TJENYATOKON KUIYOAA
Kjoajchán kʼoa kao xi chjotale Cristo tsole yaole | Jótso je Biblia
Nga kjoajchán kjima ya Ucrania nʼio nkjín chjota xi nyatítjonle religión xi ya tjíotsjoánganʼio. Kataʼyai jmeni xi tjíosʼín:
“Chʼa̱sjejeyaa kʼoa kʼoailee kjoanda ngatsʼi je chjotakjoajchánná xi tjíosítoánntjai Ucrania [...]. Tosi tonda kʼoétsʼoantjaijin kʼoa kʼoainganʼiolaijin” (Metropolitano Epifanio I de Kiev, The Jerusalem Post, 16 sá marzo nó 2022).
“Je xi séntítjonle Iglesia ortodoxa rusa jngo mixa̱ tsakʼéjnale nichxin taingo je sondado xi ya tsʼe kʼoa kʼoakitsole nga katasítoánntjai naxinandále nga kʼoasʼin kjoajchán kjima ya Ucrania” (Reuters, 3 sá abril nó 2022).
A ndatjín tsa kjoajchán koaijin je chjotale Cristo. Jótso je Biblia.
Jmeni xi tso Biblia
Ya Biblia kʼoatso nga je xi chjotale Cristo ma alikui tjínnele kjoajchán koaijin.
“Cha̱nisʼain ki̱cha̱li yaxjoa̱le, nga̱ ngatsʼi xi skoé ki̱cha̱, ki̱cha̱ kuiyáni” (Mateo 26:52).
A tísítjoson jmeni xi kitso je Jesús jngo chjota xi kjoajchán tsjoánganʼiole kʼoa tsa ya koaijin.
“Jngo kjoatéxoma chjotse xi tsjoano: Katamatsjoachao xíngio. Josʼin nga an koantsjoake̱no, kʼoasʼin katamatsjoachao xíngio. Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:34, 35).
Jngo chjota xi kjoajchán tsjonjin yaole a tíbakó nga tsjoake xínkjín tojo kitso je Jesús.
Tsa mesali jchai jmeni xi tso je Biblia, tʼexkiai jñani tso: “El cristianismo y la guerra: ¿son compatibles?”.
Jmeni xi tjíosʼín chjotale Cristo nga kjoajchán kjima
A koaan nga tsín kjoajchán tsjónjin yaole je chjotale Cristo. Jaon. Ya Biblia kʼoatso nga “kuichokjetʼa nichxin” nkjín chjota xi xin xin naxinandále xi tsín ti “kjoajchán” koaijinni tojo kitso je Jesús (Isaías 2:2, 4).
Tsa mesali jchai xi tʼatsʼe jebi, tʼexkiai jñani tso: “Jósʼin síkjaʼaitsjen Niná xi tʼatsʼe kjoajchán”.
Je Jeobá, a Niná xi tsʼe kjoanyʼán jé Chjotaxále sichjén nga kʼoasjentjai je chjota “xi tʼatsʼe kjoatsʼen kʼoa nga taon ʼya” (Filipenses 4:9; Salmo 72:14).
Tsa meli jchai jósʼin, chótsenlai je video Jméni je xi kjoatéxomale Niná tsole Biblia.
a Je Niná Jeobá ʼmi (Salmo 83:18).