YA KJOAʼMIYA xi jaʼato kui tsaʼyaa kʼianga tsjoa kisʼe kon je Jesús kʼianga tsakʼejna i̱ Sonʼnde. Kʼiatsa kʼoati mená tsanda ñá nga tsjoa sʼe̱ tokoán, tjínnele nga chjénngiaa je choa̱le kʼoa si̱tjosoán jmeni xi kitso.

Kʼoa tojo tso je testo xi tíjna tʼainni, je Jeobá kʼoatsoná nga kʼoasʼin koanngínkoaa yaoná josʼin kikao yaole Jesús kʼoa nga si̱tjosoán jmeni xi tsakakóya. Tsa kʼoasʼiaan nda kuiyoaa ngixko̱n Niná kʼoa tsjoa sʼe̱ tokoán.

Je Jesús kitsjoa kjoafaʼaitsjen xi koasenkaoná nga kjuintjenngiaa choa̱le, kʼoa nkjín xi kʼia kʼoakitso nga kitsoya ya jngo sonnindo. Janla kjoafaʼaitsjen jebi chótʼayá kʼoa nikjaʼaitsjenjiaan josʼin si̱chjén.

JÓSʼIN BASENKAONÁ KJOAFAʼAITSJEN JEBI:

Je Jesús kʼoakitso nga toxá machjénniná nga jchaa xi tʼatsʼe Niná. Mená nga jchaa: Jmé xá tiyoñá sonʼnde. Ánni nga kʼoasʼin kjoañʼai tjínsíni. A mandosinle Niná xi tʼatsaan. A xin mangián nga jemʼee. Kʼianga tsjoa sʼe̱ tokoán machjénní nga jchaa xi tʼatsʼe jebi. Je Jesús bení nga toyakjoan Énle Niná faʼaitʼa jokjoantjínni tʼatsʼe jebi. Kʼianga tsakʼétsʼoale Nʼaile, kitso: “Jé énli xi ñaki kjoakixi” (Juan 17:17). A koaanle je Énle Niná nga ñaki kʼoejngo tokoán.

XI ÑAKI KʼOAKOAN:

Jngo ti xi Esa ʼmi nʼio nda se kʼoa yaa tsakʼejnajinle jngo grupo xi kui síkjane músika xi rock ʼmi, ti jebi sa nʼio sa nʼio tsaʼyale. Ninga kʼoalani, joxi tjín xi chale koanle kʼoa kitso: “Ninga nʼio tsjoake nga ya tijnajian grupo jebi, kui xi koanmena nga ngisa tsjoa sʼe̱ tokoan”. Nga ki nichxin jngo testigole Jeobá tsabexkon, kʼoa itso: “Nʼio nkjín koya jmeni xi kiskonangile, kʼoa jmeni xi kitsona yaa Biblia kiskoénile kʼoa koanmesana nga tsaʼbe, kʼoa kuinga kiskotʼayasíña Biblia kao ndsʼee jebi”. Je xi tsakʼinyale Esa ñaki kiskajin ni̱ma̱le kʼoa koanmele nga kitsjoatʼale yaole je Jeobá. Kʼoa itso: “Ngasʼa ñaki tokjoa tijnajintsje, tonga ndʼai ʼbeñá jme xá tijnaña i̱ Sonʼnde”.

JÓSʼIN BASENKAONÁ KJOAFAʼAITSJEN JEBI:

Kui kjoamatokon xosíkaoná nga kuenta nʼia kʼoa nga ʼyaxkoán je xi ngikʼa. Je Jesús tsakakóle kjoamatokon je chjota xi ñʼai tjío. Nkjín chjota kisindaya ninga tsín ʼya xokitsole (Mateo 14:14; 20:30-34). Kʼianga chjénngilee je Jesús, kʼoati tsjoa satío tokoán (Hechos 20:35). Kʼoasʼin bakoñá kjoamatokon jmeni xi bixoán kʼoa jmeni xi nʼia kʼoa nga binyakoaa ʼyani xi nganʼio machjénle. Tonga tsakui nichxin i̱sí: “A kjoaixi nga ngisa tsjoa sʼe tokoán nga bakoá kjoamatokon”.

