1. Ánni nga títjon kjoanla nda chotʼasíni jngo avión kʼianga bitjo.

KʼIANGA ñandia ñandia bitjo je avión, nʼiokjoanla nda kotʼa je chjota xi síxákao, tsʼato kante koya tjínni jmeni xi tongini kotʼa. Kʼiatsa tsín skótʼa, tochale jngo kjoaxkón xi nʼio tse so̱kole. A ʼyaní ji ʼyani xi ngisa kʼoaʼmile nga katakotʼa je aviónle. Jéní xi jekjoatsele nga kui síxákao. Ánni. Kuinga jekjoatsele nga avión síxákao kʼoa tsakui nichxin tokʼoejngo kon kʼoa likui tinda skótʼani aviónle.

2. Jméni xi machjén nga kjitʼa chótʼaa xi chjotale Cristo maa.

² Tojo sʼín jngo xi avión kotʼa, kʼoati koa̱n chótʼai tsanda ji josʼin tíjna kjoamakjainli ánni nga tsín kjuinroajensíni kʼianga nʼio koa̱nchjénli. Ninga sʼa tsangínsʼenngindá kʼoa ninga jekjoatse, nʼio machjén nga kjitʼa chótʼaa jokji nʼio tíjna kjoamakjainná kʼoa josʼin tiʼyaxkoán je Jeobá. Kʼiatsa tsín kʼoasʼiaan tochale si̱chaa kjoamiyo xi tjínná kao Niná, tojo tso ya Biblia: “Je xi síkjaʼaitsjen nga nʼio kixi tíjna, katasíkuinda yaole nga tsín ska̱” (1 Cor. 10:12).

3. Jmé xi tjínnele kisʼin je chjotale Cristo xi ya Galacia tsʼe.

³ Je chjotale Cristo xi tsakatio ya naxinandá Galacia nʼio koanchjén nga kiskotʼa jokji nʼio tjío kjoamakjainle kʼoa nga tsabechjí je kjoandaíle. Je Jesús kao kjoabʼechjíntjaile kiskoxʼáʼndenile je xi sʼe̱le kjoamakjain ánni nga nʼio nda katabesíni Niná kʼoa saʼnda xtile katamasíni (Gál. 4:9). Kʼianga tsín sicha kjoanda jebi je chjota xi tjío ya Galacia, tjínnele nga tsakʼasjengi josʼin tsakakóya je chjota judío. Tobʼelañá, je chjota judío nʼio tsakʼéne nga katabitjoson kjoatéxomale Moisés. Kʼoa je chjotale Cristo xi tsín judío kitjenni likui kʼia kjoatéxomale Moisés kitjenngi. Je chjotale Cristo xi judío kʼoa kao xi tsín judío koanchjénle nga tosi tonda kisitaja kjoamakjainle, xi tsonile nga tjínnele kʼoatsakʼé kon nga tsín tikui kjoatéxomale Moisés xi kixi sʼin sikatíoni ngixko̱n Niná.

4, 5. Jmé kjoafaʼaitsjen kitsjoale Pablo je chjotale Cristo xi tsakatio ya naxinandá Galacia, kʼoa jósʼin basenkaoná ñá.

⁴ Je kjoafaʼaitsjen xi kitsjoale pastro Pablo je chjotale Cristo xi ya tsʼe Galacia, kui xá kisʼetʼani ya Biblia nga kuinyakao je chjotale Cristo, nga tsín yátsʼi̱n katabinyále jmeni xi jetsakʼinyale kʼoa nga tsín tikui kʼoakatasʼínni jme xi kisʼin ngasʼa. Jé pastro Pablo kisichjén Jeobá kʼianga kʼoakitsole je choʼndale nga tosi tonda kixi katama. Kʼoa ali tsa tojejin xotsakʼinle je chjotale Cristo xi ya Galacia tsʼe, ngatsʼiní choʼndale Niná xi kʼoaʼmile.

⁵ Ngatsʼiaa machjénní nga si̱kjaʼaitsjenjiaan jósʼin tsaʼyaa xi tʼatsʼe Niná kʼoa testigole Jeobá koaan. Machjén nga si̱kjaʼaitsjenjiaan nga jao kjoachjonangi jebi: A faʼaitsjenná jme xi kinʼia kʼianga koan tsangínsʼenngindá. A faʼaitsjenná josʼin tsaʼyaa je Niná kʼoa nga tsabená tsanda je nga miyole koan, kʼoa nga ndaí tsakiyolee xi tsín kixi tíjna.

