Surasak Suwanmake/Moment via Getty Images
TJENYATOKON KUIYOAA
Nʼio sjeya kjima jngo tjíjtsa Sonʼnde nó 2023| Jótso je Biblia
Nʼio sjeya kjima jngo tjíjtsa Sonʼnde, ngisaa sjeya kjima tikʼoajinni nó xi tífaʼato. Kataʼyala jmeni xi tso kʼa je chjota tʼatsʼe jebi:
“Jejngo siento kao jankan kao teño nó nga tísʼechoa̱ jokji sjeya kjima jngo tjíjtsa Sonʼnde, kʼoa sá junio kʼiaa nga ngisasa sjeya koan” (Oficina Nacional de Administración Oceánica y Atmosférica, Departamento de Comercio de Estados Unidos, 13 sá julio nó 2023).
“Ya Italia, España, Francia, Alemania kao Polonia nʼio sjeya kjima kʼoa tochale kuicho xi 48 ºC ya Sicilia kao Cerdeña. Tochale ndʼai nga ngisasa nʼio sjeya kjima i̱ Europa” (Agencia Espacial Europea, 13 sá julio nó 2023).
“Nga kʼoasʼin nʼio sjeya kjima kui xosikao nga ngisa kjitʼa kʼoa nga ngisa nʼio kʼoa̱ jtsí kʼoa nkjín ʼnde jñani jtséndá” (Stefan Uhlenbrook, director de la Sección de Hidrología, Recursos Hídricos y Criosfera de la Organización Meteorológica Mundial, 17 sá julio nó 2023).
A makaojinli je én xi tjín nga nʼio sjeya kjima kʼoa nga nʼio bʼa jtsí. Je Biblia bakóya xi tʼatsʼe jebi.
A tsoya Biblia nga nʼio sjeya koa̱n kʼoa nga nʼio kʼoa̱ jtsí nichxin xi tiyoaa ndʼai
Jaon. Ya Biblia kʼoatso nga kʼoantjaiya jmeni xi koa̱n nichxin xi tiyoaa ndʼai. Tobʼelaña, je Jesús kʼoakitso nga sʼe̱ “choa̱xkón” (Lucas 21:11). Nʼio nkjín chjota xi makjaojinle nga nʼio sjeya kjima kʼoa kʼoasʼin síkjaʼaitsjen nga tiñá si̱kjesonñá Sonʼnde.
A kuicho nichxin nga liʼya xi tikoationi i̱ Sonʼnde
Mai. Je Niná kui xá kisindani Sonʼnde nga koa̱n kuiyoaa ngantsjai nichxin kʼoa likui tsjoáʼnde nga je chjota sikitsón (Salmo 115:16; Eclesiastés 1:4). Kʼoa kʼoatso nga sikjeson je xi síkitsón Sonʼnde (Apocalipsis 11:18).
Je Biblia bakóyaná nga je Niná likui tsjoáʼnde nga tjín xi koa̱nle je Sonʼnde.
“[Niná] bʼéchjoale ntjao̱xkón; bʼejnaʼyo je xóle ndáchikon” (Salmo 107:29). Niná koaanle kʼoendaya jñani tíbitson je Sonʼnde ánni nga tsín nʼio sjeya koa̱nni kʼoa nga tsín nʼio kʼoani jtsí, nga kʼoama nʼio tse kjoañʼai biyojiaan.
“Tinikuindaní je nangi kʼianga nʼio katasʼe tsojmi kʼoa nga nda katama tsojmintje” (Salmo 65:9). Je Niná ʼndenaxó sikao je Sonʼnde.
Tsa mesali jchai josʼin kuitjoson jmeni xi tso je Biblia xi tʼatsʼe Sonʼnde tʼexkiai jñani tso “¿Quién salvará el planeta?”.