Jótso je Biblia nga tochoa nandá tísʼe
Ngatsʼiaa nandá machjénná nga kuiyochoán. Je secretario general de la ONU António Guterres i kitso: “Jngo tjíjtsa Sonʼnde nandá machjénná tonga nʼio choa tjín”. Millón chjota xi ñʼai male nga sokóle nandá.
Strdel/AFP via Getty Images
A kuicho nichxin nga tsín tiñʼai koa̱nniná nandá. Axo sa ñʼai sa ñʼai koa̱nchon. Jótso je Biblia.
Jótso je Biblia tʼatsʼe nandá
Je Biblia kʼoatso nga kuicho nichxin nga tsín tiñʼai koa̱nniná je nandá. Kʼoatso nga nʼio tse nandá sʼe̱.
“Kʼoa ya ʼndekixí kuitjoo nandá, kʼoa kjoai nandá jñani tokijna tsjotsjo. Ya nangi jñani kixí chon xi totʼatsʼe ndoá nandá xinyá” (Isaías 35:6, 7).
Ánni koa̱n koa̱nkjainniná jotso je Biblia xi tʼatsʼe jebi. Kataʼyai jmeni xi tso Biblia xi tʼatsʼe josʼin kisinda Sonʼnde je Niná.
Jmeni xi tso je Biblia tʼatsʼe Sonʼnde kao joma je nandá nga jtsí ma ijngokʼa
Niná “tsín tsa tokjoatjao kisinda [Sonʼnde], nga kui xá kisindani nga chjota koatioson” (Isaías 45:18).
Je Niná kʼoasʼin kisinda je Sonʼnde nga koa̱n kuiyochoán, kʼoasʼin tsakʼénda nga katasʼe nandá xi ʼyoá.
Niná “síkin je nandá, mingʼa nd’aile nga jtsí mʼónya. Xijema, kʼiaa bʼa jtsí” (Job 36:27, 28).
Texto jebi kui tsoya josʼin tsakʼénda Niná je nandá nga tsín katafe kʼoa nga tijé matsjeni. Kʼianga sjeya ma, je ndáchikon kao jñasani nga tjín nandá mingʼa ndʼaile kʼoa kui xi yojbi ma kʼoa xijema kʼiaa bʼa jtsí, kʼoakjima ʼndeʼnde je nandá kʼoa kui xi machjénná kʼoa kʼoati kui xi machjénle je cho̱ (Eclesiastés 1:7; Amós 5:8).
“An tsjoano je jtsí nga kuicho cha̱nle kʼoa koa̱nntje jmeni xi sʼe̱ntjejin nangi kʼoa je yá koale to” (Levítico 26:4).
Je Niná kʼoakitsole chjota israelita nga je sichikontʼain, nga kjitʼa tsjoále nandá ánni nga nda koa̱nni tsojmintjele, je Jeobá be nga nandá machjénle je tsojmintje.
Jokisikao Jeobá je naxinandá Israel, kʼoati sʼin xi kao je Sonʼnde nichxin xi nroaján (Isaías 30:23). Tonga nichxin xi tiyoaa ndʼaibi nʼio ñʼai kjima je nandá kʼoa sʼa ñʼai sʼa ñʼai kjimachon, jngo koya anni kʼoakjimani kuinga tsín bʼa jtsí. Je Biblia tsoya nga kuicho nichxin nga tsín tiñʼai koa̱nni nandá.
Kʼianga tsín tiñʼai koa̱nni je nandá
Je Biblia kʼoatso nga je Chjotaxále Niná kʼoendajin je kjoa xi tjín Sonʼnde, jolani nga ñʼai kjima je nandá (Mateo 6:9, 10). Tojé koatexoma jngo tjíjtsa Sonʼnde (Daniel 2:44; Apocalipsis 11:15). Kjoaʼaxin jmeni xi tsín kjimale tjíofaʼáxin je chjotaxá. Nga koatexoma je Chjotaxále Niná alikui tiñʼai koa̱nni nandá.
Jñá nroani kjoa: Nga sakʼoa nʼio bʼa jtsí kʼoa nʼio sjeya ma tíbʼantjaiyaa jokjimachon, tjín ʼnde jñani tíxí kʼoa tjín jñani títsendá kʼoa kui kʼoakjimani nga nʼio bʼa jtsí kʼoa tsa ʼmi je ndáchikon.
