Kataʼyai jmeni xi tso je xi nyatítjonle religión tʼatsʼe kjoajchán xi kjima ya Ucrania.

•   “Je xi Kirill ʼmi xi séntítjonle Iglesia ortodoxa rusa, alikui jme xi títso tʼatsʼe nga kjoajchán kjima ya Ucrania […]. Jmeni xi tjíotso religión jebi tʼatsʼe Ucrania yaa tíbʼangini Putin nga kjoajchán tíbʼéjna” (EUobserver, 7 sá marzo nó 2022).

•   “Je Kirill […] kʼoatítso nga tse jée tíbajngi Ucrania kʼoa nga kui kʼoakjimatʼainni. Nga kʼoatítso kui xi mele nga kʼoasʼin katasíkjaʼaitsjen je chjota nga nda tísʼín naxinandále nga kjoajchán tíbichókaone Ucrania” (AP News, 8 sá marzo nó 2022).

•   “Je xi Epifanio I ʼmi xi ya tíjna naxinandá Kiev, xi séntítjonle Iglesia ortodoxa ucraniana, nichxin lune kisichikontʼain naxinandá kʼoa kʼoakitsole nga katakján kao sondado xi Rusia tsʼe. Kʼoati kitso nga tsín chʼaotjín tsa sondado xi Rusia tsʼe sikʼien” (The Jerusalem Post, 16 sá marzo nó 2022).

•   “Bʼainganʼiolaijin ngatsʼi sondado xi tsʼe Ucrania kao ngatsʼi xi tjíobinyakaonajin. Bʼailaijin kjoanda nga tjíotsjoánganʼionajin nga tjíosítoánntjai Ucrania kʼoa bʼetsʼoantjainíjin (Declaración del Consejo de Iglesias y Organizaciones Religiosas de Ucrania, a 24 sá febrero nó 2022).

 Jósingái ji, a nda tjíosʼín je xi nyatítjonle religión nga kjoajchán tjíobʼétejin je chjotale. Jótso Biblia tʼatsʼe jebi.

Jmeni xi tjíosʼín religión nga kjoajchán tísʼe

 Je religión xi kʼoatso nga mele nga kjoanyʼán katasʼe tosa tjíotsjoánganʼio nga kjoajchán tísʼe. Je testigole Jeobá jenkjín nó nga kʼoatjíotso nga tsín ndatjín nga kʼoatjíosʼín je religión. Itso kʼa jmeni xi faʼaitʼa je xo̱n xi chʼasjaijin:

•   Ya jñani “Las cruzadas: ‘trágica ilusión’” tso, kui tsoya nga je Iglesia católica romana jé xokisʼin nga nkjín chjota kinikʼien kʼoa kʼoakitso nga totʼatsʼe Niná kʼoa kao Cristo nga kʼoakisʼin.

•   Ya jñani “La Iglesia Católica y África” tso, kui tsoya nga tsín koanle je religión nga tsakʼéchjoa nga kjoabixkan kisʼe kʼoa nga nkjín chjota kinikʼien.

•   Ya jñani “¿Tiene la culpa la religión?”, “El papel de la religión en las guerras” kʼoa kao ya jñani “La religión toma partido” tso, kui tsoya nga je xi nyatítjonle chjota católico, ortodoxo kao protestante tsjoánganʼio nga kjoajchán sʼe.

A ndatjín nga je religión xi chjotale Cristo tsole yaole tsjoánganʼio nga kjoajchán sʼe

 Jmeni xi kitso Jesús: “Katamatsjoachai xikʼa joni nga tijini” (Mateo 22:39). “Katamatsjoachao xi jtikeno” (Mateo 5:44-47).

 Jmeni xi kitso Jesús: “Je kjoatéxomana likui tsʼe i̱ sonʼndebi. Tsa tsʼe sonʼndebi je kjoatéxomana, je chjotana skanla, jméni nga tsínkui cha̱nitʼasínina chjota judíos” (Juan 18:36). “Ngatsʼi xi skoé ki̱cha̱, ki̱cha̱ kuiyáni” (Mateo 26:47-52).

 Tikjaʼaitsjain jebi: Je Jesús kʼoakitsole je chjotatjenngile nga tsín ki̱cha̱ katakjoé nga sitoánntjai, a ndatjín tsa kjaʼaí kjoa sitoánntjai. Tsa meli jchai jokisʼin je chjotatjenngile Cristo xi tsakatio nichxin kjoatse xi kisitjoson jmeni xi kitsole je Jesús, tʼexkiai jñani tso: “El cristianismo y la guerra: ¿son compatibles?”.

Jméni xi koa̱nle je religión xi kjoajchán tsjoánganʼiole

 Tjín religión xi kʼoatso nga sítjoson jmeni xi kitsoya Jesús, tonga kʼianga kjoa faʼatojin alikuini kʼoasʼín. Ya Biblia kʼoatso nga je Niná alikui sasénle je religión xi kʼoasʼín (Mateo 7:21-23; Tito 1:16).

•   Ya Apocalipsis kʼoatso je Niná nga je religión tjínle jée tʼatsʼe “ngatsʼi xi kʼoasʼin jekʼen i̱ sonʼndebi” (Apocalipsis 18:21, 24). Tsa meli jchai ánni kʼoatsoni, tʼexkiai jñani tso: “¿Qué es Babilonia la Grande?”.

•   Je Jesús kʼoakitso nga Niná kjoaʼaxin ngatsʼi religión xi kui kʼoasʼín xi chʼaotjín, tojo nikao jngo yá xi tsín nda to bale, “tiní, kʼoa sʼejin lʼí” (Mateo 7:15-20). Tsa meli jchai xi tʼatsʼe jebi, tʼexkiai jñani tso: “¡Se acerca el fin de la religión falsa!”.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images