AÑAKI tsjoa kisʼe kon je Jesús. Tojosʼin ʼyaa, je Jesús maa sʼin koanjchá kʼoa lijme xi nanda kisʼele jokji tse tsakʼejna i̱ Sonʼnde, saʼnda kʼoakitso nga “tsínle ʼndejin jña nga sikjáya” (Lucas 9:57, 58). Kʼoa je chjota kontrale nʼio jtike koan, énndiso tsakáne kʼoa saʼnda kisikʼien.

Tsakui nichxin kʼoasí nga tsín tsjoa kisʼe kon nga̱ tsín jme xi kisʼele kʼoa nga totaon tsaʼya. Tonga tjínsa jmeni xi koa̱n chótʼayajiaan tʼatsʼe Jesús. Ñola koya kataʼyaa.

“Jé xi bakjennia, nga kʼoasʼian josʼin mele je xi kisikasénna.” (Juan 4:34.)

Je Jesús tsakʼénele yaole nga kui kʼoakisʼin josʼin mele je Jeobá, kʼoasʼin tsakakóni jmeni xi kitso kʼoa jmeni xi kisʼin. * Tojo tso Juan 4:34 nʼio nda kisʼe kon nga kʼoakisʼin josʼin mele Nʼaile, kui xi niole koan. Kataʼyala kʼiáni nga kʼoakitso.

Jela nyisen nga kʼoakitso je én jebi (Juan 4:6). Kʼoa nga kʼia, jejin baole nga kʼoasʼin tjíotsoma ya naxinandá Samaria nga̱ to nindoní. Je chjotale saʼnda i tjíotsole: “Rabí, tichi” (Juan 4:31). Kʼoa je Jesús kʼoakitso nga kui xi tsakʼéjngo kon kʼoa kui xi kitsjoanganʼiole nga kʼoakisʼin jme xá xi kitsjoale Nʼaile. A tsíkui xi bakóná jebi nga ñaki tsjoa kisʼe kon je Jesús.

“Tsjoake̱[ña] Nʼainá.” (Juan 14:31.)

Je Jesús nʼio ndasʼin tsakʼejnakao Nʼaile kʼianga tsakʼejna ya ngʼajmi. Kuinga nʼio tsjoake nga tsakakóyani joʼmi je Nʼaile, jmeni xi tjínndajinle kʼoa jokjoan. Kʼoa jmeni xi kitso, jmeni xi kisʼin kʼoa jokoankjoan Jesús kui tsakakó jokjoan je Nʼaile. Kʼoa kʼianga bʼexkiaa xi tʼatsʼe Jesús joxi jéni Nʼaile xi tiʼyaa. Kʼianga i̱ kitsole Felipe je Jesús: “Takonajin Nʼainá”, je Jesús kitso: “Je xi tsabena nga an, tsabe Nʼainá” (Juan 14:8, 9).

Je Jesús nʼio tsjoake koan je Nʼaile, kisitjosonle ninga saʼnda kinikʼien (Filipenses 2:7, 8; 1 Juan 5:3). Nʼio tsjoa kisʼe kon Jesús nga̱ nʼio tsjoake koan Niná.

“Liʼyasa xi ngisa tsjoake joni jngo xi tsjoántjai ni̱ma̱le xi tʼatsʼe miyole.” (Juan 15:13.)

Kʼianga kʼoasʼin jée kichʼá xi chjotaa alikui ndasʼin bichómani. Je Biblia itso: “Kui je xi jée ʼmi jaʼasʼenjin sonʼnde xi totʼatsʼe jngo chjota [je Adán]. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi” (Romanos 5:12). Alikui tjóʼalee yaoná tʼatsʼe kjoabiya kʼianga toñá (Romanos 6:23).

Tonga je Jeobá, nga nʼio tsjoakená, jetsakʼéndajin kjoa jebi. Kitsjoaʼnde nga kjoañʼai tsakjaʼá kʼoa nga kinikʼien je Jesús, je Jesús ñaki tsjení kʼoa tsín jme jée kisʼele, kʼoa kʼianga kʼoasʼin kinikʼien tsakʼéchjíntjainá xi tʼatsʼe jée kao kjoabiya. Je Jesús kao kjoatsjoa kitsjoa kjoabijnachon tsjele xi totʼatsaan kʼoa kuinga kʼoakisʼinsíni nga tsjoake Niná kʼoa tsjoakená ñá xi chjotaa (Romanos 5:6-8). Kʼianga kʼoasikji kjoatsjoacha kisʼele kui xi tsjoa tsakʼé kon. *

“Jébi ʼndína xi tsjoake̱, jo nda sʼekoan xi tʼatsʼe.” (Mateo 3:17.)

Je én jebi jé Jeobá kinchja̱ni ya tje̱n ngʼajmi nichxin nga kisʼenngindá je Jesús, je Jeobá kʼoakitso jokji tsjoake kʼoa jokji nda sʼe kon xi tʼatsʼe ʼNdíle, kʼoa kuinga koan i̱ kitsosíni Jesús: “Kʼoasʼin tjaoke[na] Nʼainá” (Juan 10:17). Nga be je Jesús nga tsjoake je Nʼaile kʼoa nga sasénle xi tʼatsʼe, kui xi tsakasenkao nga tsín kisikinroajen kon ningalani jtike koan chjota kʼoa ningalani tokitso tokoanle. Kʼoa ningalani be nga nikʼien ñaki tsakʼéjngo kon kʼoa alikui yaole kisibale (Juan 10:18). Nga be je Jesús nga tsjoake je Nʼaile kʼoa nga sasénle xi tʼatsʼe kui xi ngisa tsjoa tsakʼé kon.

Josʼin tsakʼejna je Jesús nʼiojin tsjoa kisʼe kon. Koan ñá koaan chjénngiaa choa̱le. Je kjoaʼmiya xi ijngo kui bakóyaná je kjoafaʼaitsjen xi kitsjoale Jesús je chjotale nga tsjoa katasatío kon.