta xi zoom ʼmi ánni nga koa̱n tosi tonda kuiyojtínsíñá. Jebi nʼio tjíobinyakao je jtín, nga̱ tsín chóchjí nga 15 kʼoa tsa 20 dólar chjíle kʼoa tsa tsʼatosaje̱. Kʼianga kjesa bindajin kuenta jebi, je jtín tokuila kisichjén je Zoom xi tsín machjí kʼoa xi tochoa chjota ma faʼasʼen. Tonga kʼianga jetsakinda je kuenta xi tsʼe Zoom, ngisaa nʼio nkjín chjota ma faʼasʼen kʼianga biyojtián kʼoa tsín ti ngotjo ngosa fitsʼaoyani. Ndʼaibi jetsʼato 65, 000 jtín xi tsʼato 170 naxinandá tjínni xi kui kuenta xi tsʼe Zoom síchjén nga batiojtín.

 Ya jtín xi Kairagi ʼmi ya naxinandá Manado (Célebes Septentrional, Indonesia), je ndsʼee xi Hadi Santoso ʼmi kʼoatso josʼin kichomani nga jekui kisichjén je cuenta xi tsʼe Zoom xi toxá tsakindani, itso: “Je ndsʼee xi tsín nʼio nda male síchjén je celular kʼoa tsa tableta, nʼio nda binyáño nga sʼejna kjoajtín, nga̱ tsín ti ngotjo ngosa fitsʼaoyani je Zoom”.

 Je ndsʼee Léster Jijón hijo, xi chjotajchínga sʼin tíjna ya jtín Guayacanes Oeste, xi tíjna ya Guayaquil (Ecuador), itso: “Nga tsín nʼio tse tao̱n tjínle je ndsʼee nʼiojin ñʼai kjima kʼiatsa jelani jtín tjíobʼéchjí je cuenta xi tsʼe Zoom, kʼoa nʼiojin ñʼai koa̱nle je jtín tsa tikʼia koatiojtínni ngatsʼi. Tonga nga toxá tsakindani je cuenta xi tsʼe Zoom, nʼio nkjín xi ma faʼasʼen kʼianga biyojtián ninga tikui tikuini nichxin. Kuinga koa̱n nkjínsa chjota kʼoakʼuínlee kʼianga biyojtián nga̱ nkjín xi ma faʼasʼen je cuenta jebi”.

 Je ndsʼee Johnson Mwanza, xi ya tíjna ya jtín Norte Ngwerere, ya naxinandá Lusaka (Zambia), itso xi kiski: “Nʼio nkjín ndsʼee xi i̱ tso sakʼoa, nga toxá tsakindani je cuenta xi tsʼe Zoom nʼio basenkaoná nga ngisa machriantʼalee je ndsʼee, kʼoa kʼoasʼin bakóniná nga nʼio tsjoakená je Jeobá”.

 Je tao̱n xi tsakindani je cuenta xi tsʼe Zoom yaa kitjoénile je tao̱n xi tíjnatjao xi ya machjén jñani kjoaxkón sʼe. Tao̱n jebi kuiní xi tsjoá chjota jotjín nroajin ni̱ma̱le. Je tao̱n jebi kʼoati ma ya tjen Internet nikasénñá ya donate.pr418.com. Nʼio bʼailaijin kjoanda nga kʼoasʼin bʼao je tao̱n. Je tao̱n xi bʼao kʼoati ya nikasén jñani kjoaxkón sʼe jokji jngo tjíjtsa Sonʼnde (2 Corintios 8:14).