1. Jósʼin bakóná je choa̱le Mary Decker nga tsín koa̱n toya tje̱n kuijnaa tsa ska̱tsʼotjeen nga titokanachaa.

JE Mary Decker tosʼa tsoti kʼianga tsakʼétsʼiakao nga kitokanacha kʼoa nʼio tsaʼyale. Kʼianga nó 1984 nga kisʼejna je xi Juegos Olímpicos ʼmi nkjín chjota xi kʼoasʼin kisikjaʼaitsjen nga je kuinje̱le medalla xi tsʼe oro. Tonga tjín xi koanle. Kʼianga títokanacha xi jan jmi metro, je Mary Decker yaa kisatengi ndso̱ko̱ je xi ñatje̱n tjíotokanacha kʼoa kiskatsʼotjen. Ñaki kiskiʼndá. Kʼoa alikuini kicho jña tje̱n tjínnele kuicho tsakai. Tonga alikui kisikʼéjna xá jebi ninga kʼoakoan. Saʼnda tsín jngo nó nga tikitokanachangáni xi jngo jmi kao jaon siento metro kʼianga nó 1985, kʼoa jé xi ngisasa nʼio kitoka tikʼoajinni xi ngikʼa.

2. Jósʼin titokanachaa ñá xi chjotale Cristo maa kʼoa jméni xi mená kuichotjenngiaa.

² Kʼianga chjotale Cristo maa kʼoati jngoyale titokanachaa kʼoa kui xi mená nga kuichotjenngiaa kjoabijnachon xi tsínkʼia fetʼa. Xi ngisa chjíle alikuijin nga ngotjo tókañá. Tonga kʼoati tsínkui xi tsonile tsa tobijbi tókaa kʼoa tsa nikjáya sakʼoaa. Je xi titokaa ñá, yaa mangóson je xi nʼio kjin toka, je xi maratón ʼmi. Jngo xi kjin toka machjén nga chókjoale saʼnda nga kuicho jñani tje̱n tíchoyale. Ya naxinandá Corinto nʼio tsaʼyale nga chjota tokanacha, kʼoa kuinga i̱ kitsosíni je pastro Pablo nga kiskile chjotale Cristo xi ya tsʼe: “A tsí tsa ʼyao je xi tokanacha, kjoakixiní nga ngatsʼi toka, tonga tojngo xi síkinje kjoatjao. Kʼoasʼin tókao, jméni nga kʼoasʼin chjoésínio kjoatjao” (1 Cor. 9:24).

3. ʼYáni xi kuichotjenngi je kjoabijnachon xi tsínkʼia fetʼa.

³ Ya Biblia kʼoatsoná nga tosi tonda tókaa josʼín je chjota xi tokanacha (tʼexkiai 1 Corintios 9:25-27). Je kjoatjao xi kʼoainá kui kjoabijnachon xi tsínkʼia fetʼa. Tjínkʼa xi ya sʼe̱le kjoabijnachon ya ngʼajmi kʼoa xi ngikʼa i Sonʼnde sʼe̱le kjoabijnachon. Kʼianga tokanacha  je chjota tojngo mani xi njele, tonga je xi titokaa ñá ngatsʼiñá nga kʼoainá kjoatjao xi tsʼe kjoabijnachon kʼiatsa ska̱ná saʼnda nga kjoaʼaí kjoafetʼa (Mat. 24:13). Tokʼiaa nga tsín kuichotjenngiaa kjoatjao jebi tsa tsín si̱tjosoán je kjoatéxoma kʼoa tsa tsín titókañá.

4. Ánni nga tsín choa ñʼai tíjnasíni nga kuichotjenngiaa kjoabijnachon xi tsínkʼia fetʼa.

