ÑAKI kʼoatjín jotso én jebi. Sonʼnde xi tiyoaa ndʼai “jetobijtasaná kʼoa to kjoaba biyojiaan”. Kʼoa kuinga sakʼoa nikjaʼaitsjensíñá a koaan nga tsjoa sʼe̱ tokoán.

Si̱kjaʼaitsjenla je choa̱le Maria. Je chjoón jebi ñaki nʼio kisixá ngantsjai, tonga ndʼai nga je ñokan kaoni ño nóle alikui tichókjoanile tsa jña koai. Ninga nda síxása kjoafaʼaitsjenle, je yaole alikui tichókjoanile jme xi sʼín. Jósʼin tsjoa sʼe̱ni kon nga kʼoasʼin tíjna.

A kʼoati ma sakʼoali tsanda ji. Tsakui nichxin sakʼoa nikjaʼaitsjain jme xá tijnani i̱ Sonʼnde. Tsakui nichxin jekoansikaoli je xá xi nʼiai nga tokʼoa tinʼiantsjai kʼoa saʼnda tsín ʼya xi kuenta sʼín jokji nixái. Kʼoa ningalani nda tijnai ndʼaibi, tsakui nichxin makjaojinli tʼatsʼe nichxin xi nroaján, kʼoa tsakui nichxin toji tijnai mali kʼoa nibalai yaoli, kʼoa tsa tokjoabixkan tjínʼndeje̱ ya yaniʼyali. Kʼoa tsakui nichxin tjín xi kʼienli. Kʼoakoan je chjota xi André ʼmi. Nʼio kitsjentʼale je nʼaile, kʼoa nga toxijña kjitjochʼinle kʼoa kʼien je nʼaile nʼio tse kjoaba tsakʼejnajin André, kʼoa saʼnda kʼoakitso nga tsín titjóxínnile kjoaba xi tíjnajin.

Ninga tojme kjoani xi jetíbijtajinná kʼoa xi kjoaba tísíkatíojinná mená nga jchaa, a koaan nga tsjoa sʼe̱ tokoán nichxin xi tiyoaa ndʼai. Jebi yaa tsoyaná josʼin tsakʼejna je Jesucristo i̱ Sonʼnde nichxin kjoan jao jmi nó ján. Ninga tse kjoa jaʼatojin, tsjoa kisʼe kon, kʼoa kʼoati tsjoa sʼe̱ tokoán tsanda ñá tsa koanngíntjenngiaa je choa̱le.