CHANIYALAI jkui jebi: Je Noé tísíxá kʼoa bʼejnakjáya ngotjo. Yaa yáki̱cho̱ xi teson kji fikʼejnason kʼoa síkixʼínga je xjale, kotsen kaonile je arca xi tíbʼénda. Ñaki tínjele je xichayá kʼoa ñaki noʼyale ki̱cha̱ xi kjimaxákao. Kotsenle familiale nga nʼio tjíosíxá. Je chjoónle, je xtile kʼoa kao yánchjínʼndale, jenʼio nkjín nó tjíosíxá nga tjíobʼénda je arca. Je tífitʼale xá jebi tonga tojo tsesa xi chale.

Je chjota kʼoatsole nga skáyale nga kʼoatjíosʼín. Kʼoa nga sa fitʼa sa fitʼa xá jebi, ngisa tibijnokengáni nga̱ likui makjainle jme xi tso Noé nga jngo jtsínʼio jtséndáni Sonʼnde. Kʼoatso nga to nichxinle tjíosícha Noé kao familiale nga tokʼoalakji kaxa̱ tjíobʼénda. Tonga Jeobá, je Ninále Noé alikui kʼoasʼin kisikjaʼaitsjen xi tʼatsʼe choʼndale.

Je Biblia itso: “Je Noé yaa tsakʼamjekao Niná xi kixi” (Génesis 6:9). Jósʼin tsoyanile én jebi. Ali tsakuijin xi tsonile tsa i̱ jaʼai sonʼnde je Niná kʼoa tsakʼamjekao je Noé, kʼoa nikuijinla xi tsonile tsa je Noé xi ya ki ngʼajmi. Kui xi tsonile nga ñaki kisitjosonyeje Noé jme xi kitsole Niná kʼoa nga nʼio tsjoake koan joni tsa jngo miyo. Nga jenkjín jmi nó jaʼato nga tsakʼejna Noé itso én xi kisʼetʼa Biblia: “Kʼoasʼin koankjainle Noé, tsakakó nga tsakinle kjoañʼai chjotasonʼnde” (Hebreos 11:7). Jósʼin tsakakó Noé nga tsakinle kjoañʼai chjotasonʼnde. Jmé xi bakóyaná kjoamakjain xi kisʼele Noé.

Kʼianga sʼa koanjchínga je Noé sa chʼao sa chʼao tjíosʼín je chjota. Tokʼoa jechʼaokjoan chjota kʼianga tsakʼejna je nʼaijchákjinle Noé xi Enoc tsakʼin. Je Enoc, kʼoati chjotakixi koan kʼoa kʼoati Niná tsakʼamjekao, kʼoati kitso nga kjoaʼaí jngo nichxin nga ni̱kjeson je chjotatsʼen. Tonga kʼianga tsakʼejna Noé jenʼio toxkia chʼao tjíosʼín chjota. Kʼoa ngixko̱n je Jeobá saʼnda jekisikitsón sonʼnde je kjoatsʼen xi kijnajtsa (Génesis 5:22; 6:11; Judas 14, 15). Ánni nga kʼoasikji kjoatsʼen kisʼesíni.

Ya ngʼajmi nʼio tse kjoa kisoko. Jngo ánkje xi yátsʼin tsakasénle Jeobá, énndiso tsakáne kʼoa jé xokisʼin nga kʼoasʼin tsakajngijée je Adán kao Eva. Ánkje jebi jéní xi Na̱i kʼoa Satanás tsakʼin. Kʼoa nichxinle Noé nʼio nkjín ánkje xi ya kitʼale je Na̱i xi kʼoatisʼin yátsʼin tsakinyále Jeobá. Kitsjionkon je xá xi kitsjoale Niná ya ngʼajmi kʼoa i Sonʼnde jaʼaijen, chjota kisikʼóya yaole kʼoa je chixankao yánchjín xi nʼio naskánakjoan. Je ánkje xokjoan, xíjin koan, ngʼakon koan kʼoa to yaole kini, kʼoa je chjota kʼoati kisʼin nga̱ je kiskenngile (Génesis 3:1-5; 6:1, 2; Judas 6, 7).

Kʼoa nga kʼoasʼin yánchjín chixankao ánkje jebi, li toma xi kjoan yʼai xti kisʼele kʼoa toxkia tse nganʼio kisʼele. Je Biblia nefilim tsole, kʼoa je én jebi “xi síkʼatsao xi kjaʼaí” sʼin tsoyanile. Chjotatsʼen xokjoan ñaki chʼao kisichon sonʼnde. Ngixko̱n Niná je “kjoatsʼenle chjota kisʼejnakitse i̱ sonʼnde, kʼoa [...] ñaki tokui xi chʼaotjín kisatiojin ni̱ma̱le ngantsjai”. Je Jeobá kʼoatsakʼé kon nga jngo siento kao kan nó skóya kʼianga sikjeson je chjotatsʼen (Génesis 6:3-5).