⁴ Alikui choa ñʼai tíjna nga njele chjota kʼianga tokanacha, kʼoati tsín choa ñʼai tíjna nga kuichotjenngiaa kjoabijnachon xi tsínkʼia fetʼa. Machjénní nga kʼoénelee yaoná kʼoa nga ñaki kʼoakʼoé tokoán nga tsín tokjoatjao nga kʼoatinʼia. Tojé Jesucristo xi tsínkʼia kisatengi. Tonga ñá saténgiñá. Je Santiago kʼoakitso nga ngatsʼiñá nga sakʼoa chʼao nʼia (Sant. 3:2). Chjotajéeñá ngatsʼiaa kʼoa sakʼoa síkaténginá xíngiaa kʼoa saʼnda síkʼatsaoná, tonga binyatjenñá kʼoa tosi tonda tokaa. Tjínkʼa chjotale Cristo xi tsao kʼoa xi miʼaon kjoafaʼaitsjenle, kʼoa tokʼiaa tjonganʼio ijngokʼale nga tjín xi binyakao kʼoa ijngokʼa mjénʼiole nga tosi tonda toka. Tsakui nichxin sa̱téngiaa kʼoa saʼnda tjínkʼa xíngiaa xi nkjín kʼa sa̱téngi (1 Rey. 8:46).

5, 6. 1) Jósʼin tíjna én xi tso nga lijme xi sikaténgi je chjotale Cristo. 2) Jósʼin binyatje̱n ijngokʼá kʼiatsa jtsoaa. 3) Ánni nga tsín tibinyatje̱n kʼasíni nga jesaténgi.

⁵ Kʼianga kui nikʼaxkiaa tsa jngo chjotale Cristo xi tsín tinda sʼin tíjnani ngixko̱n Niná sakʼoa kui nichjén je én xi kisatengi kʼoa kiska tso. Kʼianga síkaxki̱ én jebi ya Biblia alikui tsa tongantsjai nga ngóson sʼin tsoyanile. Tobʼelañá, Proverbios 24:16 itso: “Tsakui nichxin saʼnda ñato kʼa ska̱ je chjota xi kixi, tonga kuisótjenni; tonga je chjotatsʼen jé kjoañʼai sikaténgi”.

⁶ Je Jeobá likui tsjoáʼnde nga tondiaa saténgi kʼoa tondiaa jtsao je xi je sínʼiotʼa yaole. Kʼiatsa kʼoakoaan, ʼyañá nga je Jeobá sikisótje̱nná ánni nga tosi tonda si̱xásínilee kao ngayeje ni̱ma̱ná. Kʼoa jebi nʼio nda bʼé kon je xi ñaki tsjoake kjoaixi je Jeobá. Tonga je chjota xi tsʼen likui mele nga binyatje̱n ijngokʼani, ni síjéjinlale je nganʼiotsjele Niná kʼoa ni básjaijinla kʼoa ni sasénjinlale nga naxinandále Niná tsjoánganʼiole. Je Biblia kʼoatso nga “lijme xi sikaténgi” je xi tsjoake kjoatéxomale Niná. Kui xi tsonile  nga koa̱n tókaya ijngokʼani je ndiaa xi tsʼe kjoabijnachon ninga kasaténgi (tʼexkiai Salmo 119:165).

7, 8. Jósʼin nga tosi tonda sʼe̱ná kjoandale Niná ninga sa̱téngiaa.

⁷ Tjínkʼa ndsʼee xi sakʼoa jée síkinjele kʼoa kui tsaojin jée xi tsín nʼio ai tjío kʼoa sakʼoa nkjín kʼa kʼoama. Tonga je Jeobá tojo chjotakixi sʼin bekon kʼiatsa ñaki kʼoamanile nga ñandia ñandia kajin jée kʼoa tsa kʼoenele yaole nga kui kʼoasʼin xi kixi tíjna. Kʼoa yaa ʼyañá nga kʼoasʼín Jeobá nga chotʼayajiaan josʼin tsabekon je chjota israelita kʼianga kʼoakoannile jéele (Is. 41:9, 10). Proverbios 24:16 kʼoatso nga je Jeobá koasenkaoná nga kuisotje̱n ijngokʼá tsa kasokójéená (tʼexkiai Isaías 55:7). Je Jeobá kao Jesucristo tsjoánganʼioná nga kuisotje̱n ijngokʼá kʼoa be nga koa̱nná kʼoasʼiaan (Sal. 86:5; Juan 5:19).

