TJENYATOKON KUIYOAA

Choa tsojmi tísʼe xi totʼatsʼe nga kjoajchán kjima kʼoa nga nʼio sjeya kjima | Jótso je Biblia

TINÓʼYALAI NGA ÉN

Nga kjoajchán kjima ya Ucrania kʼoa nga sakʼoa nʼio sjeya kʼoa nʼio bʼa jtsí kuinga choa tsojmi tísʼeni. Ngisaa ñʼai kjimachon ya naxinandá jñani tse tao̱n tjín.

“Choa tsojmi kjimajchá kʼoa choa tsojmi tísʼe xi totʼatsʼe nga kjoajchán kjima kʼoa nga sakʼoa nʼio sjeya ma kʼoa sakʼoa nʼio bʼa jtsí” (António Guterres, secretario general de las Naciones Unidas, 17 sá julio nó 2023).
“Tjínkʼa chjota xi kʼoatso nga ngisa ñʼai koa̱nchon nga Rusia tsín tixín naxinandá sikasénni je tsojmi, ngisajin choa tsojmi sʼe̱ kʼoa ngisajin chjí koa̱n, ngisaa ya jñani choa tao̱n tjín, joni ya África kao Oriente Medio” (Atalayar.com, 23 sá julio nó 2023).

Kataʼyai jmeni xi tso je Biblia tʼatsʼe nga kʼoasʼin ñʼai kjimachon kʼoa kao jmeni xi koa̱n nichxin xi nroaján.

Ya Biblia kʼoatso nga toxá choa tsojmi sʼe̱ni

Je Jesús i̱ kitso: “Kuisótje̱nne naxinandá kontrale xi kjaʼaí naxinandá, kʼoa kjoatéxoma kuisótje̱nne xi kjaʼaí kjoatéxoma. Sʼe̱ chʼin, kʼoa sʼe̱ kjinrá” (Mateo 24:7).
Ya Biblia ño naxín síkʼaxki̱ xi kui tsoyanile je kjoa xi tísʼe. Jngo naxín xi kui tsoyanile kjoajchán kʼoa je naxín xi tjenngile kjinrá tsoyanile, kui xi tsonile nga choa tsojmi xi ma chine sʼe̱ kʼoa nga nʼio chjí koa̱n. “Kiskotsen, kʼoa koeni jngo naxínjma. Je xi tíjnasonle tjínle jngo yálibra ya ntsja. Kinrʼoele jngo jta̱ […] xi tso: Jao libra trigo nga jngo bixo, kʼoa jaon libra sebada nga jngo bixo [jotjín machjíle chjota nga jngo nichxin]” (Apocalipsis 6:5,6).

Nichxin xi tiyoaa ndʼai tíbitjoson jmeni xi tso je Biblia kʼoa “nichxin xi kjoetʼa” tsole (2 Timoteo 3:1). Tsa mesali jchai tʼatsʼe nichxin xi kjoetʼa kʼoa kao tʼatsʼe je xi ño naxín síkʼaxki̱ ya libro xi tsʼe Apocalipsis koaan chótsenlai je video Tjen nó 1914 tsʼantjaiya jokoanchon kʼoa chótʼai jñani tso “¿Qué representan los jinetes del Apocalipsis?”.

Josʼin koasenkaoli je Biblia

Je kjoafaʼaitsjen xi faʼaitʼa Biblia basenkaoná nga ñʼai tjín kjoa bitjatojiaan, tobʼelañá nga chjí kjima je tsojmi xi chinee kʼoa nga kjinrá kjima. Koaan chótʼai jñani tso “Cómo vivir con menos”.
Ya Biblia kʼoati tsoyaná nga kuicho nichxin nga nda kuiyoaa. Kʼoatso nga “nʼio sʼe̱ tsojmintje i̱ sonʼnde” (Salmo 72:16). Tsa mesali jchai xi tʼatsʼe jebi, tʼexkiai jñani tso “La esperanza real de un mañana mejor”.