TIKJAʼAITSJENLAI tsa jngo miyo tíjnali xi nʼio ndali kʼoa tsakui kʼoasʼin jmeni xi jao kʼoe tokuin, kʼoa tsa tjíokʼa chjota xi chʼaosʼin sikʼaxki̱ miyoli kʼoa kʼoakuitso nga nʼio tsʼen. A tokjoan koa̱nkjainli axo chóyalalai miyoli nga jesoa kʼoakatatsoli jotjínni kjoa. Kʼoa tsa tsín ya tíjna je miyoli, a chóyakaolai nga kataʼyale tsa kʼoatjín kʼoa tsa mai jme xi tíʼmile kʼoa nga tsín chʼaosʼin si̱kjaʼaitsjain xi tʼatsʼe.

Tongini nga kjesa chʼaosʼin nikjaʼaitsjain xi tʼatsʼe miyoli, ngisajin kixi tíjna kʼoa ngisajin nda nga títjon kjoanla i̱sí: “A ñaki nda ʼbexkoan jokjoan je miyona. Ánni nga miyona masíni”. A tsí kʼoati ngisa kixi tíjna kʼoa ngisa nda tsa kʼoati tso xi chjónangilee yaoná xi tʼatsʼe Niná tongini nga kjesa kʼoasʼin nikjaʼaitsjenjián tsa tsʼen.

Tsakui nichxin tjínkʼa jmeni xi tsín majinli xi kisʼin Niná ngasʼa kʼoa tsa jmeni xi títsjoáʼnde nga kʼoakjima nichxin xi tiyoaa ndʼaibi. Tochale tjíokʼa xi kʼoakuitsoli nga tsʼen je Niná kʼoa saʼnda kʼoeneli nga kʼoatisʼin si̱kjaʼaitsjain tsanda ji. Tsí ngisa nda nga tsín tokjoán koa̱nkjainli. Je xi koasenkaoli kuijin tsa nda ʼyaxkuin ndʼaibi jokjoan je Niná. Chjónangilai yaoli: “Jmé kjoanda xi tíbakóna Niná saʼnda ndʼaibi”.

Kʼiatsa tse kjoa tibitjatojin, tochale kʼoasí nga tsín jme kjoanda tíbakóli je Niná. Tonga tikjaʼaitsjenlai jebi: A tʼatsʼe Niná tínroani je kjoañʼai xi tibitjatojin, axo kui je kjoanichikontʼain xi tísʼeli xi tʼatsʼe tínroani. Tojosʼin jetsaʼyaa, jé Na̱i xi “[tí]batéxoma sonʼndebi” (Juan 12:31). Jebi kui bakóná nga me toje Na̱i tjínle jée tʼatsʼe kjoañʼai xi tjín sonʼnde. Tonga je kjoa xi bitjatojiaan sakʼoa ya nroani tʼatsʼe jmeni xi nʼia kʼoa tsamaije̱ totsín ñá tjínjinná jme xi matʼeen.

Kʼoa jméni xi tísʼín je Niná. Je Biblia kʼoatso nga je kisinda ngʼajmi kao Sonʼnde. Kʼoati tso nga nʼio ndasʼin kisinda Niná je yaoná. Kʼoa kʼoatso nga je títsjoáná kjoabijnachon (Salmo 124:8; 139:14; Daniel 5:23). Jmé xi bakóyaná jebi xi tʼatsʼe Niná.

Kui xi bakóyaná nga totʼatsʼe nga tiyochoán (Hechos 17:28). Kʼoati kui xi bakóyaná nga ngayeje xi tjín Sonʼnde kʼoa kao ngayeje kjoanda xi tjínná, jolani nga ma bakoá kjoatsjoacha kʼoa nga tjínná kjoamiyo, tʼatsʼe Niná tínroani. Kʼoati je kitsjoaná nijeen, ndsaa, xo̱ñoaa kʼoa kao nitjoaan xi nʼio nda machjénná (Santiago1:17). A tsíkui xi bakóyaná jebi nga nʼio nda chjota je Niná, nga bakinle nga tsjoacha koaan kʼoa nga je si̱nʼiotʼaa.

Ninga kʼoalani, tochale tojo ñʼai koa̱nli nga si̱nʼiotʼai je Niná. Tsakui nichxin kʼoasí nga kje ñaki nda ʼyajin jokjoan, nga̱ tosʼa choa xi kaʼyaa i̱ kjoaʼmiya jebi kao xi jaʼato kʼianga tsín kʼoatjín nga tsʼen ʼmile Niná. A tsín nʼio ndatjín tsa chótʼayasai xi tʼatsʼe Niná. * Kʼiatsa kʼoasʼiain, ngisasa nda jchai jokjoantjínni xi tʼatsʼe. Jchaní nga “jé Niná xi kjoatjaocha” kʼoa nga tsín tsa tsʼenjin (1 Juan 4:8).