6. Jméni je xi machjén nga chótʼaa.

⁶ Ñajan koya tjínni xi mangíntjenngiaa nga chotʼaa josʼin tiyoaa, kʼoa yaa faʼaitʼa rekuadro xi tso: “Xi machjén nga mangínsʼenngindá kʼoa nga tosi tonda mataja kjoamakjainná”. Kʼianga kjitʼa si̱kjaʼaitsjenjiaan nga ñajan koya xi tʼatsʼe jebi ngisa sitajasaná nga tsín tikui kʼoasʼianñá jmeni xi chon je sonʼnde jebi. Tojo sʼín jngo chjota xi avión síxákao nga tsjoá tjínjngo kon kʼianga jenda kakotʼa avión, kʼoatisʼinni tsanda ñá, koaan tosi tonda si̱xálee Jeobá nga kʼoasʼin kjitʼa chótʼaa josʼin tíjna kjoamakjainná.

7. Jméni xi koanngíntjenngiaa kʼoa ánni.

⁷ Je xo̱n xi kijnale chjota xi avión síxákao kui xi síkjaʼaitsjenjinle nga títjon kjoanla skótʼa nga kjesa bitjojin. Kʼoatisʼinni tsanda ñá, machjénní nga chótʼaa josʼin tíjna kjoamakjainná kʼoa jmeni xi tinʼia saʼnda nga tsangínsʼenngindá. Je Pablo i kitsole je Timoteo: “Nda tʼejintakuin jo tso je én xi nda, xi an kinoʼyanái. Tʼejintakuin josʼin nga makjainná, kʼoa josʼin nga tjaochaa nga tiyokoaa Cristo Jesús” (2 Tim. 1:13). “Je én xi nda” tsole yaa faʼaitʼa ya Énle Niná (1 Tim. 6:3). Jngo chjota xi dibujo sínda, títjon kjoanla tosíndaxa̱ dibujole kʼoa kʼoasʼin beni josʼe̱ sén xi sinda. Kʼoatisʼinni tsanda ñá, tsakui koanngíntjenngiaa “je én xi nda” jchañá jmeni xi mele Niná nga sʼiaan. Kataʼyala jmeni xi kinʼia kʼianga koan tsangínsʼenngindá kʼoa jókji jetinitjosoán je Énle Niná.

8, 9. 1) Ánni nga machjénsíni nga tosi tonda katasʼená kjoankjíntokon kao kjoamakjain. 2) Ánni nga nʼio chjísínile nga sʼe̱saná kjoamiyo xi kao Niná, kʼoa jósʼin mangósonkao joma yá kʼianga mingʼa.

⁸ Je xi títjon chótʼaa kuiní je kjoankjíntokon xi tjínná tʼatsʼe Niná. Xijekoa̱n chótʼaa kjoamakjainná. Kʼoa tjínnele nga tosi tonda sʼe̱ná nga jao koya jebi (2 Tes. 1:3). Machjénní nga tosi tonda si̱tseyaa je kjoankjíntokonná kʼoa kao kjoamakjainná. Kʼoa kʼianga jekamangínsʼenngindá machjénní nga tosi tonda si̱miyoaa je Niná, nga tsín toya kuiyoʼndee.