⁸ Kʼiatsa jngo chjota xi maratón títokanacha sa̱téngi kʼoa ska̱tsʼotjen koaan kjitʼanangi kuisótje̱n kʼoa tosi tonda tókanacha ijngokʼani. Josʼin nga titokaa ñá nga kuichotjenngiaa je kjoabijnachon xi tsínkʼia fetʼa likui ʼyaa jme nichxinni kʼoa jme orani kjoetʼa (Mat. 24:36). Tonga tsa kʼoénelee yaoná nga tsín sa̱téngiaa ngisa choa ñʼai koa̱nná nga tosi tonda tókaa saʼnda nga tjoéná kjoabijnachon xi tsínkʼia fetʼa. Jmé xi koa̱n sʼiaan nga tsín katasaténgiaa.

9. Jméni xi aon koya chótʼayajiaan xi koa̱n sikaténginá.

⁹ Aonla koya kataʼyaa jmeni xi síkaténginá. Xi títjon, je xi síkinjená. Xi majaoni, je xi mele yaoná. Xi majanni, tsa tsín kixi tíjna jme xi síkaoná xíngiaa ya jinjtín. Xi mañoni, tsa kjoañʼai tichjaʼá kʼoa tsa chjota fitjenngikená. Xi maʼaonni, nga kui chotsenlee jmeni xi tsín nda sʼín xi ngikʼa. Kʼiatsa kui jebi tísíkaténginá, si̱kjaʼaitsjeen kʼianga nʼio tsejta je Jeobá kʼoa nga tsín kʼoasʼin síkjaʼaitsjen nga toya tje̱n jekabiyoaa.

10, 11. Jméni xi ñʼai koanle je David.

¹⁰ Je xi síkinjená yaa mangóson joni tsa la̱jao̱ xi tjío ya yandiaa. Jme xi kisʼin je rey David kʼoa kao je pastro Pedro jao koya bakóná jme xi kisikinjele. Je David alikui koanle nga kiskoéxkóntsjai yaole, kʼoa je pastro Pedro sakʼoa chjota kitsokjonle.

¹¹ Je rey David ñʼai koanle nga kiskoéxkó yaole. Xi totʼatsʼe jebi tsakajngijée kao Bat-seba. Kʼoa kʼiaje̱ nga chʼaosʼin kisikʼaxki̱ je Nabal tome kisíkʼien. Ninga kʼoalani, tsakʼénele yaole nga kui kʼoakisʼin jme xi sasénle Jeobá. Ninga kisatengi je David kitsjoaʼnde nga tsakʼainganʼiole kʼoa tsakisótjen ijngokʼani (1 Sam. 25:5-13, 32, 33; 2 Sam. 12:1-13).

12. Jósʼin nga tosi tonda kitokaya ndiaa xi tsʼe kjoabijnachon je Pedro ninga kisatengi.

¹² Je Pedro chjota kitsokjonle, kui kini tsa jme xi sikao je chjota. Ningalani kixi kitʼale je Jesús kʼoa kao je Jeobá kʼoati kisatengi. Tobʼelañá, tsakʼéʼmaa nga bexkon je Jesús, kʼoa saʼnda jan kʼa kʼoakisʼin (Luc. 22:54-62). Kʼoa ñandia nga tsín kixi jmeni xi kisʼin. Ngisa nda tsabekon je chjotale Cristo xi judío kitjenni tikʼoajinni je xi tsín judío. Tonga je pastro Pablo alikui kʼoasʼin kisikjaʼaitsjen, be nga tsín koa̱n xíngiaa chja̱ʼajiaan ya jtín kʼoa nga tsínkui kjuinñá ni tjínle kʼoa ni tsínle xíngiaa. Je Pedro alikui nda kisʼin. Kʼoa nga tsín kʼoati sʼin xi ngikʼa, je pastro Pablo nʼio tsakjákao nga kitsjoale kjoafaʼaitsjen kʼoa tsakjákao nga̱ʼa nga̱ʼaa (Gál. 2:11-14). Jókisʼe kon Pedro nga kʼoatsakʼinle, a tokui jebi kisikʼéjnani xi tʼatsʼe Niná kʼoa tsín tikitokayani ndiaa xi tsʼe kjoabijnachon. Majain, kisikjaʼaitsjenjin je kjoafaʼaitsjen xi kitsjoale Pablo, kisitjosonní kʼoa tosi tonda tsakjénnʼiole.

