TJENYATOKON KUIYOAA
Nʼio nkjín millón dólar tífeya nga kjoajchán tjíosatío | Tonga jmésa kjoa xi tísʼe
Nʼio tse tao̱n feya nga kjoajchán satío.
“Nga kʼoasʼin kjoajchán tjíosatío 2,2 billón dólar tífeya” (The Washington Post, 13 de febrero de 2024).
Tonga ali tsa totao̱njin xi tífeya. Kuila si̱kʼaxkiaa jme xi kjima nga kjoajchán tísʼejna ya Ucrania.
Sondado. Mela 500,000 sondado xi kitsiʼaon kʼoa xi kʼien saʼnda nga kitsʼia kjoajchán nichxin jao nóján.
Xi toxkia chjota. Je Naciones Unidas kʼoatso nga tsʼato 28,000 xi toxkia chjota xi kitsiʼaon kʼoa xi kʼien kʼianga kjoajchán tísʼejna. Tonga jngo chjota xi xángʼa tjínle ya Naciones Unidas kʼoakitso nga tsesa kjoa tjíofaʼatojin je chjota”. a
Nʼio tse kjoa tjíofaʼatojin je chjota jngo tjíjtsa sonʼnde xi totʼatsʼe kjoajchán xi tjíosatío.
114 millón. Kʼoatjín chjota xi xin kikatio xi totʼatsʼe nga kjoajchán tjín ʼndele, fitsʼiakjoanni sá septiembre nó 2023.
783 millón. Kʼoatjín mani chjota xi kjinrá tjíofaʼá. “Ya naxinandá jñani kjoajchán kjima yaa jñani ngisasa nkjín chjota xi kjinrá tjíofaʼá” (Programa Mundial de Alimentos).
Jótso Biblia, a kuicho nichxin nga tsín tisʼe̱ni kjoajchán, nga nda sʼin kuiyoaa kʼoa nga tsín tisʼeni kjinrá.
Kjoajchán
Ya Biblia kʼoatso nga toxá kjoajchán sʼe̱ni kʼoa kui síngósonkao jngo chjota xi naxín tíjnasonle.
“Jitjo ngi jngo naxín xi ní kji. Je xi tíjnasonle kitsʼaile ʼnde nga kjoaʼaxin xi nyʼán chon xi tsʼe sonʼnde, nga sikʼensíni xínkjín. Kitsʼaile jngo ki̱cha̱spada xi nʼio je” (Apocalipsis 6:4).
Ya Biblia kʼoati síkʼaxki̱sa ngi jao chjota xi naxín tjíosonle xi kui tsoyanile kjinrá kʼoa nga nkjín chjota tjíobiya xi totʼatsʼe chʼin xi tísʼe (Apocalipsis 6:5-8). Tsa mesali jchai josʼin tíbitjoson jmeni xi tso je Biblia, tʼexkiai jñani tso “¿Qué representan los jinetes del Apocalipsis?”
Kjoanyʼán
Nichxin xi nroaján alikui tisʼeni kjoajchán tonga ali tsa je chjota kʼoendajin kjoa jebi. Je Biblia itso:
Je Niná “kjoaʼaxin kjoajchán ngakjijnda sonʼnde” (Salmo 46:9).
Niná kjoaʼaxin je kjoañʼai xi tjíojin chjota xi totʼatsʼe kjoajchán. “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato” (Apocalipsis 21:4).
Je Niná kʼoatso nga ndasʼin kuiyoaa. Itso: “Je naxinandána yaa koatio jngo ʼnde jñani tjín kjoanyʼán, ya jñani tsín kjoajkon, kʼoa ya jñani koa̱n sikjáya” (Isaías 32:18).
Je Biblia kʼoatso nga je kjoajchán kʼoa kao jmesani xi kjima nichxin xi tiyoaa ndʼai kui tsoyanile nga jeme koa̱nndachon sonʼnde.
Jméni xi sʼin Niná nga kjoaʼaíkao kjoanyʼán. Kui Chjotaxále sichjén (Mateo 6:10) Tsa meli jchai tʼatsʼe Chjotaxále Niná kʼoa jmeni xi sʼin chótsenlai video: Jméni je xi kjoatéxomale Niná tsole Biblia
a Miroslav Jenča, subsecretario general de Europa de la ONU (6 de diciembre de 2023).