TJENYATOKON KUIYOAA
Nʼio nkjín chjota tjíonikʼien | Jótso je Biblia
Nga sá julio nó 2022, nʼio nkjín chjota xi chʼinsá tjíonikʼienni jngo tjíjtsa sonʼnde:
“Kʼianga kinikʼien je chjota político xi nʼio tsaʼyale Japón [Shinzo Abe xi primer ministro koan] nʼio kisikjáojin je chjota jngo tjíjtsa sonʼnde, nga̱ i̱ Japón kjesa jña kʼoamajin kʼoa je kjoatéxoma alikui tsjoáʼnde nga ʼya xi kui ki̱cha̱ bʼa xi síkʼienni xínkjín chjota” (10 sá julio nó 2022, The Japan Times).
“Ya Copenhague Dinamarca jngo chjota xi jan chjota kisikʼien ya jñani nkjín tsojmi saténa” (4 sá julio nó 2022, Reuters).
“Sudáfrica: jngo bar xi tíjna Soweto nkjín chjota jaʼasʼen kʼoa 15 chjota kisikʼien xi chʼinsá tsakʼéle” (10 sá julio nó 2022, The Guardian).
“Tsʼato 220 chjota xi chʼinsá kinikʼienni ya Estados Unidos kʼianga tífe xomana nga kisʼejna sʼuí nga 4 sá julio” (5 sá julio nó 2022, CBS News).
A chaan kuicho nichxin nga tjóxin kjoatsʼen. Jótso je Biblia.
Nga tjóxin kjoatsʼen
Ya Biblia kʼoatso nga “nichxin xi kjoetʼa” tiyoaa ndʼaibi, kuinga nʼio tsʼenni ndʼaibi je chjota kʼoa jo cho̱ sʼín (2 Timoteo 3:1, 3). Nga kʼoasikji kjoatsʼen tjín nʼio tsokjón je chjota (Lucas 21:11). Tonga ya Biblia kʼoatso nga kuicho nichxin nga tjóxin je kjoatsʼen kʼoa nga ya koatio je chjota “jñani tjín kjoanyʼán, ya jñani tsín kjoajkon, kʼoa ya jñani koa̱n sikjáya” (Isaías 32:18). Tonga, ʼyáni xi koa̱nle kjoaʼaxin je kjoatsʼen.
Jé Niná kjoaʼaxin je chjotatsʼen kao ki̱cha̱ xi síchjén
“Tonga je xi tsʼen tjóxin i̱ sonʼnde, kʼoa tjóneyaa je xi bʼanacha” (Proverbios 2:22).
“[Je Niná] kjoaʼaxin kjoajchán ngakjijnda sonʼnde. Sixkoaa je arco kʼoa ñaki nkjínya sʼin je lanza; kʼoa jinlʼí koakajin je carretale chjotakjoajchán” (Salmo 46:9).
Jé Niná kuitsoyaná josʼiaan nga nyʼán sʼin kuiyoaa ánni nga tsín ti kjoatsʼen sʼe̱ni
“Aliʼya xi sikiʼaon kʼoa alijme xi sikitsón ngakjijngo nindo tsjena, nga̱ ñaki kui kjoankjíntokonle Jeobá sʼe̱ ngakjijnda sonʼnde josʼin kijna jngojngo je nandá ya ndáchikon” (Isaías 11:9).
Nichxin xi tiyoaa ndʼaibi, je Niná títsoyaná ngatsʼiaa nga tsín tsʼen katamaa. “Ki̱cha̱bʼenyi sikʼóya espadale kʼoa ki̱cha̱ oso sikʼóya ki̱cha̱ lanzale” (Miqueas 4:3).
Tsa mesali jchai jmeni xi tso je Biblia jokoa̱n nichxin xi sʼa nroa nga tsín tijme xi kuijkónnilee, tʼexkiai jñani tso: “¿Es posible librarse del miedo?”.
Tsa mesali jchai josʼin tjóxin je kjoatsʼen xi tjín sonʼnde, tʼexkiai jñani tso: “¡Por fin paz en la Tierra!”.