13. Jósʼin koa̱n sikaténginá je chʼin.

¹³ Ijngosa koya xi sikaténginá kʼiaa tsa chʼin tjínná. Kʼoa tsakui nʼio nikjaojiaan, tsakui nichxin likui tikʼoakji nʼio kʼoénenilee yaoná xi tʼatsʼe Niná kʼoa saʼnda kuijtaná  kʼoa jetoya tje̱n kuiyoaa. Tobʼelañá, jngo tichjaa xi ya naxinandá Japón tsʼe jngo chʼin kiskatʼale nga jekoanni xjaʼaon jao nó nga kiskanisʼenngindá yaole. Nʼio koankjaojinle xi tʼatsʼe chʼinle kʼoa kisikinroajen kon xi tʼatsʼe Niná kʼoa likui tikitsoyasonni. Jao ndsʼee xi chjotajchínga sʼin tjío kisíxatʼa kʼoa kitsjoanganʼiole josʼin tsakjákaonajmí. Kʼoa tokʼoakoanni nga ijngokʼa kingáni kjoajtínná. Tichja jebi itso: “Nga kʼoasʼin nʼio nda kiskoéyana je ndsʼee ya kjoajtínná nʼio kiskajin ni̱ma̱na”. Tichjaa jebi ijngokʼa títokayangáni ndiaa xi tsʼe kjoabijnachon.

14, 15. Jméni xi nʼio tjínnele sʼiaan kʼiatsa kui mametokoán xi jée tje̱nkao. Jngola choa̱ tʼejnai.

¹⁴ Nʼio nkjín chjotale Cristo xi kui tjíotsaojin je xi mele yaoná xi jée tje̱nkao. Kʼianga kui sʼejnabasenná xi jée tje̱nkao, tjínnele si̱kjaʼaitsjenjiaan jósʼin nga tsje katasʼe kjoafaʼaitsjenná, jósʼin nga tsje koanngínkoaa yaoná, kʼoa jósʼin nga tsje kuiyoaa ngixko̱n Niná. Je Jesús kʼoakitso nga chʼa̱sjexinlee yaoná jmeni xi síkaténginá, tsa jngo xkoaan kʼoa jngo ndsaa. A tsí ngisa machjén nga chja̱ʼaxian jinkjoafaʼaitsjenná tojmeni xi kjoajndí tje̱nkao xi koa̱nle kʼaonsjetʼaxinná (tʼexkiai Mateo 18:8).

¹⁵ Xi ñʼai kjimale jngo ndsʼee saʼnda nga sʼa xti kuinga xʼin matsjoake. Ningalani jinnaxinandále Niná koanjchíngajin ndsʼee jebi kʼoatso nga tsínkʼia nda kisʼe kon tojñani nga fi. Kʼianga kan nóle, precursor regular kʼoa siervo ministerial sʼin tísíxá. Tonga tsakajngijée, kʼoa nga kʼoakoan tsakichakjáyale kʼoa kitsjoanganʼiole je xi chjotajchínga sʼin tjío. Jósʼin kitjonganʼio ijngokʼanile kʼoa nda tsakʼejna ijngokʼani ngixko̱n Niná. Kui tsakasenkao nga tsakʼétsʼoale Niná, nga kiskotʼayajin Énle Niná, kʼoa nga kui kini josʼin tsjoánganʼiole xi ngikʼa. Ninga jenkjín nó jaʼato, je ndsʼee jebi itso: “Sakʼoa tojo kʼoasʼe tokoan, tonga likui tsjoaʼnde nga kui síkinjena. ʼBeña nga toya tje̱n tsjoáʼnde Jeobá jokji tje̱n ska̱ná kʼianga chótʼayakaoná. Kʼoa bejin je Niná nga koa̱n kjoaʼatojian kjoa jebi. Jokji tse tíkana ndʼai ya kʼoaingajaonina nga jesʼe̱jna sonʼnde chjotsele Niná. Kʼoa kui xi tikoyale. Kʼoa saʼnda nga kjoaʼaí nichxin jebi, tosi tonda kʼoenele yaona”. Tojosʼin tiʼyaa, je ndsʼee jebi nʼio tíbʼénele yaole nga kuichotjenngi kjoabijnachon xi tsínkʼia fetʼa.

