Nga totaon ʼya je xi yánchjín | Jótso je Biblia
Ngakjijnda sonʼnde millón mani je yánchjín xi totaon ʼya, kʼoanikao ninga sʼa ʼndí kjoan kʼoa ninga jejchínga. A kʼoakjimatʼain ji. Je Niná mele nga nda kuijnai. Kataʼyai jmeni xi sʼin nga tsínti totaon jchani je xi yánchjín.
“Kʼianga sʼa ʼndí kjiʼe̱ je tindsʼe totaon tsabena ngantsjai. Kʼoa kʼianga jechixan totaon tsabena je na̱le xʼinna. To choʼnda sʼin tsabekonna je xijchále xʼinna. Koanmena kisikʼien yaona” (Madhu, a India).
Je Organización Mundial de la Salud kʼoatso “nga totaon ʼya je xi yánchjín ngakjijnda sonʼnde”. Nga jan yánchjín jngola xi totaon ʼya kʼoa tsa ʼyataon.
Tsa kʼoakoantʼain tsakui nichxin kʼoasʼin nikjaʼaitsjain nga kʼoakoa̱ntʼain tojñani kʼuín, nga totaon skoe̱li chjota kʼoa nga skoe̱taonli. Nga kʼoasʼin totaon ʼya je xi yánchjín tsakui nichxin kʼoasʼin nikjaʼaitsjain nga tsín bechjí chjota je xi yánchjín. Tonga jósʼin síkjaʼaitsjen Niná.
Je Biblia kʼoatso nga kui xi mele Niná nga nda katabatio je xi yánchjín
Jósʼin bekon Niná je xi yánchjín
Texto xi tsʼe Biblia: Jé Niná “kisinda je xʼin kao je chjoón” (Génesis 1:27).
Xi tsoyanile: Jé Niná kisinda je chjoón kao je xʼin kʼoa ngóson kji chjí be nga jao. Je Niná itsole je xi xʼin: “Tsjoacha katamao yánchjínno, josʼin tsjoachao yaono”. Je xʼin alikui tjínnele nga totaon skoe̱ je chjoónle kʼoa nga kuinchja̱tikao (Efesios 5:33; Colosenses 3:19). Je Niná alikui mele nga totaon jcha je xi yánchjín.
“Kʼianga sʼa ʼndí kjiʼe̱ nkjín xíngia xi tsabetaonna. Kʼianga 17 nóna, je naina kʼoakitsona nga tsín titsjoáxánina tsa tsín koajnakoa. Kʼoa saʼnda ndʼaibi totaon bena je xʼinna, xijchána kʼoa kao chjota ndaindʼiana. Tonga nga tsaʼbe xi tʼatsʼe Jeobá b je xi kisindaná tsaʼbeña nga bechjí je xi yánchjín. ’Beña nga tsjoakena kʼoa nga bechjína” (Maria, Argentina).
Jmé xi koasenkaoli nga nda sʼe̱ tokuin
Texto xi tsʼe Biblia: “Tíjnaa jngo miyo xi ngisa tsjentʼalee tikʼoajinni jngo xi ñaki ndsʼee mani” (Proverbios 18:24).
Xi tsoyanile: Je miyoli koasenkaoli. Tsa meli tʼeyanajmílai jotjín tokuin je xi miyoli ma.
“20 nó nga tsín ʼya xi tsakʼeyanajmíle nga tsaʼyataonna. Alikui nda kisʼe koan, ba kisʼe tokoan kʼoa ansiedad kisʼena tonga nga chan tsakʼeyanajmíle xi kjaʼaí, ñaki nda kisʼe tokoan” (Elif, Turquía).
Texto xi tsʼe Biblia: “Je [Niná] tikʼamio ngayije kjoanikjáojinno, nga̱ je tísíkuindano” (1 Pedro 5:7).
Xi tsoyanile: Kʼiatsa kʼoétsʼoalai Niná kjuinrʼoéli (Salmo 55:22; 65:2). Je Niná mandosinle xi tʼatsi kʼoa koasenkaoli nga chjí jchatokuin yaoli.
“Nga tsaʼbe xi tʼatsʼe Jeobá kui xi tsakasenkaona nga tsín tinʼio aon kisʼeni tokoan, ma bʼetsʼoale Jeobá kʼoa kʼoaxinle jotjín tokoan. Je ya mangóson jngo miyo xi majinle jotjín tokoan” (Ana, Belice).
A kuicho nichxin nga tsín titsjoáʼndeni Niná nga totaon jcha je xi yánchjín
Texto xi tsʼe Biblia: “[Jeobá] kuisenkaoní je xi jchʼa̱n kʼoa xi totaon ʼya ánni nga tsín chjota tsokjonnile” (Salmo 10:18).
Xi tsoyanile: Je Niná jeme kjoaʼaxin ngayeje xi chʼaotjín jolani nga totaon ʼya je xi yánchjín.
“Ñaki nda sʼe tokoan nga ʼbe nga jeme kʼoendajin Jeobá kjoa jebi, nga tsínti totaon jchani je xi yánchjín ni je xi sʼa ʼndí ni je xi jejchínga. Nyʼán sʼe tokoan” (Roberta, México).
Tsa mesali jchai tʼatsʼe kjoachoya xi tsjoá Biblia kʼoa ánni koa̱n koa̱nkjainnili jmeni xi tso kʼoa tsa meli jchai josʼin tsoya je testigole Jeobá tijái nga kataʼmiyali Biblia.
a Alikui tsa ñaki kʼoaʼmi.
b Ya Biblia kʼoatso nga Jeobá ʼmi je Niná (Salmo 83:18) Tʼexkiai jñani tso: “ʼYáni xi Jeobá ʼmi”