 Je Noé jngo chjoón xi nʼio nda chjota kisʼele, kʼoa kʼianga jeʼaon siento nóle Noé jan xti kisʼele, xi Sem, Cam kʼoa Jafet tsakʼin. * Nʼiojin ñʼai koanle je Noé nga nda kisijchá je ʼndíxtile nga̱ nʼio chʼao koanchon sonʼnde. Je Noé kʼoa kao chjoónle ndajin kisikuinda nga tsínkui tsakinle ʼndíxtile jmeni xi tjíosʼín chjota xi tjín nga kʼia. Je xtiʼndí nʼio tsjoake je chjota xi nʼio tjínle nganʼio kʼoa kao chjota xi nʼio ʼyale, kʼoa je xi nefilim tsakʼin kʼoakoankjoan. Kjoanʼiojin kisʼejinle je xtile Noé jmeni xi sʼín je chjota xokjoan, kisʼejinjinle nga kʼoasʼin njín bʼéjten, tonga je Noé kao chjoónle kui tsakakóyale jokjoantjínni xi tʼatsʼe Niná Jeobá nga nʼio jtike ngayeje kjoatsʼen. Tsakinyakao ʼndíxtile nga katamajinle nga aon male Jeobá nga be nga kjoatsʼen tjín sonʼnde kʼoa xíjin je chjota (Génesis 6:6).

Je xi xijchá ma ndʼaibi, koaan skénngile je Noé kao chjoónle. I̱ Sonʼnde xi tiyoaa kʼoati ñaki to kjoatsʼen tjín kʼoa xíjin chjota. Kʼoa saʼnda kʼoatjío je xi bʼétsaojinkao xtiʼndí. Tonga je xijchá xi nda sʼín, bʼasje nganʼio nga bakóyale xi tʼatsʼe Niná je ʼndíxtile. Kʼoatsole nga kjoanyʼán xi tsjoake Jeobá kʼoa nga kjoaʼaxin je kjoatsʼen xi tjín (Salmo 11:5; 37:10, 11). Ninga chʼaolani chon i̱ Sonʼnde koaan ndasʼin sijchá je ʼndíxtile xi xijchá ma. Je Noé kʼoa kao chjoónle kʼoakisʼin. Nga jan xtile nda kisʼin kʼoa je chixankao je yánchjín xi kʼoati sítjosonle Jeobá.

Tonga kicho jngo nichxin kʼianga tsʼantjaiya ngayeje. Je Jeobá kʼoakitsole Noé nga sikjeson chjotasonʼnde kʼoa i kitsole: “Jngo arca tʼendalai yaoli kao yá xi xicha tjínle” (Génesis 6:14).

Je arca xi tsakʼénda Noé ali tsa jo chitsojin kisʼe josʼin majin kʼale chjota. Tojo kaxa kisʼe. Je Jeobá kʼoakitsole Noé josʼe̱ je arca kʼoa nga xicha katasíkajon nitsinle kao yale. Kʼoati kitsole anni nga kui sindani, kitsole: “Jtsínʼio kjoaʼaikoa i̱ sonʼnde [...]. Kʼoa ngatsʼi xi tjío i̱ sonʼnde kuiyání”. Kʼoa kitsosale: “Tjínneli kuitjásʼain ya arca ji kʼoa kao xtili kʼoa kao chjoónli kʼoa kao yánchjínle xtili”. Kʼoa kʼoati tjínnele kisikʼasʼen jotjín koya cho̱ tjín. Tojé xi ya tjíoʼya ya arca xi kuitjontjaile yaole nga jekjoaʼaí jtsínʼio (Génesis 6:17-20).

Nʼio tse xá kisʼele Noé nga̱ nʼioje kisʼe je arca. Jngo siento kao kante jan metro ndo kʼoa kanjao metro teya koa̱n, kʼoa tejan metro ngʼa. Ngisa nʼioje kisʼe tikʼoajinni jngo barcoyá xi nʼiosaje kji xi tsakʼénda chjota nichxin xi tiyoaa. Jókitso Noé nga kʼoatsakʼinle. “Likuila kʼoakoa̱nna” a kitso. A kʼoakitso nga ñʼai koa̱nle nga kui kʼoenda. A kisikʼantjaiya josʼin tsakʼénda je arca tojoni nga ngisa choa ñʼai koanle. Je Biblia itso: “Je Noé kʼoakjoán kisʼin ngayeje jmeni xi tsakʼénele Niná. Ñaki kʼoakjoán kisʼin” (Génesis 6:22).