16, 17. 1) Jmé xi tsakasenkao jngo ndsʼee xi kʼoasʼin koanjinle nga tsín kixi tíjna jme xi koantʼain ya jinjtín. 2) Jméni xi kuenta sʼiaan kʼiatsa tsín mená nga sa̱téngiaa.

¹⁶ Tsa tsín kixi tíjna jme xi síkaoná xíngiaa ya jinjtín kʼoati síkaténginá. Tobʼelañá, jngo ndsʼee xi ya Francia tsʼe, xi chjotajchínga sʼin tsakʼejna tsakai, nʼio tsakʼéngijti kon jmeni xi koantʼain ya jinjtín. Likui tikini kjoajtín kʼoa likui tikitsoyasonni. Jao xi chjotajchínga sʼin tjío kisíxatʼa ndsʼee jebi. Chjotajchínga jebi nda kinrʼoé kʼoa kuenta kisʼin jmeni xi kitso. Alikui je kinchja̱jin nga tíbʼéyanajmí jmeni xi koantʼain. Je chjotajchínga xi kichokonle kʼoakitsole nga tosa je Jeobá katabʼéndajin kjoale kʼoa nga kui xi ngisa chjíle nga nda kʼoéjna ngixko̱n Jeobá. Ndsʼee jebi kisitjoson jmeni xi tsakʼinle kʼoa alikui nʼio kisikʼachxinkao nga ijngokʼa tsakjénnʼionile, kʼoa ndʼaibi jenʼio nda tísíxá ijngokʼangánile je Niná.

¹⁷ Ñá xi chjotale Cristo maa tjínnele je kuenta sʼiaan je Jesucristo, nga̱ je xi ngʼajko̱ tíjnale naxinandále Niná, kʼoa ali tsa jejin kuenta sʼiaan xi kʼoati chjotajée joni tsa ñá. Je xko̱n Jesús kʼoasʼin mangóson “joni tsa ni̱je̱nlʼí”, ngisa nʼio nda be jmeni xi kjima ya jinjtín tikʼoajinni ñá (Apoc. 1:13-16). Je Jesús bení tsa tsínni kʼoasʼin kjimajinná jmeni xi kjima kʼoa jé bʼéndajin nga bichó choa̱le kʼoa ñaki nda bʼéndajin. Kuinga tsín kʼoaiʼndesíñá nga kui sikaténginá jmeni xi sʼín je ndsʼee.

18. Jósʼiaan nga chókjoaná ninga kjoa kjoaʼaíne.

¹⁸ Tonga ngi jaola koya jchaa jme xi síkaténginá: nga kjoañʼai chjaʼá, tsa chjota fitjenngikená  kʼoa kao nga kui chotsenlee jmeni xi tsín nda sʼín xi ngikʼa. Kʼianga tsakʼéjna choa̱ je Jesús tʼatsʼe je chjota xi tjín xi bʼéntje kʼoakitso nga nkjín chjota saténgi “kʼia nga faʼai kjoañʼai” kʼoa tsa “tjín xi fikontrale xi tʼatsʼe énbi”. Kʼiatsa jngo chjota xi “tsínle ja̱ma̱ ya ni̱ma̱le”, xi tsonile, nga tsín taja kjoamakjainle, sa̱ténginí kʼiatsa je xínkjín, tsa je chjota ndainiʼyale kʼoa tsa chjotaxá koaitjenngike (Mat. 13:21). Tonga tsa ñaki kʼoatjío tokoán nga tsín kjin kuiyolee je Jeobá, je énnda chjotse sitaja kjoamakjainná kʼoa yaa koa̱nngósoán jngo yá xi nʼio nyañe ja̱ma̱le. Kʼianga kjoa tibitjatojiaan, kʼoétsʼoalee je Jeobá kʼoa kui si̱kjaʼaitsjenjiaan “tojñanile xi tjínle kjoanʼosjenda” (tʼexkiai Filipenses 4:6-9). Je Jeobá tsjoánganʼioná nga ska̱ná jmeni xi kuitjátojiaan kʼoa nga tsín kʼoaiʼndee nga kui sikaténginá.