⁹ Koaan kui si̱ngósonkoaa kjoamiyo xi tjínná kao Niná josʼin mingʼa jngo yá. Tjín yá xi nʼio ngʼa makjoan, ngisa tsa nʼio na̱nga̱ koai ja̱ma̱le. Tobʼelañá, tjínkʼa yákon xi tjín ya Líbano xi síxkón makjoanngʼa, joni tsa jngo niʼya xi tejao piso tjínle, nʼio taja kʼoa nʼio na̱nga̱ nya ja̱ma̱le kʼoa saʼnda tejao metro teyajin ma (Cant. de Cant. 5:15). Kʼianga sʼa mi ngotjo mangʼani kʼoa xijema sa mangʼa sa mangʼaa ninga tsín tsen matsen tsa kʼoakjima. Kʼianga tífaʼa nó je totsʼin yá sa maje sa majee kʼoa je ja̱ma̱le sa fi sa fi kʼoa kuinga xinyá taja tajasíni. Kʼoakjoanti maa  ñá xi chjotale Cristo maa kʼianga sa miyo sa miyo malee je Niná. Kʼianga sʼa chotʼayá Biblia kʼoati maa joma je yá nga sasa mangʼani, tsakui nichxin tochoa tse koanngínsʼenngindáñá kʼoa saʼnda precursor koaan kʼoa tsa kʼoaisanáje̱ xá xi kjaʼaí. Je xi tjío ya jinjtínná nʼio tsjoa sʼele kʼianga be nga kʼoatinʼia. Tonga kʼianga jefi nó tsakui nichxin likui skoe̱ xi ngikʼa nga tosi tonda kjimamiyoaa je Niná. Ninga kʼoalani, machjénní nga tosi tonda si̱tajaa kjoamakjainná kʼoa tosi tonda katasʼená kjoankjíntokon “jo saʼnda [nga] kjuichoaa choa̱ nga kʼoa koa̱n kjoaan jo kjoan Cristo” (Efes. 4:13). Yaa koa̱nngósoán joma je yá, nga ʼndíla kjoan tsakai tonga xijema xinyá taja tajani.

10. Ánni nga machjénsíni nga tosi tonda katamataja kjoamakjainná ninga jekjoatse tiyojiaan naxinandále Niná.

¹⁰ Tonga alikui koa̱n nga toya tje̱n kuiyoaa. Machjénní nga katasʼesaná kjoankjíntokon kʼoa nga sa taja sa taja katama kjoamakjainná. Kʼiatsa kʼoasʼiaan sʼe̱jna taja taja kjoamakjainná (Prov. 12:3). Nʼio nkjín ndsʼee xi kʼoatjíosʼín. Tobʼelañá, jngo ndsʼee xi jetsʼato kante nó nga chjotajchínga sʼin tíjna kʼoatso nga tojo kjimatajasa kjoamakjainle kʼoa kao josʼin tíjna kao Niná, itso: “Nʼio sa chjí sa chjí tiʼbe jotso je Biblia. Kjitʼaa masjaina josʼin sichjén kjoafaʼaitsjen xi faʼaitʼa kʼoa kao kjoatéxoma xi tsoya. Kʼoa kʼoati sa nʼio sa nʼiosa chjí tiʼbe nga kʼoasʼin ʼmiyasoán”.

11. Jósʼin nga ngisa nda jchaa je Jeobá jokji nga tífi je nichxin.

¹¹ Kʼianga ndasa kuijnaa ngixko̱n Jeobá, machjénní nga si̱chriantʼalee, nga miyoná kʼoa nga Nʼainá katama. Je Jeobá mele nga nda katasʼe tokoán, nga kʼoakʼoé tokoán nga tsjoakená kʼoa nga síkuindaná, nga kʼoakatamaná jomale jngo tiʼndí kʼianga yʼangʼa je nʼaile kʼoa tsamaije̱ tojo sʼe tokoán nga jngo miyo xi nʼio ndaná tiyokoaa. Kjoaixiní, kʼianga mamiyoaa je Niná nichxin tje̱nkao. Kʼoa kʼoati nichxin tje̱nkao kʼianga nda jchaa kʼoa nga koa̱ntsjoachaa. Chʼa̱sjeʼai nichxin kʼianga nyaon nyaon tʼexkiai je Énle. Xi ijngosani, tʼexkiai ngayeje je Xo̱n xi bájinkonná kʼoa kao ¡Despertad!, kʼoa kao ngayeje je xo̱n xi bʼasje naxinandále Niná.

12. Jméni xi sʼiaan kʼianga tosi tonda koa̱nmiyoaa je Jeobá.

¹² Je choʼndale Niná matajasa je kjoamakjainle kʼianga bʼétsʼoa kʼoa nga je símiyo je xi kixi tjíofikao yaole (tʼexkiai Malaquías 3:16). Je “xo̱ño [Jeobá] tínrʼoéle xi bʼétsʼoa” (1 Ped. 3:12). Tojo sʼín jngo  nʼai xi tsjoake ʼndíxtile nga nrʼoé jmeni xi tsole, kʼoati sʼín je Jeobá. Kuinga machjénsíni nga kʼoétsʼoaa ngantsjai (Rom. 12:12). Kʼiatsa tsín koasenkaoná je Niná alikuijin tosi tonda koa̱ntaja je kjoamakjainná. Kʼiatsa totsaan nganʼio si̱chjén alikuijin kuitjátojiaan jmeni xi satíobasénná. Kʼiatsa tsín tikʼoétsʼoanilee je Niná, ali jojinsʼin titsjoánganʼioniná nga̱ koa̱nkjinjinlee. Kuila tisui ji, a tjínjngo tokuin josʼin nga bʼetsʼoalai je Niná axo machjénsa nga si̱ndayai je kjoabʼetsʼoali (Jer. 16:19).