 Nʼio nkjín nó koanjngonile je arca, tsakui nichxin ñachan kʼoa tsa ñachante nó. Tsejin kichomani nga tsakʼéle yá, nga kiskenʼndójbe kʼoa nga kisinda yáki̱cho̱, nga kisinda yáte kʼoa kisinda xi koanchjénsale. Kʼoa xijekoan, sa kuijin yá tsakʼékjaongá. Je arca jan piso kisʼele, nkjín kuarto kisʼele kʼoa jngo xo̱ntjoa kisʼele. Kʼoa kʼoajinti kisʼele ventana kʼoa kisʼejinle tsjájko̱ ánni nga koan tsangajonni nandá (Génesis 6:14-16).

Kʼianga ki nó sa kiskoé kiskoé sén josʼe̱ je arca. Nʼiojin tsjoa kisʼele Noé kʼianga kʼoasʼin tsakinyakao familiale. Tonga ijngosa xá kisʼele xi ngisasa ñʼai tíjna. Je Biblia kʼoatso nga je Noé “kinchja̱ya xi kjoakixi” (2 Pedro 2:5). Kui xi tsonile nga kisʼele kjoanʼiojin nga kʼoakitsole chjotatsʼen xi tjín nga kui nichxin kʼianga jngo jtsínʼio kjoaʼaí. Jókitso je chjota. Je Jesucristo kʼoakitso nga tsín tsakʼaʼén je chjota, nga tokui kʼoatjíosʼín josʼínntsjai, tjíoʼbi, tjíokjen kʼoa tjíobixan, kʼoa likui tsakʼaʼénle je Noé (Mateo 24:37-39, TNM). Nʼiojin nkjín xi totsabesin je Noé kao familiale, kʼoa tsakui nichxin saʼnda sikʼien kitsole kʼoa tsa jme xi kisikao.

Ninga kʼoalani, je Noé kao familiale tosi tonda kisixá. Tosi tonda tsakʼénda je arca ninga kʼoakitso chjota nga to nichxinle tjíosícha kʼoa nga skále nga kʼoatjíosʼín. Nichxin xi tiyoaa ndʼaibi, je familia xi chjotale Cristo ma, nda sʼín kʼianga kjenngile Noé kao familiale, nga̱ nichxin fetʼa tiyoaa ndʼai tojo tso Biblia (2 Timoteo 3:1). Kʼoa je Jesús kʼoakitso nga nichxin jebi kʼoati koanchon jokoanchon nichxin kʼianga tsakʼénda arca je Noé. Kʼiatsa tsín binyáño énle Niná je chjota, tsa tobesin je chjotale Cristo kʼoa tsa saʼnda fitjenngike machjén nga sikjaʼaitsjenjin choa̱le Noé nga̱ kui kjoa jaʼatojin tsanda je.

Chan kicho nichxin kʼianga koanjngo je arca. Kʼianga jaon siento nóle je Noé kʼiaa kʼien Lamec, * je nʼaile Noé. Xi koanni aon nó kʼiaa kʼien Matusalén je pajchále Noé. Je Matusalén ñajan siento kao jankan kao ñajan nó koanle, jé xi ngisasa nʼio tse tsakʼejna xi bʼaxki ya Biblia (Génesis 5:27). Je Matusalén kao Lamec kʼoati kʼia tsakatio kʼianga tsakʼejna je Adán, je chjota xi títjon koannda.”

Tikuini nó nga kʼien je Matusalén, je Jeobá i kitsole Noé: “Titjásʼain, ji kʼoa kao ngatsʼi xi tjíoʼya ya niʼyali, ya arca”. Kʼoati kitsole nga katasíkʼasʼen tojo tjín koya cho̱ tjín, kʼoakitsole nga ñato ñato katasíkʼasʼen je xi tsje, je xi ma bʼaitʼale Niná, kʼoa nga jao jao katasíkʼasʼen xi kjaʼaí cho̱ (Génesis 7:1-3).

Ñaki tokoanxkónjinná tsa tsaʼyaa nga kʼoasikji cho̱ kicho ya jña kijna arca, xi yʼai kjoan xi ʼndí kjoan, xi kjaʼaí kjaʼaí kjoan, xi kjaʼaí kjaʼaí sʼín: tjín xi ndso̱ko̱ fini, xi fitje̱n, xi tofájbe yaole... Tonga likuijin ʼyaa jokji xá kisʼele Noé nga tsakʼéteya, nga tsakʼéchjoayale kʼoa josʼin kinchja̱le cho̱jñá jebi nga katafisʼen ya arca. Je Biblia kʼoatso nga “jaʼasʼen [...] ya arca” (Génesis 7:9).

