Je Biblia kʼoatso nga jée kichʼá ngatsʼiaa, jé Adán kisikakinná. Toje kui kichʼá nga tsiaan kʼoa kuinga sakʼoa sokójéeniná kʼoa skanni kʼoamaniná jme xi nʼia. Je Jesucristo, ʼNdíle Niná, kui xá kʼienni nga tsakʼéchjíntjai jéená kʼoa kuinga koa̱n cha̱tʼaniná. Je kjoabiyale Jesús jngo kjoatjao xi nʼio chjíle xi kitsjoaná Niná. (Tʼexkiai Romanos 3:23, 24.)

Tjín chjota xi nʼio ai jée tsakajngi kʼoa kʼoatso tsa sichatʼale Niná. Nʼio tsjoa bʼe tokoán jotso Biblia, nga̱ itso: “[Je] njínle Jesucristo ʼndíle Niná sítsjeyaná ngayije jéená” (1 Juan 1:7). Je Jeobá tíjnanda nga síchatʼaná ninga kui jée xi ai tíjna ska̱jiaan kʼiatsa ñaki kʼoakoa̱nniná kao ngayeje ni̱ma̱ná. (Tʼexkiai Isaías 1:18.)

Kʼiatsa mená nga sichatʼaná je Niná tjínnele nga kataʼyaxkoaan, xi tsonile, katamachoyaná kjoafaʼaitsjen xi tsjoá, jotjín kjoatéxomale kʼoa kao jmeni xi sʼín (Juan 17:3). Je Jeobá nʼio tse kjoanichatʼa tjínle. Síchatʼale je xi kʼoamanile jéele kʼoa xi bʼénele yaole nga tsín tikʼoasʼínni. (Tʼexkiai Hechos 3:19.)

Koaan kjoáyatsjoaa ni̱ma̱le Niná. Je Jeobá bení nga tochoa tje̱n bichó nganʼioná. Nda chjota kʼoa tjínle kjoamatokon. A tsín fáyatsjoa tokuin jebi nga tosi tonda chótʼayai kʼianga jchai jósʼiain nga nda kuijnai ngixko̱n Niná. (Tʼexkiai Salmo 103:13, 14.)