Je Consejo de Seguridad de la ONU kʼiaa tsakatiojtín nga 19 sá mayo nó 2022 kʼoa tsʼato 74 chjota xi xángʼa tjínle kicho. Kui tsakjáoyani nga choa tsojmi tjín nga COVID-19 kjima kʼoa nga tíbʼantjaiya jokjimachon sonʼnde kʼoa nga ngisa tiñʼai kjimachonngáni nga kjoajchán kjima ya Ucrania. Xijekoanni, je revista The Economist kʼoakitso nga kjinrá koa̱n jngo tjíjtsa sonʼnde nga kʼoasʼin kjoajchán kjima. Ya Biblia tongini kʼoakitso nga kjinrá koa̱n nichxin xi tiyoaa ndʼaibi, tonga kʼoati kitso jme xi koa̱n sʼiaan nga tsín nʼio si̱kjáojiaan.

•    Je Jesús kʼoakitso nga “kuisótje̱nne naxinandá kontrale xi kjaʼaí naxinandá, kʼoa kjoatéxoma kuisótje̱nne xi kjaʼaí kjoatéxoma. Sʼe̱ chʼin, kʼoa sʼe̱ kjinrá” (Mateo 24:7).

•    Ya libro xi tsʼe Apocalipsis ño naxín síkʼaxki̱. Jngo xi tíjnasonle naxín jebi kjoajchán tsoyanile kʼoa je xi tjenngikale kjinrá tsoyanile. Je én jebi kui tsoyanile nga tochoa tsojmi sʼe̱ kʼoa nga nʼio chjí koa̱n. “Koeni jngo naxínjma. Je xi tíjnasonle tjínle jngo yálibra ya ntsja” (Apocalipsis 6:5, 6).

 Je én jebi ndʼai tíbitjoson nga kjinrá kjima, nichxin xi tiyoaa ndʼaibi “nichxin xi kjoetʼa” tsole Biblia (2 Timoteo 3:1). Tsa mesali jchai jme xi koa̱n “nichxin xi kjoetʼa” kao tʼatsʼe naxín xi síkʼaxki̱ Biblia, chótsenlai je video En 1914 el mundo cambió de rumbo kʼoa tʼexkiai jñani tso: “¿Qué representan los jinetes del Apocalipsis?”.

•    Je Biblia tsjoáná kjoafaʼaitsjen jme xi koa̱n sʼiaan kʼianga ñʼai tjín kjoa bitjatojiaan. Tobʼelañá, kʼianga chjí kjima tsojmi kʼoa nga kjinrá kjima. Tʼexkiai jñani tso: “Cómo vivir con menos”.

•    Je Biblia kʼoati tsjoáná kjoachoya nga nda kuiyoaa nichxin xi sʼa nroa. Kʼoatso nga kuicho nichxin nga toxkia sʼe̱ tsojmi i̱ Sonʼnde kʼoa nga tsín tiʼya xi kjinrá kjoaʼani (Salmo 72:16). Tsa mesali jchai tʼatsʼe kjoachoya jebi, tʼexkiai jñani tso: “La esperanza real de un mañana mejor”.