13. Ánni nga ngisa mamiyosíñá je Niná kʼianga nimiyoaa je ndsʼee.

¹³ Je Jeobá tsjoake ngatsʼi xi “kʼoasʼin je sínʼiotʼa”. Kʼianga jekaʼyaxkoaan je Niná tojo machjénní nga kʼoasʼin koanngián ya jñani mañaa nga̱ kʼoati ya tjío je chjota xi kʼoati jebexkon je Niná (Nah. 1:7). Kʼianga nʼio tsʼen je chjota xi tjín sonʼnde, machjénní nga tsín si̱kjinlee je ndsʼee xi koa̱nle tsjoánganʼioná. Jmé kjoanda xi sʼe̱ná kʼiatsa kʼoasʼiaan. Ya jinjtínná tjío ndsʼee xi koasenkaoná nga koakoá kjoatsjoacha kʼoa xi kuinyakaoná nga kui xá xi nda kʼoasʼiaan (Heb. 10:24, 25). Kʼianga kiskile Pablo je chjota hebreo kui tsakakó nga tíjna jngo jtín xi jtín tjío, xi bexkón Niná. Kʼianga sʼe̱ná kjoatsjoacha jebi, alikui koa̱n si̱kjinlee je chjotale Cristo. Kʼoa machjénní nga si̱kjaʼaitsjenjiaan, a tsínkʼia nichaa je kjoajtín xi satíoná kʼoa a mjengʼañá ndsaa kʼianga bʼé énná.

14. Jósʼin nga ntsjaintsjai kʼoamaniná je jéená.

¹⁴ Kʼianga chjotale Cristo koaan, títjon kjoanla kʼoakoanniná je jéená kʼoa kinikatíoñá jmeni xi kinʼia tsakai. Kʼoa ndʼaibi tojo kʼoanʼia nga̱ chjotajéeñá kʼoa ngantsjainí nga tíjnanená je jée, tojo sʼín jngo ye̱ xi tíjnaxkóya nga toje tíjnanda nga ʼya xi kʼoejtsole (Rom. 3:9, 10; 6:12-14). Tje̱nyatokon kuiyoaa kʼoa alikui tokjoa katamaná jmeni xi sakʼoa nʼia. Bʼailee kjoanda Jeobá nga bakóná kjoatsejta, nga kʼoalasʼin tibʼenelee yaoná nga tsínkui sikinjená xi jée tje̱nkao kʼoa nga si̱kʼantjaiyala yaoná (Filip. 2:12; 2 Ped. 3:9). Je xi kʼoati nʼio nda koasenkaoná kuinga je Jeobá si̱xálee, jé kʼoailee nganʼioná kao nichxinná ʼndele nga kui koanngíntjenngiaa jmeni xi toñá mená. Jngo tichjaa xi i̱ kitso: “Jin naxinandále Niná koanjchíngajian, tonga likui kʼoasʼin koankjainna xi tʼatsʼe Jeobá josʼin makjainle xi ngikʼa. Kʼianga Jeobá kisikjaʼaitsjen kitsokjonle, kʼoa kʼoasʼin kisikjaʼaitsjen nga tsínkʼia nda sʼian ngixko̱n”. Xi jeki nichxin, je tichjaa jebi kinroajen kjoamakjainle kʼianga tse kjoa jaʼatojin. I kitsosa tichja jebi: “Ali tsakuijin tsa tsín tsjoake koan je Jeobá, xi tsakʼetʼana kuinga tsínni ñaki ʼbexkoan. Tonga kʼianga nʼio tsakʼetsʼoale tsʼantjaiya kjoafaʼaitsjenna. Ñaki títsoaa ndsa̱ je Jeobá koanna, jomale jngo tiʼndí nga tsoa ntsja je nʼaile, tsakasenkaona jmeni xi jaʼatojian. Tsakakóna kjoatsjoacha je Jeobá kʼoa jé tsakándiaana jmeni xi kisʼian”.

