Jngo tjíjtsa Sonʼnde je chjota xkoa̱ya tjío xi totʼatsʼe kjoa política. Nga nó 2022 je Pew Research Center kui kiskonangile je chjota xi tʼatsʼe política kʼoa kʼoakitso nga tsʼato basen xi kichjonangile xi 19 naxinandá xi kʼoakitso nga tse kjoa tjín ya naxinandále xi totʼatsʼe kjoa política nga̱ kjaʼaí kjaʼaí partido tsjoánganʼiole chjota.

 Ya jñani tijnai, a kʼoati xkoa̱ya sʼin tjío je chjota xi totʼatsʼe kjoa política. Ánni kʼoachonni. Jósʼin sʼe̱ndajin kjoa jebi. Kataʼyala jmeni xi tso je Biblia.

 Ya Biblia “nichxin xi kjoetʼa” tsole nichxin xi tiyoaa ndʼaibi, kʼoa kʼoatso nga nʼio chʼao koa̱nkjoan je chjota kʼoa nga kui xosikao nga tsín jtín sʼin koationi.

•   “Je nichxin xi kjoetʼa kjoaʼaíná kjoañʼai xi tse. Sʼe chjota xi toyaole tsjoake koa̱n, […] xi síkitsón énle” (2 Timoteo 3:1-3).

 Ninga kui xi mele je chjota nga ndasʼin koatio tonga je chjotaxá alikui kjimale tjíobʼéndajin je kjoa xi tjín. Nga kjaʼaí kjaʼaí sʼin síkjaʼaitsjen je chjota nʼio ñʼai male nga síxájtín nga bʼéndajin je kjoa xi tjínle. Tongini kʼoakitso Biblia xi tʼatsʼe jebi.

•   “Je chjota tjíobatéxomale xínkjín nga tjíosíkiʼaon” (Eclesiastés 8:9).

 Tonga ya Biblia kʼoatso nga kuicho nichxin nga ndasʼin kuiyoaa; jngo Chjotaxá tsakasénnda Niná xi kjoaʼaxin ngayeje kjoañʼai xi tiyojiaan.

 Ya Biblia jngo Chjotaxá síkʼaxki̱ xi likui mangóson kao chjotaxá xi tjío ndʼaibi kʼoa xi tjínle nganʼio nga kʼoendajin je kjoa xi tjín. Chjotaxá jebi jéní Jesucristo. Tojé Jesucristo xi koa̱nle nga nyʼán kʼoa jtín sʼin sikatíoná kʼoa tjínle nganʼio nga kʼoasʼin.

•   “Nga kui nichxin, je xi kixi nda kʼoéjna, kʼoa nʼio tse kjoanyʼán sʼe̱” (Salmo 72:7).

•   “Ngatsʼi naxinandá jé sixále” (Salmo 72:11).

 Je Jesús jé xi ngisa nda koatexomaná nga̱ mandosinle xi tʼatsaan kʼoa mele koasenkaoná, mele koasenkao je xi tsín kixi jme xi kjimatʼain.

•   “Kʼoasjentjainí je xi ma̱ tísíjchá yaole xi sijéle nganʼio kʼoa kao xi nangitokon ma kʼoa toʼyani xi tsínle xi basenkao. Skoe̱maa je xi nangitokon ma kao xi ma̱ tísíjchá yaole k’oa k’oasjentjai je xi ma̱ tjío. Kʼoasjentjai xi tʼatsʼe kjoatsʼen kʼoa nga taon ʼya” (Salmo 72:12-14).

 Kataʼyasai tʼatsʼe Chjotaxále Niná, kjoanda xi kjoaʼaíkao kʼoa jmeni xi koa̱n sʼiain nga kʼoainganʼiolai.

•   Chótsenlai je video Jméni je xi kjoatéxomale Niná tsole Biblia.

•   Tʼexkiai jñani tso: “Je Chjotaxále Niná alikui kʼoanacha nga koatexoma”.