19. Jmé xi sʼiaan nga tsínkui sikaténginá jmeni xi sʼín xíngiaa.

¹⁹ Tjínkʼa xíngiaa xi tsín titjíosíxánile Niná nga kui kotsenle jmeni xi tsín nda sʼín xi ngikʼa. Kui tjíosaténgini nga kui kʼoasʼín xi ngikʼa jmeni xi tsín tsjoáʼndele kjoafaʼaitsjenle je nga kʼoasʼin (1 Cor. 8:12, 13). Kʼiatsa tsín sasénná josʼín je xíngiaa, a koa̱njtiná kʼoa a tokui si̱kʼéjnañá je énle Niná. Je Biblia kʼoatsoná nga tsín jée kjoáne xíngiaa nga tosa si̱chatʼalee kʼoa nga tsín kjoanʼio kʼoénelee nga kʼoakatasʼín josʼin mená ñá (Luc. 6:37). Kʼiatsa tsín sasénná josʼín xi ngikʼa chjónangilee yaoná: “A kʼoasʼin sikjaʼaitsjen nga kʼoakatasʼín josʼin mena. Kʼianga ʼbe nga kʼoati chjotajée, a tokui sikʼéjnaña énle Niná tsa chʼao kasʼín jngo ndsʼe”. Je kjoatsjoacha xi tjínná kao Jeobá kui xi koasenkaoná nga tosi tonda tókaa saʼnda nga kuichotjenngiaa kjoabijnachon xi tsínkʼia fetʼa ninga jme xi sʼín xi ngikʼa.

20, 21. Jméni xi sʼiain kʼianga kuichotjenngi kjoabijnachon xi tsínkʼia fetʼa.

²⁰ A tijnandaní nga tosi tonda tókai saʼnda nga kjoetʼali (2 Tim. 4:7, 8). Tsa jaon, chótʼayai Biblia kʼoa kao xo̱n xi síkasénná naxinandále Jeobá kʼianga kuijnatsʼinyai, nga si̱kjaʼaitsjenjin kʼoa nga jchai jmeni xi sakʼoa síkaténginá. Tijélai nganʼiotsjele Niná nga̱ kui xi koasenkaoli. Tikjaʼaitsjain josʼín je chjota xi tokanacha, ninga saténgi kʼoa ninga tsao alikui toya batio, binyatje̱nní kʼoa toka ijngokʼa. Jmeni xi síkaténginá koaan tikui koasenkaoniná nga ngisa kjoénnʼiolee nga tókaa.

²¹ Je Énle Niná kʼoatso nga tsín koa̱n tojyó kuiyoaa tsa mená nga kuichotjenngiaa kjoabijnachon xi tsínkʼia fetʼa. Kʼoénelee yaoná nga tosi tonda tókaa. Jebi alikui kʼoasʼin mangóson joni tsa karro timangínkiaan kʼoa tokoaikaoná. Nga jngó jngóñá nga tjínnele tókaa nga kuichotjenngiaa kjoabijnachon xi tsínkʼia fetʼa. Kʼoa nga jekʼoasʼin titokaa je kjoanyʼán xi tsʼe Niná kui xi koasenkaoná nga tosi tonda tókaa (Sal. 119:165). Je Jeobá sichikontʼainná tokʼia saʼndani tsa tosi tonda tókaa saʼnda nga kjoetʼa (Sant. 1:12).