XI ÑAKI KʼOAKOAN:

Je Maria kao Carlos tjínle kjoamatokon. Je na̱le Maria jekʼien kʼoa tojesa nʼaile tíjna. Kʼoa nga to nachansa kijnason ndʼai je nʼaile, yaa kikao ya niʼyale. Nʼio nkjín kʼa nga tsín fayofe, kʼoa kʼoati jenkjín kʼa nga tokjitʼanangi fikao ya hospital nga tjochʼinle nga kʼoasʼin xi njínle. Ninga kʼoatso je Maria  kao xʼinle nga sakʼoa bijtale, nʼio tsjoa tjíole, tojo kitso Jesús, nga̱ be nga nda tjíosíkuinda je nʼaile.

JÓSʼIN BASENKAONÁ KJOAFAʼAITSJEN JEBI:

Jósʼin ngisa tsjoa sʼená kʼianga tjínná kjoanyʼán. Kʼianga kui tjínná ngisa nda biyokoaa xíngiaa. Kuinga ndasíni nga koanngíntjenngiaa kjoafaʼaitsjen jebi: “Tojo kji ngayije xi koa̱nno, kʼoatʼiaon jméni nga nyʼán kuiyosínio kao ngatsʼi chjota” (Romanos 12:18). Kʼianga “ngatsʼi chjota” tso, kʼoati je tínchja̱ni familianá kʼoa kao chjota xi tsín ngóson sʼin makjainná. A tsjoasa sʼe tokoán kʼianga nyʼán biyokoaa “ngatsʼi chjota”.

XI ÑAKI KʼOAKOAN:

Je Nair alikui choa ñʼai kjimale nga nyʼán tíjnakao xínkjín, nga̱ tse kjoa tífaʼatojin, ngisa ya yaniʼyale. Saʼnda nga kitsjion je xʼinle nichxin kjoan xjaʼaon nó ján, tojé tísíjchá je xtile. Jngo tile xi kjoale droga kiskajin, ti jebi me to kjitʼa nga nʼio majtile kʼoa kʼoatsole je na̱le kao xtiyánchjín ndichja nga tjín xi sikao. Je Nair kʼoatso nga kui Biblia xi tíbasenkao nga tísʼele kjoanyʼán ninga kjoa tífaʼatojin. ʼNdele nga totjín totje̱nni kjoa xi sijtinile yaole tosa bʼénele yaole nga ndʼé ma (Efesios 4:31, 32). Kʼianga tjínle kjoanyʼán ngisa nda tíjnakao je chjota kʼoa kao yaniʼyale.

Kʼiatsa kjuintjenngiaa je kjoafaʼaitsjen xi kitsjoa Jesús, ñaki tsjoa sʼe̱ tokoán kʼoa nda kuiyoaa. Tonga kʼianga tsjoa sʼe̱ná machjénní nga kataʼyaa jme xi choyalee nichxin xi nroaján. Nga̱ jósʼin tsjoa sʼeni tokoán nga tokui choyalee nga majchíngaa, nga tjochʼinná kʼoa nga biyaa. Tonga xi ndʼai, kʼoamaa ngatsʼiaa.

Ninga kʼoalani maa, je Jeobá nʼio tse kjoanichikontʼain tsjoále je xi kʼoasʼin koaikao yaole “josʼin kikao yaole Jesús”. Kʼoatso nga jngo sonʼnde chjotse kjoaʼaíkao jñani tondiaa koatio chjota kʼoa tsín tijme chʼin sʼe̱nile. Je Biblia itso: “Koeni je niʼyale Niná kijnajinle chjota, kʼoa Niná kʼoéjnakao. Chjotanaxinandále koa̱n. Tijéni Niná Ninále koa̱n. Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon je jaʼato” (Apocalipsis 21:3, 4).

Je Maria, xi ñokan kaoni ño nóle, xi kinikʼaxkiaa ya kjoaʼmiya xi títjon, nʼio tsjoa sʼele nga koyale kʼianga kuitjoson én jebi. Kʼoa ji, a mesali jchai josʼin kuiyoaa kʼianga koatexoma Chjotaxále Niná, kʼianga jesʼe̱ná kjoabijnachon xi ñaki nda (1 Timoteo 6:19). Kʼiatsa jaon, kʼoatʼinlai je testigole Jeobá xi tjín ya ʼndeli kʼoa tsamaije̱ chjí ya jña bitjo rebista jebi. *