TJENYATOKON KUIYOAA
Tíbitson je Son’nde | Jótso je Biblia
Kʼianga 4 sá abril nó 2022 je secretario general de la Naciones Unidas xi António Guterres ʼmi kʼoakitso nga kinchjaya nga ngotjo tíbʼantjaiyani Sonʼnde. Nga tjín ʼnde jña títsendá, jñani nʼio sjeya kjima kʼoa nga nʼiosa nkjín kjoaxkón tísʼe. Kʼoakitsosa nga tjín naxinandá jñani tífe nandá kʼoa nga nʼio nkjín cho̱ kao xka̱ tíchangi kʼoa nga tsín nda tíbichómani jmeni xi tinʼia.
Nga 15 sá junio nó 2022 je The New York Times kʼoakitso nga je chjota científico kʼoatjíotso nga jngo jao jan nójan kʼoetʼale je xi 423 parque tjío ya Estados Unidos nga kʼoasʼin nʼio sjeya kjima. Nga kjoañʼai choyalee tojo tso ya Biblia: Nga títingi, nga títsendá, nga tímanandá nyʼán, nga kjimaje ndáchikon kʼoa nga nʼio sjeya kjima.
A kuichoka nichxin nga tjóxin je kjoa xi tísʼe. ʼYáni xi koa̱nle kjoaʼaxin. Kataʼyai jmeni xi tso Biblia.
Ya Biblia tongini kʼoakitso jme xi kjima nga tíbitson Sonʼnde
Ya Biblia kʼoatso nga je Niná kuichoka nichxin nga kjoaʼaxin “je xi sikitsón sonʼnde” (Apocalipsis 11:18). Versículo jebi jan koya tjínni xi tsoyaná:
1. Je chjota tísíkitsón je Sonʼnde.
2. Koaan sʼe̱ndajin ninga kʼoasʼin tíbitson je Sonʼnde.
3. Tojé Niná xi koa̱nle kʼoendajin je kjoa xi tísʼe i̱ Sonʼnde.
Kuicho nichxin nga nda koa̱nchon Sonʼnde
Ya Biblia kʼoatso nga “je sonʼnde tíjna ngantsjai nichxin” (Eclesiastés 1:4). Tsín kʼia nga tsín chjota koatioson i̱ Sonʼnde.
“Je xi kixi tsʼee koa̱n sonʼnde kʼoa i koatio ngantsjai nichxin” (Salmo 37:29).
Kuicho nichxin nga naskánakoa̱nchon i̱ Sonʼnde.
“Ya ʼndekixí kao jñani tokijna tsjotsjo sʼee kjoatsjoa, kʼoa ya ʼndekixí jñani son chon tsjoa koa̱nle kʼoa xóngaa joma je azafrán” (Isaías 35:1).