15. Jméni xi tjíokotsenle Jesús kao je Nʼaile.

¹⁵ “Kʼoatʼinlao ngatsʼi chjota naxinandá” xi tʼatsʼe je énnda chjotse. Je én jebi jngo ánkje xokitso, kʼoa jé xokitsole je pastro Pedro kʼoa kao xi ngikʼa pastro kʼianga jekʼoasʼin kisikatíondaí nga ndoyá tjíoʼya (Hech. 5:19-21). Xi ijngosa xi kʼoati chótʼaa, kui tsa ʼmiyasonntsjé nga xki̱ xomana. Je Jesús kʼoa kao Nʼaile tjíobe jotjío kjoamakjainná kʼoa kao je xá xi tinʼia xi tʼatsʼe (Apoc. 2:19). Je chjotajchínga xi kanikʼaxki̱ná ya párrafo 10 kʼoatso: “Kʼianga kʼoasʼin ʼmiyasoán nʼio tjínle kjoandosin xi kao ñá”.

16. Ánni nga machjénsíni nga si̱kjaʼaitsjenjiaan nichxin nga tsakʼaitʼalee yaoná je Jeobá.

¹⁶ Tikjaʼaitsjain nga tsakʼaitʼalai yaoli je Niná. Xi ngisa nʼio chjíle kui kjoamiyo xi tjínná kao Jeobá. Bení je Jeobá chjota xi  tsʼe (tʼexkiai Isaías 44:5). Kao kjoabʼetsʼoa tikjaʼaitsjenjin josʼin tijnai ngixko̱n Niná kʼoa kʼoati tikjaʼaitsjain nichxin nga kichanisʼenngindái yaoli. Kui xi koasenkaoli nga tsín cha̱jinli nga kʼoasʼin tsakʼaitʼalai yaoli je Niná kʼoa kui xi ngisasa nʼio ndatjín xi kinʼiai.

17. Ánni nga kjoaka machjénsíniná kʼianga chrian kuiyolee je Jeobá.

¹⁷ Je pastro Pablo, kʼianga kisikasénle xo̱n je chjotale Cristo xi tjío ya Galacia kʼoakitsole nga nʼio machjén je kjoaka (Gál. 6:9). Kʼoati nʼio machjénná tsanda ñá ndʼaibi je xi chjotale Cristo maa. Kuila tisui ji, kuitjátojinní kjoa tonga jé Jeobá koasenkaoli. Tijé ntsjaintsjailai je nganʼiotsjele. Tsjoa sʼe tokuin kʼiatsa kjoabalani tjínli kʼoa nyʼán sʼe tokuin kʼiatsa jme xi tinikjaojin (Mat. 7:7-11). Tikjaʼaitsjenlai jebi: kʼiatsa síkuinda nise je Jeobá, a tsí tongisa koa̱nndosinle xi tʼatsi, nga̱ tsjoachaní kʼoa jetsakʼaitʼalai yaoli (Mat. 10:29-31). Tojme kjoa xi kuitjátojin ali bʼaiʼndejin nga kui síkinjeli kʼoa ali tokuijin nikʼéjnani énle Niná. Nʼio nkjín koya xi nʼio naskánatjín tjínná nga kʼoasʼin miyo tsoná je Jeobá.

18. Kʼianga jeʼyai je Niná, jmé xi sʼiain.

¹⁸ Kʼiatsa chriansʼa tsaʼyai je Niná kʼoa chriansʼa kichanisʼenngindái yaoli, jméni xi machjén nga sʼiain. Tosi tonda kataʼyasai je Jeobá, katamatajasa je kjoamakjainli. Kʼoa tsa jenkjín nó nga kichanisʼenngindái yaoli, tosi tondasa nʼio chótʼayajin kʼoa tosi tonda katasʼeli kjoankjíntokonle Jeobá. Kʼoa nga je miyoli mani je Jeobá ali tobʼejngojin tokuin. Sakʼoa tikjaʼaitsjenjin tsa kʼoatinʼiai jotjín koya xi kaʼyaa ánni nga jchasíni tsa tosi tonda kjimachriantʼalai Jeobá, je Nʼainá, miyoná kʼoa Nináná (tʼexkiai 2 Corintios 13:5, 6).