Jósʼin sʼe̱ndajin: Je Chjotaxále Niná kʼoendaya nga kʼoasʼin tíbitson je Sonʼnde. Je Niná itso: “Koeni an sichjotse ngayije” (Apocalipsis 21:5). Je nangi jñani kixí chon sʼe nandá xi ma ʼyoá, nga kui nichxin koaan kuiyoaa tojñani. (Isaías 41:17-20). Je xi Rey sʼin tíjnale Chjotaxále Niná jéní Jesucristo kʼoa tjínle nganʼio nga kjoaʼaxin kjoaxkón xi tísʼe.
Kʼianga tsakʼejna Jesús i̱ Sonʼnde kisikʼéjnajyo jtsíntjao̱nʼio kʼoa kʼoasʼin tsakakóni je nganʼio xi kitsjoale Nʼaile (Marcos 4:39, 41). Kʼianga koatexoma Jesús i̱ Sonʼnde alikui tisʼeni kjoaxkón. Je chjota nyʼán koatio kʼoa alikui tijme xi tsokjonnile.
Jñá nroani kjoa: Je chjota xi likui kuenta sʼín jme kjoa xi tjín Sonʼnde kao je negocio xi to kjoanyiná fitjenngi tjíosíjndí je xo̱ngá kʼoa jñani tjín nandá, kʼoa kui nga sa choa sa choa nandá tísʼeni.
Jósʼin sʼe̱ndajin: Je Niná si̱tsje Sonʼnde, xo̱ngá, ndáchikon kʼoa kao nangi. ʼNdenaxó sikao je Sonʼnde. Je Biblia itso: “Ya ʼndekixí kao jñani tokijna tsjotsjo sʼee kjoatsjoa, kʼoa ya ʼndekixí jñani son chon tsjoa koa̱nle kʼoa xóngaa joma je azafrán” (Isaías 35:1).
Jméni xi koa̱nle je chjota xi tsín kuenta tjíosʼín nga tíbitson je Sonʼnde kʼoa xi tsín mandosinle tʼatsʼe xi kjaʼaí. Niná kʼoatso nga kjoaʼaxin “je xi sikitsón sonʼnde” (Apocalipsis 11:18; Proverbios2:21, 22).
Jñá nroani kjoa: Je chjota likui nda tjíosíchjén je nandá kʼoa kuinga nga tsín masonni.
Jósʼin sʼe̱ndajin: Je Chjotaxále Niná kui kʼoasʼin josʼin mele Niná, alikui kui kʼoasʼin jmeni xi mele chjota xi to yaole fini (Mateo 6:9, 10). Je Chjotaxále Niná koasenkaoná nga nda sʼiaan. Itso Isaías 11:9: “Kui kjoankjíntokonle Jeobá sʼe̱ ngakjijnda sonʼnde”. a Je kjoankjíntokon xi sʼe̱le je chjota kao kjoatsjoacha xi sʼe̱le xi kao Jeobá kʼoa kao jme xi kisinda kui xi kuinyakao nga nda sikuinda je Sonʼnde.
Tsa mesali jchai jmeni xi sʼin je Chjotaxále Niná, tʼexkiai jñani tso: “Jméni xi sʼin je Chjotaxále Niná”.
Koaan kʼoéxkiai Biblia ya capítulo 35 xi tsʼe Isaías ánni nga jchani jme xi sʼin je Niná nga ʼndenaxó sikao je Sonʼnde.
Chótsenlai je video Jmé xá kisindani Niná je Sonʼnde ánni nga jchani jmeni xi tjínndajinle Niná xi kao Sonʼnde kʼoa kao chjota.
a Jeobá ʼmi je jaʼaínle Niná (Salmo 83:18). Tʼexkiai artículo jebi “ʼYáni xi Jeobá ʼmi”.
Tsa kʼoati meli jchai xi tʼatsʼe jebi
TJENYATOKON KUIYOAA
Nʼio sjeya kjima | Jótso je Biblia
A koaan sʼe̱ndajin kjoa jebi. A chaan tsín tisjeya koa̱nni.
XI MACHJÉN NGA JCHAA
Jméni je xi kjoatéxomale Niná tsole Biblia
Nga kitsoyason je Jesús, je xi ngisa kinchja̱ni kui tʼatsʼe kjoatéxomale Niná. Jenkjín siento nó nga kui tjíosíjé chjotale Jesús nga katanroa kjoatéxoma jebi.
XI TʼATSAINJIN
Tijái nga kataʼmiyali Biblia
Kataʼyai jme xi tsoya Biblia kʼoa tsa tʼatsʼe testigole Jeobá.
