Jngo tjíjtsa Sonʼnde nga nó 2022, tsʼato 2,24 billón dólares tao̱n jeya xi tsʼe kjoajchán. Kuinga kʼoakoanni nga kʼoasʼin tíbʼetʼale Rusia je Ucrania. Nga nó 2023 je Instituto Internacional de Investigación para la Paz de Estocolmo i̱ kitso jotjín tao̱n jeya nga nó 2022:

•   Nga kui nó ya Europa “13 por ciento tsakin jotjín tao̱n feya, kui nó jebi nga ngisa tse tao̱n jeya saʼnda nga kisʼejna je Guerra fría”.

•   “Jotjín naxinandá tjín jngo tjíjtsa Sonʼnde, je Rusia 9,2 por ciento tsakin jotjín tao̱n kisikjeya, je maʼaonni tsakai jotjín tao̱n síkjeya tonga ndʼai je majanni”.

•   Tojo je Estados Unidos xi ngisa tse tao̱n kisikje, 39 por ciento kisikje ya kjoajchán xi kisatio”.

 “Kʼianga ngisa tse tao̱n síkje chjota kʼianga batío kjoajchán kui bakó nga sa xkón sa xkón kjimachon je Sonʼnde” (Dr. Nan Tian, coautor del informe SIPRI).

 Je Biblia tongini kʼoakitso nga kʼoetʼale xínkjín je naxinandá xi tse nganʼio tjínle kʼoa kʼoati tso jókoa̱nni sʼe̱ kjoanyʼán.

•   Je Biblia kʼoatso nga nichxin fetʼa ʼmi xi tiyoaa (Daniel 8:19).

•   Je libro xi tsʼe Daniel tongini kʼoakitso nga kʼoetʼale xínkjín je naxinandá xi tsʼe nganʼio tjínle nga to jetífikjetʼa nichxin. Kui xi mele nga kuinje̱le, kʼoa nga kʼoatjíosʼín tse tao̱n tjíosíkjeya (Daniel 11:40, 42, 43).

 Tsa mesali jchai xi tʼatsʼe je én xi tongini kinokjoa chótsenlai je video Josʼin tíbitjoson jmeni xi tso Daniel 11.

•   Je Biblia kʼoatso nga kjoaʼaxin Niná je chjotaxá sonʼnde. “Je Niná xi tíjna ngʼajmi jngoo chjotaxá koasennda xi nikʼiajin tjóxin kʼoa xi tsín kjaʼaí naxinandá koa̱nntsja. Chjotaxá jebi ñaki sixkoa̱ní kʼoa kjoaʼaxinní ngatsʼi chjotaxá xokjoan, kʼoa tojé kʼoéjna ngantsjai nichxin” (Daniel 2:44).

•   Je Jeobá a jeme kʼoasʼin jmeni xi tsínkʼia kʼoakoa̱nle je chjota. Jméni xi sʼin nga kjoaʼaíkao kjoanyʼán. Jé Chjotaxále sichjén nga kjoaʼaxin je kjoatsʼen kʼoa kao ki̱cha̱ kjoajchán (Salmo 46:8, 9).

 Tsa mesali jchai jme xi sʼin Chjotaxále Niná tʼexkiai xi faʼaitʼa je artículo xi ʼmi: “El Reino de Dios traerá ‘paz en abundancia’”.