Likui makjain kʼale chjota tsa ñaki kʼoakoan kjoaixi. Likui majinle jósʼin nga tiya koatiojinnile xínkjín ngatsʼi cho̱. Tonga sikjaʼaitsjenla, je Niná xi kisinda ngayeje xi tjín, a tsí koa̱nle nga jtín sʼin sikatío je cho̱, nga tsín josikao xínkjín. Si̱kjaʼaitsjenla kʼianga je Jeobá kisijaoya je ndáchikon  xi Ni ʼmi kʼoa nga kʼoati kisikʼéjnajyoje̱ je Tsʼuí. Nga ʼyaa jebi, a tsí koanle kʼoakisʼin ngayeje jmeni xi tso Biblia tʼatsʼe Noé. Jaon, kʼoakisʼin.

Je Niná koanjinle tsa kjaʼaísʼin tsakʼasjentjai je cho̱. Tonga nga kʼoasʼin je Noé kisichjén kui síkjaʼaitsjenjinná nga kʼoasʼin tsakʼéndajin saʼnda ngasʼa kʼianga je chjota sikuinda je cho̱ (Génesis 1:28). Saʼnda tjínkʼa xijchá xi kui choa̱le Noé bakóyale je ʼndíxtile kʼianga kʼoatsole nga je Jeobá, nga tsín tsa tojejin chjota xi chjí be nga kʼoati chjí be je cho̱.

Je Jeobá kʼoakitsole je Noé kʼianga to ijngo xomana sa cha nga sikʼa je Jtsínʼio. Xomana jebi nʼiojin tse xá kisʼele Noé kao familiale. Si̱kjaʼaitsjenla jokji xá tje̱nkao nga kisikatíonda je cho̱, nga kisikatíonda tsojmi xi kiskine kʼoa ngayeje tsojmi xi tjínle. Je chjoónle Noé kʼoa kao yánchjínle je Sem, Cam kao Jafet nʼiojin kisixá kʼianga kisichonnda jñani tsakatio ya yakaxa̱.

Jókitso je chjota. Tojo likui tsakʼaʼén ninga ñaki tjíobeni xko̱n nga tísíchikontʼain Jeobá je Noé kʼoa kao xá xi tísʼín. Saʼnda tsín tsakʼaʼén ninga tsabe nga tjíofaʼasʼen je cho̱ ya arca. Alikui tokʼoamaná nga tsín kinrʼoé, nga̱ nichxin xi tiyoaa ndʼaibi kʼoati sʼín chjota. Alikui bʼaʼén, ninga tsen kjima nga nichxin fetʼa xi tiyoaa. Kʼoa tojo kitso je pastro Pedro, nkjín chjota je xi tobijnoke ʼyani xi bʼaʼén (2 Pedro 3:3-6). Kʼoajinti koantʼain je Noé kao familiale.

Kʼiáni nga tsín tijokitsoni je chjota. Je Biblia kʼoatso kʼianga jekisikʼasʼen Noé je cho̱, kʼoa kʼianga jejaʼasʼen kao familiale “je Jeobá tsakʼéchjoá je xo̱ntjoa”. Kʼianga kʼoasʼin kisʼechjoa je xo̱ntjoa ñaki jyójin tsakatio je chjota xi ya tjío chrian, xi tjíobijnoke tsakai. Kʼoa tsa tsín jyó tsakatio nga kʼia, kʼiajin jyó tsakatio nga tsakʼa jtsí, nga̱ tsín tikoanxa̱nni saʼnda nga kitsendá Sonʼnde jokjoan kitso je Jeobá (Génesis 7:16-21).

A tsjoa koanle Jeobá nga kʼoasʼin kʼien ngatsʼi chjotatsʼen xi tsakatio nga kʼia. Majain (Ezequiel 33:11). Je Jeobá kitsjoale nichxin nga koan kisikʼantjaiya yaole tsakai. Koanjin kisitjosonle Niná kʼoa kitjontjaile yaole kʼianga jaʼai Jtsínʼio tsa kʼoasʼin kisitjoson jokisʼin je Noé. Nga̱ je Noé kisitjoson ngayeje jme xi kitsole Niná. Kʼoa je Biblia kʼoatso nga “kʼoasʼin koankjainle Noé, tsakakó nga tsakinle kjoañʼai chjotasonʼnde”. Je kjoamakjainle Noé tsakakó nga nʼio chʼao koankjoan je chjota xi tsakatio nga kʼia. Kʼoa je kjoamakjainle kʼoati kui xi tsakʼasjentjai je Noé kʼoa kao yaniʼyale. Tsa chjénngilai je kjoamakjain xi kisʼele je Noé kʼoati sʼeli kjoabijnachon, ji kʼoa kao xíngi. Tojo kisʼin Noé, ji kʼoati koa̱n kuitómjekoai Niná Jeobá kʼoa miyole koai̱n tokʼia saʼndani.