TJENYATOKON KUIYOAA
2023: Koaan tsjoa sʼe̱ tokoán | Jótso je Biblia
Nga jekitsʼia nó 2023 kui xi mená ngatsʼiaa nga nda sʼin kuiyoaa ñá kʼoa kao familianá. Jmé kjoanda xi choyalee.
Jmeni xi tso Biblia tsjoáná kjoachoya
Naskánatso én xi faʼaitʼa ya Biblia, kui tsoyaná nga je kjoa xi tibitjatojiaan kuicho nichxin nga tjóxin. Kʼoatso nga kui xá kichjini Biblia “nga koakoyaná, jméni nga sʼe̱síniná kjoachoyakaokjoa xi totʼatsʼe kjoatsejta kao kjoanijetakon xi tjínle xo̱n Escrituras” (Romanos 15:4).
Tsa mesali jchai kjoachoya xi tsjoá Biblia tʼexkiai jñani tso: “La esperanza real de un mañana mejor”.
Basenkaoná ndʼaibi je kjoachoya xi tsjoáná Biblia
Je kjoachoya xi tsjoá Biblia yaa mangóson “jngo ki̱cha̱ʼba̱” (Hebreos 6:19). Kui xi basenkaoná nga tsín nʼio nikjáojiaan kʼianga tse kjoa bitjatojiaan kʼoa nga tsjoa sʼe tokoán. Kui bakó choa̱ jebi:
Kataʼyai jósʼin tsakasenkao kjoachoya xi tsjoá Biblia jngo chjota xi ñʼai koanle kisikʼéjna jmeni xi nʼio kitsjentʼale. Chótsenlai je video: “Tochan chʼao tsabena josʼin kikoa yaona”.
Kataʼyai josʼin basenkaoná je kjoachoya xi tsjoá Biblia kʼianga xíngiaa biya. Chótsenlai je video: Nʼio aon sʼe tokoán nga jngo xíngiaa nichaa.
Ñaki kuitjoson je kjoachoya xi tsjoáná Biblia
Ninga kʼoasʼin síkjaʼaitsjen je chjota nga ndasʼin kuiyoaa nichxin xi nroaján, alikui ñaki tjíojngo kon tsa kʼoakoa̱n. Tonga jmeni xi tsoná Biblia ñaki kuitjosonní nga̱ tʼatsʼe Jeobá a tínroani je én xi faʼaitʼa, kʼoa je Niná alikui bʼéndiso (Tito 1:2). Tojé Niná xi koa̱nle sitjoson ngayeje jmeni xi tso, tojé xi “kʼoasʼín ngayeje jmeni xi mele” (Salmo 135:5, 6).
Tʼejngui tokuin nga kuitjoson jmeni xi tso Biblia. Xi koasenkaoli nga nʼio sʼe̱jna kjoamakjainli kuinga ngasin nganda chótʼayai je Biblia (Hechos 17:11). A meli chótʼayai je Biblia, tokjoatjaoní. Kui xi koasenkaoli nga tsjoa sʼe̱ tokuin nó 2023.
a Jeobá ʼmi je jaʼaínle Niná (Salmo 83:18).